13th Dec2018

ກອງປະຊຸມສະພາແຫ່ງຊາດພິຈາລະນາ ຮ່າງກົດໝາຍວ່າດ້ວຍລາຍເຊັນ ເອເລັກໂຕຣນິກ

by somchan

ການດຳເນີນກອງປະຊຸມ ສະໄໝສາມັນເທື່ອທີ່ 6 ຂອງສະພາແຫ່ງຊາດ ຊຸດທີ 8 ໃນວັນທີ 12 ທັນວາ ນີ້ ຢູ່ທີ່ຫໍປະຊຸມແຫ່ງຊາດ ຫຼັກ 6 ນະຄອນຫຼວງວຽງຈັນ, ພາຍໃຕ້ການເປັນປະທານຂອງ ທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດ ປະຈຳແຕ່ລະເຂດເລືອກຕັ້ງຕ່າງໆ  ໄດ້ຮັບຟັງການສະເໜີຮ່າງກົດໝາຍ ວ່າດ້ວຍລາຍເຊັນເອເລັກໂຕຣນິກ ເຊິ່ງເປັນກົດໝາຍສ້າງງຂື້ນໃໝ່ ທີ່ສະເໜີໂດຍ            ປອ ທັນສະໄໝ ກົມມະສິດ ລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ ເຊິ່ງທ່ານໄດ້ຍົກໃຫ້ເຫັນວ່າ ກົດໝາຍວ່າດ້ວຍລາຍເຊັນເອເລັກໂຕຣນິກ ມີຄວາມສຳຄັນເປັນຢ່າງຍິ່ງໃນການນຳໃຊ້ ເພາະຈະເປັນການຢັ້ງຢືນ ແລະ ເພື່ອໃຫ້ບັນດາຫົວໜ່ວຍທຸລະກິດໃນລາວໄດ້ນຳໃຊ້ຢ່າງຖືກຕ້ອງ ຢ່າງມີປະສິດທິຜົນໃນອານາຄົດ, ໂຄງປະກອບຂອງຮ່າງກົດໝາຍ ວ່າດ້ວຍລາຍເຊັນເອເລັກໂຕຣນິກສະບັບນີ້ ປະກອບມີ 13 ພາກ, 82 ມາດຕາ.

ຈາກນັ້ນປະທານກອງປະຊຸມໄດ້ມີຄຳເຫັນເຈາະຈີ້ມ ແລະ ໃຫ້ທິດຊີ້ນຳການປະກອບຄຳເຫັນຂອງສະມາຊິກສະພາແຫ່ງຊາດໃສ່ຫຼາຍບັນຫາ ຕໍ່ເນື້ອໃນຮ່າງກົດໝາຍສະບັບນີ້ ທ່ານ ສຸກສະຫວັນ ໄຊສົມບັດ ສະມາຊິກສະພາແຫ່ງຊາດ ເຂດເລືອກຕັ້ງທີ່ 13 ແຂວງສະຫວັນນະເຂດ ມີຄຳເຫັນວ່າ ຊື່ກົດໝາຍວ່າດ້ວຍລາຍເຊັນເອເລັກໂຕຣນິກຍັງບໍ່ເໜາະສົມ ຄວນໃສ່ຊື່ວ່າ ຮ່າງກົດໝາຍວ່າດ້ວຍທຸລະກຳທາງເອເລັກໂຕຣນິກ ຈຶ່ງຈະເໜາະສົມ ເພື່ອມີເນື້ອໃນກວ້າງຂວາງ.

ພ້ອມນີ້ ທ່ານ ຄຳສີ ປ່ຽງວໍລະວົງ ສະມາຊິກສະພາແຫ່ງຊາດເຂດເລືອກຕັ້ງທີ່ 15 ແຂວງຈຳປາສັກ ໄດ້ມີຄຳເຫັນວ່າ ຢາກໃຫ້ຄະນະກຳມະການຮ່າງກົດໝາຍວ່າດ້ວຍລາຍເຊັນເອເລັກໂຕຣນິກຂຽນນິຍາມໃຫ້ຊັດເຈນເພື່ອຄວາມກະຈ່າງແຈ້ງ ແລະ ຄວາມເຂົ້າໃຈໃນການນຳໃຊ້ໃຫ້ຖືກຕ້ອງ.

ພາຍຫຼັງສະມາຊິກສະພາແຫ່ງຊາດ ຈາກເຂດເລືອກຕັ້ງຕ່າງໆ ໄດ້ປະກອບຄຳເຫັນສຳເລັດແລ້ວ ປະທານກອງປະຊຸມໄດ້ສະເໜີໃຫ້ລັດຖະມົນຕີກະຊວງໄປສະນີໂທລະຄົມມະນາຄົມ ແລະ ການສື່ສານ ຂື້ນຊີ້ແຈງເພີ່ມຕື່ມຢ່າງລະອຽດຕໍ່ບາງບັນຫາທີ່ສະມາຊິກສະພາແຫ່ງຊາດໃຫ້ຄວາມສົນໃຈ ຈາກນັ້ນສະມາຊິກສະພາແຫ່ງຊາດໄດ້ພ້ອມລົງຄະແນນຮັບຮອງເອົາຮ່າງກົດໝາຍດັ່ງກ່າວ ດ້ວຍຄະແນນເຫັນດີເປັນສ່ວນຫຼາຍ.

Off

Comments are closed.