13th Dec2018

ພິທີມອບ-ຮັບ ລັດຖະມົນຕີ ກະຊວງປ້ອງ ກັນຄວາມສະຫງົບ ຜູ້ເກົ່າ ແລະ ຜູ້ໃໝ່

by somchan

ພິທີມອບ-ຮັບ ລັດຖະມົນຕີ ກະຊວງປ້ອງກັນຄວາມສະຫງົບ ຜູ້ເກົ່າ ແລະ ຜູ້ໃໝ່ ໄດ້ຈັດຂື້ນ ໃນວັນທີ່ 13 ທັນວານີ້  ໂດຍການ ເປັນກຽດເຂົ້າຮ່ວມ ຂອງ ທ່ານ ພັນຄຳ ວິພາວັນ ກຳມະການກົມການເມືອງ ສູນກາງພັກ ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ, ມີຄະນະລັດຖະມົນຕີກະຊວງປ້ອງກັນຄວາມສະຫງົບ, ຄະນະຈັດຕັ້ງສູນກາງພັກ, ຕາງໜ້າຄະນະກຳມະການ ປ້ອງກັນຊາດປ້ອງກັນຄວາມສະຫົງບ              ສະພາແຫ່ງຊາດ, ຮອງລັດຖະມົນຕີ ກະຊວງປ້ອງກັນປະເທດ, ຄະນະພັກ-ຄະນະບັນຊາ, ພະນັກງານຫຼັກແຫຼງກົມກອງອ້ອມຂ້າງກະຊວງເຂົ້າຮ່ວມ.

 

 

ທ່ານ ທອງຈັນ ໂຂງພູມຄຳ ຮອງຫົວໜ້າຄະນະຈັດຕັ້ງສູນກາງພັກ ໄດ້ຜ່ານຄຳສັ່ງຂອງກົມການເມືອງສູນກາງພັກວ່າດ້ວຍການຍົກຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່, ໃນນີ້ໄດ້ຍົກຍ້າຍ ພົຕ ສົມແກ້ວ ສີລາວົງ ລັດຖະມົນຕີກະຊວງປກສ ຜູ້ເກົ່າໄປຮັບໜ້າທີ່ໃໝ່ຢູ່ກະຊວງປ້ອງກັນປະເທດ ແລະ ຄຳສັ່ງຂອງ ເລຂາທິການສູນກາງພັກ ວ່າດ້ວຍການ ຍົກຍ້າຍ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ຮອງລັດຖະມົນຕີ ກະຊວງປ້ອງກັນປະເທດ ໄປຮັບໜ້າທີ່ໃໝ່ ຢູ່ກະຊວງປ້ອງກັນຄວາມສະຫງົບ ພ້ອມທັງຜ່ານລັດຖະດຳລັດປະທານປະເທດ ວ່າດ້ວຍການແຕ່ງຕັ້ງ ພົທ ວິໄລ ຫຼ້າຄຳຟອງ ເປັນລັດຖະມົນຕີກະຊວງປ້ອງກັນຄວາມສະຫງົບ ແລະ ຍັງໄດ້ຜ່ານມະຕິຕົກລົງຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ເປັນເລຂາຄະນະພັກກະຊວງປກສ. ໂອກາດ ດັ່ງກ່າວ ພົຕ ສົມແກ້ວ ສີລາວົງ ລັດຖະມົນຕີ ກະຊວງປກສ ຜູ້ເກົ່າ ໄດ້ລາຍງານສະພາບການຊີ້ນຳ-ນຳພາກຳລັງປ້ອງກັນຄວາມສະຫງົບໃນໄລຍະ 5 ປີຜ່ານມາສາມາດຕີລາຄາໄດ້ຜົນງານດ້ານດີ, ດ້ານອ່ອນຂໍ້ຄົງຄ້າງ ແລະ ທິດທາງທີ່ຈະສຶບຕໍ່ຈັດຕັ້ງປະຕິບັດໃນຕໍ່ໜ້າ. ໂອກາດນີ້ກໍໄດ້ມີການເຊັນມອບ-ຮັບໜ້າທີ່ລະຫວ່າງ ພົຕ ສົມແກ້ວ ສີລາວົງ ເລຂາທິການສູນກາງພັກ ລັດຖະມົນຕີກະຊວງປກສ ຜູ້ເກົ່າ ແລະ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີ ກະຊວງປກສ ຜູ້ໃໝ່.

ໂອກາດດັ່ງກ່າວ ທ່ານ ພັນຄຳ  ວິພາວັນ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ໄດ້ໂອ້ລົມຕໍ່ພິທີ ໂດຍທ່ານກ່າວວ່າ ການປັບປຸງກົງຈັກການຈັດຕັ້ງ, ການໂຍກຍ້າຍຊັບຊ້ອນໜ້າທີ່ເປັນວຽກງານປົກກະຕິ, ທັງແມ່ນການຕອບສະໜອງຕາມຄວາມຕ້ອງການແຕ່ລະໄລຍະ, ເຊິ່ງການປັບປຸງດັ່ງກ່າວແມ່ນຜົນປະໂຫຍດລວມຂອງປະເທດຊາດ ຂອງປະຊາຊົນ  ແລະ ທ່ານຍັງໄດ້ຍ້ອງຍໍຊົມເຊີຍຕໍ່ບັນດາຜົນງານທີ່ທ່ານລັດຖະມົນຕີ ກະຊວງປ້ອງກັນຄວາມສະຫງົບຜູ້ເກົ່າຍາດມາໄດ້ຕະຫຼອດໄລຍະຜ່ານມາ. ພ້ອມທັງເນັ້ນໜັກໃຫ້ທ່ານລັດຖະມົນຕີຜູ້ໃໝ່ຈົ່ງເພີ່ມທະວີຄວາມຮັບຜິດຊອບໃຫ້ສູງຂື້ນ ສືບຕໍ່ປັບປຸງກຳລັງປ້ອງກັນຄວາມສະຫງົບໃຫ້ມີຄວາມປອດໃສໜັກ ແໜ້ນເຂັ້ມແຂງ.

Off

Comments are closed.