21st Jan2019

ພິທີວາງສີລາລຶກໂຄງການສ້ອມແປງປັບປຸງ ຫໍພິພີທະພັນ ປະຫວັດສາດກອງທັບປະຊາຊົນລາວ

by somchan

ພິທີວາງສີລາລຶກໂຄງການສ້ອມແປງປັບປຸງຫໍພິພີທະພັນ ປະຫວັດສາດກອງທັບປະຊາຊົນລາວ ໄດ້ຈັດໃນວັນທີ 19 ມັງກອນ ນີ້ ໂດຍການເປັນກຽດເຂົ້າຮ່ວມຂອງ ພົອ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນປະເທດ ສປປ ລາວ ພົອ ໂງຊວນລີກ ກຳມະການກົມການເມືອງສູນກາງພັກ ຄອມມູນິດ ຫວຽດນາມ ລັດຖະມົນຕີກະຊວງປ້ອງກັນປະເທດ ສສ ຫວຽດນາມ ມີຄະນະນຳທັງສອງກະຊວງເຂົ້າຮ່ວມ.

ໂຄງການສ້ອມແປງປັບປຸງ ຫິພິພີທະພັນປະຫວັດສາດ ກອງທັບປະຊາຊົນລາວ ໂດຍແມ່ນທືນຊ່ວຍເຫຼືອລ້າ ຈາກກະຊວງປ້ອງກັນປະເທດ ສສ ຫວຽດນາມ. ໂດຍແມ່ນບໍລິສັດ ລາວີນາໂກ 36 ຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ ມີມູນຄ່າ ສາມສິບຫົກຕື້ກວ່າດົງ, ໂດຍມີໄລຍະການກໍ່ສ້າງ 8 ເດືອນ ຊຶ່ງຈະເລີ່ມແຕ່ເດືອນ ກຸມພາ ຫາເດືອນ ກັນຍາ ປີ 2019. ໃຫ້ກຽດວາງ ສີລາລຶກ ໂດຍແມ່ນ ພົອ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ສປປ ລາວ ແລະ ພົອ ໂງຊວນລີກ ລັດຖະມົນຕີກະຊວງປ້ອງກັນປະເທດ ສສ ຫວຽດນາມ.

ແລະ ໃນວັນດຽວກັນກໍ່ມີພິທີມອບ-ຮັບການຊ່ວຍເຫຼືອ ດ້ານເຕັກນິກການທະຫານລະຫວ່າງ ກະຊວງປ້ອງກັນປະເທດ ແຫ່ງ ສ. ຮັດເຊຍ ແລະ ກະຊວງປ້ອງກັນປະເທດແຫ່ງ ສປປ ລາວ ງວດ2 ເປັນກຽດເຂົ້າຮ່ວມຂອງ ພົອ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ສປປ ລາວ, ມີ ພົຈວ ເຄີຊີມົບສະກີ ອາເລັກຊານເດີ້ ອາເລັກຊານໂດວິດ ຫົວໜ້າກົມໃຫ່ຍຮ່ວມມື ສາກົນ ດ້ານການທະຫານ, ກະຊວງປ້ອງກັັນປະເທດ ແຫ່ງ ສ. ຮັດເຊຍ ແລະ ຄະນະຜູ້ແທນທັງສອງກະຊວງເຂົ້າຮ່ວມ.

ພົຕ ແອສະໄໝ ເລືອງວັນໄຊ ຮອງລັດຖະມົນຕີກະຊວງປ້ອງກັນປະເທດ ສປປ ລາວ ໄດ້ກ່າວວ່າ: ການຊ່ວຍເຫຼືອພາຫະນະ, ອາວຸດແກ່ກອງທັບປະຊາຊົນລາວໃນຄັ້ງນີ້ ສຸດທີ່ມີຄວາມໝາຍສຳຄັນ ເຊິ່ງເປັນການປະກອບສ່ວນສຳຄັນເຂົ້າໃນການສ້າງຄວາມເຂັ້ມແຂງຂອງກອງທັບປະຊາຊົນລາວ, ສະແດງເຖິງຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ ແບບເພືອນມິດ ແລະ ທ່ານຍັງກ່າວຕຶ່ມວ່າ: ຈະນຳໃຊ້ໃຫ້ເກີດປະໂຫຍດສູງສຸດແກ່ການກໍ່ສ້າງກອງທັບໃຫ້ເຂັ້ມແຂງ ແລະ ທັນສະໄໝ. ກ່າວມອບໂດຍ ພົຈວ ເຄີຊີມົບສະກີ່ ອາເລັກຊານເດີ້. ອາເລັກຊານໂດວິດ ຫົວໜ້າກົມໃຫ່ຍຮ່ວມມືສາກົນດ້ານການທະຫານ ກະຊວງປ້ອງກັນປະເທດແຫ່ງ ສ. ຮັດເຊຍ ກ່າວຮັບໂດຍ ພົຕ ແອສະໄໝ ເລືອງວັນໄຊ ຮອງລັດຖະມົນຕີກະຊວງປ້ອງກັນປະເທດ ສປປ ລາວ.

Off

Comments are closed.