20th Feb2019

ສອງບໍລິສັດ ມອບລົດ ແລະ ເຄື່ອງຮັບໃຊ້ຫ້ອງການ ໃຫ້ກະຊວງ ປກສ ມູນຄ່າ 1 ຕື້ກວ່າກີບ

by somchan

ໃນວັນທີ 18 ກຸມພາ 2019, ບໍລິສັດ ທີ່ປຶກສາດ້ານການລົງທຶນ ແລະ ກໍ່ສ້າງເຄື່ອນໄຟຟ້າ ຈໍາກັດ ຜູ້ດຽວ ແລະ ບໍລິສັດ ລັດວິສາຫະກິດລາວ-ເອເຊຍ ໂທລະຄົມ ໄດ້ນໍາເຄື່ອງໃຊ້ຫ້ອງການມາມອບໃຫ້ແກ່ກະຊວງປ້ອງກັນຄວາມສະຫງົບ ລວມມູນຄ່າ 1 ຕື້ກວ່າກີບ ເພື່ອນໍາໃຊ້ເຄື່ອນໄຫວວຽກງານວິສາສະເພາະ ໃຫ້ມີຄວາມສະດວກສະບາຍ, ວອງໄວດີຂຶ້ນກວ່າເກົ່າ.

ໃນນັ້ນ ບໍລິສັດ ທີ່ປຶກສາດ້ານການລົງທຶນ ແລະ ກໍ່ສ້າງເຄື່ອນໄຟຟ້າ ຈໍາກັດຜູ້ດຽວ ໄດ້ນໍາມອບລົດເກັງ ຍີ່ຫໍ້ເກຍ ຈໍານວນ 4 ຄັນ ລວມມູນຄ່າ 184.000 ໂດລາສະຫະລັດ ກ່າວມອບໂດຍທ່ານ ປີສາໄຊ ແກ້ວໄຊຍະຈັກ ປະທານບໍລິສັດ ທີ່ປຶກສາດ້ານການລົງທຶນ ແລະ ກໍ່ສ້າງເຄື່ອນໄຟຟ້າ ຈໍາກັດຜູ້ດຽວ ແລະ ບໍລິສັດ ລັດວິສາຫະກິດລາວ-ເອເຊຍ ໂທລະຄົມ ໄດ້ນໍາຄອມພິວເຕີຕັ້ງໂຕະ 30 ຊຸດ, ຄອມພິວເຕີໂນດບຸກ 13 ໜ່ວຍ, ປິ້ນເຕີ 7 ໜ່ວຍ ແລະ ເຄື່ອງສະແກນເນີ 1 ໜ່ວຍ ລວມມູນຄ່າ 200 ລ້ານກວ່າກີບ ກ່າວມອບໂດຍ ພົຈວ ອຸລະຫາ ທອງວັນທາ ຜູ້ອໍານວຍການໃຫຍ່ ບໍລິສັດ ລັດວິສາຫະກິດ ລາວ-ເອເຊຍ ໂທລະຄົມ. ທັງນີ້, ກໍເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດ ໂດຍສະເພາະແມ່ນການປະກອບສ່ວນຊ່ວຍເຫຼືອກໍາລັງປ້ອງກັນຄວາມສະຫງົບ ປະຊາຊົນລາວ ໃຫ້ມີຄວາມສະດວກສະບາຍ, ວ່ອງໄວທັນກັບສະພາບການໃນການເຄື່ອນໄຫວຈັດຕັ້ງປະຕິບັດໜ້າທີ່ວຽກງານວິຊາສະເພາະ ໃຫ້ຮັບປະກັນຄວາມສະຫງົບສຸກດ້ານການເມືອງ ແລະ ຄວາມເປັນລະບຽບຮຽບຮ້ອຍຂອງສັງຄົມ.

ກ່າວຮັບໂດຍ ພົທ ວິໄລ ຫຼ້າຄໍາຟອງ ເລຂາທິການສູນກາງພັກ, ລັດຖະມົນຕີກະຊວງປ້ອງກັນຄວາມສະຫງົບ ເຊິ່ງທ່ານໄດ້ສະແດງຄວາມຂອບໃຈ ແລະ ຮູ້ບຸນຄຸນຕໍ່ທັງສອງບໍລິສັດ ທີ່ເຫັນໄດ້ຄວາມສໍາຄັນຂອງການເຄື່ອນໄຫວວຽກງານກໍາລັງປ້ອງກັນຄວາມສະຫງົບ ແລະ ຈະນໍາເອົາເຄື່ອງຈໍານວນດັ່ງກ່າວໃຊ້ເຂົ້າໃນການເຄື່ອນໄຫວຈັດຕັ້ງປະຕິບັດໜ້າທີ່ວຽກງານວິຊາສະເພາະຂອງກໍາລັງປ້ອງກັນຄວາມສະຫງົບ ໃຫ້ເກີດຜົນປະໂຫຍດສູງສຸດ.

ໂອກາດດຽວກັນນີ້, ທ່ານລັດຖະມົນຕີ ກະຊວງ ປກສ ຍັງໄດ້ມອບໃບຊົມເຊີຍໃຫ້ທັງສອງບໍລິສັດ ພ້ອມທັງກ່າວສະແດງຄວາມຂອບໃຈ ແລະ ອວຍພອນໄຊໃຫ້ບັນດາທ່ານທີ່ນໍາເຄື່ອງມາມອບໃນຄັ້ງນີ້ ຕະຫຼອດຮອດພະນັກງານພາຍໃນບໍລິສັດດັ່ງກ່າວ ຈົ່ງປະສົບຜົນສໍາເລັດທຸກໜ້າທີ່ວຽກງານ, ມີຄວາມພາສຸກໃນຊີວິດສ່ວນຕົວ, ຄອບຄົວ ແລະ ການດໍາເນີນທຸລະກິດກໍໃຫ້ມີຄວາມຈະເລີນກ້າວໜ້າດີຂຶ້ນເລື້ອຍໆ.

Off

Comments are closed.