17th Jan2019

ກັກຕົວພວກຖືກຫາຄ້າ-ຂາຍຢາເສບຕິດ ພ້ອມຂອງກາງຢາບ້າ 80,000 ເມັດ

by somchan

ວັນທີ 09 ມັງກອນ 2019 ນີ້ ເຈົ້າໜ້າທີ່ຕຳຫຼວດພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງວຽງຈັນ ໄດ້ແກ້ໄຂເປົ້າໝາຍຄ້າຂາຍຢາເສບຕິດ ຢູ່ຂອບເຂດເມືອງໂພນ ແຂວງວຽງຈັນ ສາມາດຈັບຕົວເປົ້າໝາຍໄດ້ 2 ຄົນ ພ້ອມຂອງກາງຢາບ້າ 40 ມັດ ເທົ່າກັບ 80,000 ເມັດ ຜູ້ຕ້ອງຫາທັງສອງຄົນ ຄື: ທ້າວ ມະເລົ່າ ອາຍຸ 22 ປີ ອາຊີບ ຊາວນາ ຢູ່ບ້ານ ຫ້ວຍສາລາ ເມືອງ ຫ້ວຍຊາຍ ແຂວງ ບໍ່ແກ້ວ ພ້ອມຂອງກາງຢາບ້າ 40 ມັດ ເທົ່າກັບ 80,000 ເມັດ ແລະ ທ້າວ ກົ່ວເລົ່າ ອາຍຸ 43 ປີ ອາຊີບ ຊາວນາ ຢູ່ບ້ານໂພນແຍງ ເມືອງເຟືອງ ແຂວງວຽງຈັນ

ເຈົ້າໜ້າທີ່ໄດ້ແຈ້ງໃຫ້ຮູ້ວ່າ: ໄດ້ຮັບແຈ້ງວ່າຈະມີການລັກລອບຊື້-ຂາຍຢາເສບຕິດ ຢູ່ບ້ານພັກແຫ່ງໜຶ່ງເຂດ ເມືອງໂພນໂຮງ ແຂວງວຽງຈັນ ດັ່ງນັ້ນຈຶ່ງໄດ້ຈັດຕັ້ງກຳລັງພິສູດຂໍ້ມູນ ເຫັນວ່າມີມູນຄວາມຈິງແທ້ ມາຮອດວັນທີ 9 ມັງກອນ ຈຶ່ງໄດ້ນຳກຳລັງວິຊາສະເພາະເຂົ້າມ້າງລາຍຄະດີດັ່ງກ່າວ.

ຜ່ານການສືບສວນ-ສອບສວນຂອງເຈົ້າໜ້າທີ່ຕຳຫຼວດໃນເບື້ອງຕົ້ນ ທ້າວ ກົ່ວເລົ່າ ແລະ ທ້າວ ມະເລົ່າ ໄດ້ໃຫ້ການຮັບສາລະພາບວ່າ: ໃນເດືອນທັນວາ 2018 ທ້າວ ກົ່ວເລົ່າ ໄດ້ລົງມາແຕ່ແຂວງບໍ່ແກ້ວແລ້ວມາເຊົ່າເຮືອນພັກແຫ່ງໜຶ່ງ ຢູ່ຂອບເຂດ ດົງໂດກ (ນະຄອນຫຼວງວຽງຈັນ) ໄດ້ປະມານ 05 ວັນ ຈາກນັ້ນ ໄດ້ໂທລະສັບຕິດຕໍ່ຫາ ທ້າວເຢຍລີ ຢູ່ບ້ານ 46 (ປະເທດມຽນມ່າ) ໂດຍບອກເອົາຢາບ້າມາຂາຍໃຫ້ຜູ້ກ່ຽວ ຢູ່ຂອບເຂດ ບ້ານດົງໂດກ ນະຄອນຫຼວງວຽງຈັນ ຈຳນວນ 40 ມັດ ໃນລາຄາ 01 ມັດ 10,250 ບາດ ສ່ວນເງີນແມ່ນຈະຈ່າຍຕາມຫຼັງ ເມື່ອໄດ້ຢາບ້າແລ້ວ ມາຮອດວັນທີ 09 ມັັງກອນ 2019 ໄດ້ມີທ້າວກົ່ວເລົ່າ ຢູ່ບ້ານ ໂພນແຍງ ເມືອງເຟືອງ ແຂວງວຽງຈັນ ມາຫາຜູ້ກ່ຽວຢູ່ເຮືອນພັກ ຈາກນັ້ນກໍ່ພ້ອມກັນເອົາຢາບ້າຈຳນວນດັ່ງກ່າວ ໄປຂາຍໃຫ້ລູກຄ້າບໍ່ຮູ້ຊື່ ທີ່ລໍຖ້າຢູ່ບ້ານພັກຂອບເຂດ ເມືອງໂພນໂຮງ ແຂວງວຽງຈັນ ຂາຍໃນລາຄາ 01 ມັດ 13,000 ບາດ ເມື່ອໄປຮອດສະຖານທີ່ດັ່ງກ່າວ ຖືກເຈົ້າໜ້າທີ່ຕຳຫຼວດຈັບຕົວ.

ປະຈຸບັນເຈົ້າໜ້າທີ່ຍັງສືບຕໍ່ດຳເນີນການສືບສວນ-ສອບສວນ ພວກກ່ຽວ ເພື່ອຂະຫຍາຍຜົນຫາຜູ້ຮ່ວມຂະບວນການມາລົງໂທດຕາມລະບຽບກົດໝາຍຢ່າງເຂັ້ມງວດ.

Off

Comments are closed.