26th Jul2018

ພົບປະແລກປ່ຽນບົດຮຽນວຽກງານຈະລາຈອນ ລະຫວ່າງກະຊວງ ປກສ ລາວ ແລະ ກະຊວງ ຕຳຫຼວດ ສສ ຫວຽດນາມ

by somchan

ກົມຕຳຫຼວດຈາລະຈອນກົມໃຫ່ຍຕຳຫຼວດກະຊວງ ປ້ອງກັນຄວາມສະຫງົບ ສປປ ລາວ ແລະ ກົມຕຳຫຼວດ ຈະລາຈອນກະຊວງຕຳຫຼວດ ສສ  ຫວຽດນາມ ພົບປະແລກປ່ຽນບົດຮຽນວຽກງານ ຈະລາຈອນ ໃນວັນທີ 17 ກໍລະກົດ 2018 ນີ້ ທີ່ໂຮງແຮມວຽງຈັນພຣາຊ່າ ຝ່າຍລາວນຳໂດຍ ພັທ ກົງສີ ສຸວັນນະຕຸ່ມ ຫົວໜ້າກົມຕຳຫຼວດຈະລາຈອນ ກະຊວງ ປກສ ລາວ, ຝ່າຍຫວຽດນາມນຳໂດຍ ພົຈວ ຫງຽນ ຫງ໋ອກ ຕວັນ ຮອງຫົວໜ້້າກົມຕຳຫຼວດຈະລາຈອນ ກະຊວງຕຳຫຼວດຫວຽດນາມ ພ້ອມດ້ວຍຄະນະທັງສອງຝ່າຍເຂົ້າຮ່ວມ.

ໃນກອງປະຊຸມທັງສອງຝ່າຍໄດ້ພັດປ່ຽນກັນລາຍງານສະພາບການເຄື່ອນໄຫວວຽກງານຈະລາຈອນໃຫ້ກັນຊາບ ພ້ອມທັງຄົ້ນຄວ້າປຶກສາຫາລື ແລກປ່ຽນບົດຮຽນ ເປັນຕົ້ນ: ການຄຸ້ມຄອງພະນັກງານຕາມສາຍຕັ້ງວິຊາສະເພາະກົມຕຳຫຼວດຈະລາຈອນ, ການສະກັດກັ້ນ ແລະ ແກ້ໄຂອຸປະຕິເຫດ, ການແກ້ໄຂຈະລາຈອນແອອັດ ໃນຕົວເມືອງໃຫຍ່ໃນຊົ່ວໂມງຮີບດ່ວນ, ການຄຸ້ມຄອງພາຫະນະ, ການຄຸ້ມຄອງການນຳໃຊ້ເງິນຫ່ວງປັບໃໝຂອງແຕ່ລະທ້ອງຖິ່ນ ຍັງບໍ່ທັນເປັນເອກະພາບ ພ້ອມດຽວກັນນີ້ ທັງສອງຝ່າຍຍັງໄດ້ປຶກສາຫາລືບັນຫາທີ່ຍັງຄົງຄ້າງ ເປັນຕົ້ນການດຳເນີນຄະດີກ່ຽວກັບບັນຫາອຸປະຕິເຫດທາງລົດໄຟ, ທາງນ້ຳ, ທາງອາກາດ. ວຽກງານທາງຫຼວງ, ການແບ່ງໜ້າທີ່ຮັບຜິດຊອບກອງ, ບັນດາແຂວງ, ການຄຸ້ມຄອງຖະໜົນຫຼວງແຫ່ງຊາດ, ການຄຸ້ມຄອງພາຫະນະລວມ ທີ່ນຳໃຊ້ນຳໃຊ້ຢູ່ຫວຽດນາມ, ການຄຸ້ມຄອງເງິນປັບໄໝຜູ້ລະເມີດກົດຈະລາຈອນ.

ເພື່ອເປັນບົດຮຽນໃຫ້ແກ່ການປັບປຸງພັດທະນາວຽກງານຕຳຫຼວດຈະລາຈອນ ໃຫ້ທັນສະໄໝສົມຄູ່ກັບການເຕີບໃຫຍ່ຂະຫຍາຍຕົວ ທາງດ້ານເສດຖະກິດ-ສັງຄົມ ໂດຍສະເພາະແມ່ນການຂະຫຍາຍຕົວທາງດ້ານລະບົບເສັ້ນທາງຄົມມະນາຄົມຂົນສົ່ງ ຂອງ ສປປ ລາວ ທີ່ນັບມີການກໍ່ສ້າງພັດທະນາ ເພື່ອເຮັດໃຫ້ປະເທດລາວ ກາຍເປັນໃຈກາງການບໍລິການຂົນສົ່ງ ແລະ ໂດຍສານ ຜ່ານໃນອານຸພາກພື້ນທີ່ພົ້ນເດັ່ນແມ່ນມີການກໍ່ສ້າງເສັ້ນທາງລົດໄຟ. ນອກນີ້, ຍັງມີການກະກຽມກໍ່ສ້າງເສັ້ນທາງອື່ນໆ ທີ່ມີມູນຄ່າການລົງທຶນຢ່າງຫຼວງຫຼາຍ ເຊິ່ງໃນນີ້ວຽກງານຕຳຫຼວດຈະລາຈອນ ກໍແມ່ນວຽກງານສຳຄັນທີ່ຈະຕ້ອງໄດ້ມີການພັດທະນາໄປພ້ອມໆກັນ.

Off

Comments are closed.