27th Mar2019

ກະຊວງປ້ອງກັນຄວາມສະຫງົບ ລາວ ສຳເລັດການຢ້ຽມຢາມແລະເຮັດວຽກຢູ່ ສາທານະລັດສະຫະພາບມຽນມາ

by somchan

 

ໂດຍຕອບສະໜອງຕາມການເຊື້ອເຊີນຂອງ ທ່ານ ພົນໂທ ຈໍ ສະເວ  ລັດຖະມົນຕີກະຊວງພາຍໃນແຫ່ງ ສາທາລະນະລັດສະຫະພາບມຽນມາ, ຄະນະນຳຂັ້ນສູງກະຊວງປ້ອງກັນຄວາມສະຫງົບ ສາທາລະນະລັດ ປະຊາທິປະໄຕ ປະຊາຊົນລາວ ນຳໂດຍທ່ານ ພົນໂທ ວິໄລ ຫຼ້າຄໍາຟອງ ລັດຖະມົນຕີກະຊວງປ້ອງກັນຄວາມສະຫງົບ, ສປປ ລາວ ພ້ອມດ້ວຍຄະນະ ໄດ້ເດີນທາງເຄື່ອນໄຫວຢ້ຽມຢາມ  ແລະເຮັດວຽກຢ່າງເປັນທາງການ ຢູ່ ສສ ມຽນມາ ເຊິ່ງພິທີຕ້ອນຮັບ ໄດ້ຈັດຂຶ້ນໃນຕອນບ່າຍວັນທີ 25 ມີນາ 2019 ຢູ່ທີ່ກະຊວງພາຍໃນ ສສ ມຽນມາ ໂດຍການໃຫ້ກຽດຕ້ອນຮັບຢ່າງອົບອຸ່ນຂອງທ່ານ ພົນໂທ ຈໍ ສະເວ ລັດຖະມົນຕີກະຊວງພາຍໃນ ສສ ມຽນມາ ພ້ອມດ້ວຍຄະນະ.

ການເຄື່ອນໄຫວສັນທະວະໄມຕີ ສສ ມຽນມາ ຂອງຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບ ສປປ ລາວ ໃນຄັ້ງນີ້ ເພື່ອເປັນການສືບຕໍ່ເສີມຂະຫຍາຍສາຍພົວພັນຮ່ວມມື ແລະ ຄວາມສາມັກຄີລະຫວ່າງ ສປປ ລາວ ແລະ ສສ ມຽນມາ ເວົ້າລວມ, ເວົ້າສະເພາະກໍ່ຄືກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງພາຍໃນ ສສ ມຽນມາ ໃຫ້ນັບມື້ແໜ້ນແຟ້ນ, ເລິກເຊິ່ງ ແລະ ເກີດດອກອອກຜົນຍິ່ງໆຂຶ້ນ, ພ້ອມກັນນັ້ນ, ກໍ່ເພື່ອເຂົ້າຮ່ວມກອງປະຊຸມສະຫຼຸບທອດຖອນບົດຮຽນ ແລະ ທົບທວນຄືນບົດບັນທຶກການຮ່ວມມືສອງຝ່າຍ ທີ່ໄດ້ຮ່ວມກັນລົງນາມ ໃນໄລຍະຜ່ານມາ, ເຊິ່ງ ຄະນະຜູ້ແທນທັງສອງຝ່າຍໄດ້ພ້ອມກັນຕີລາຄາສະພາບການຂອງໂລກ ແລະ ພາກພື້ນທີ່ມີການຜັນແປໄປຢ່າງສະຫຼັບຊັບຊ້ອນ ມີທັງກາລະໂອກາດ ແລະ ສິ່ງທ້າທາຍຫຼາຍຢ່າງ ຕໍ່ລາວ ແລະ ມຽນມາ ແຕ່ເຖິງຢ່າງໃດກໍ່ຕາມ ກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງພາຍໃນ ສສ ມຽນມາ ກໍ່ນັບມື້ນັບເພີ່ມທະວີການພົວພັນຮ່ວມມືໃຫ້ແໜ້ນແຟ້ນເລິກເຊິ່ງຂຶ້ນກວ່າເກົ່າ ແລະ ພ້ອມກັນປະຕິບັດຕາມບົດບັນທຶກການຮ່ວມມືສອງຝ່າຍໃນຄັ້ງທີ່ຜ່ານໄດ້ຕາມລະດັບຄາດໝາຍ.

ໃນກອງປະຊຸມຄັ້ງນີ້ທັງສອງຝ່າຍໄດ້ເປັນເອກພະພາບກັນ ສືບຕໍ່ຮ່ວມມືໃນຫຼາຍຂົງເຂດປ້ອງກັນຄວາມສະຫງົບເຊັ່ນ: ການຮ່ວມມືຮັກສາຄວາມສະຫງົບ ແລະ ສະເຖຍລະພາບຂອງສອງປະເທດ, ການຮ່ວມມືແລກປ່ຽນຂໍ້ມູນຂ່າວສານ, ການສົ່ງເສີມກົນໄກຂອງຫ້ອງການປະສານງານຊາຍແດນ, ການຮ່ວມມືສະກັດກັ້ນ ແລະ ຕ້ານຢາເສບຕິດ, ການຮ່ວມມືຕ້ານການຄ້າມະນຸດ, ການຮ່ວມມືສະກັດກັ້ນອາຊະຍາກຳຂ້າມຊາຍແດນໃນຮູບແບບ, ການຮ່ວມມືໃນການຄວບຄຸມການເຂົ້າ-ອອກເມືອງຜິດກົດໝາຍ ແລະ ການຮ່ວມມືຄວບຄຸມແຮງງານເຂົ້າເມືອງຜິດກົດໝາຍ.

ໃນກອງປະຊຸມກໍ່ໄດ້ມີການລົງນາມບົດບັນທຶກວ່າດ້ວຍການຮ່ວມມືສອງຝ່າຍ ຄັ້ງທີ 8 ລະຫວ່າງ ກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງພາຍໃນ ສສ ມຽນມາ ຝ່າຍກະຊວງປ້ອງກັນຄວາມສະຫງົບ ສປປ ລາວ ລົງນາມໂດຍ ທ່ານ ພົນໂທ ວິໄລ ຫຼ້າຄໍາຟອງ ລັດຖະມົນຕີ ກະຊວງປ້ອງກັນຄວາມສະຫງົບ ສປປ ລາວ     ຝ່າຍກະຊວງພາຍໃນ ສສ ມຽນມາ ລົງນາມໂດຍທ່ານ ພົນໂທ ຈໍ ສະເວ ລັດຖະມົນຕີກະຊວງພາຍໃນ ສສ ມຽນມາ.

ພາຍຫຼັງສໍາເລັດກອງປະຊຸມ, ຄະນະນໍາກະຊວງປ້ອງກັນຄວາມສະຫງົບ ສປປ ລາວ ພ້ອມດ້ວຍ ທ່ານ ສົມໄພ ວົງມະຫາຈັກ ອຸປະທູດ ສປປ ລາວ ປະຈຳ ສສ ມຽນມາ ໄດ້ເຂົ້າຢ້ຽມຂໍານັບ ທ່ານ ອູ ວິນ ມິ່ນ ປະທານປະເທດ ສສ ມຽນມາ

ໂອກາດດັ່ງກ່າວ ທ່ານ ພົນໂທ ວິໄລ ຫຼ້າຄໍາຟອງ ລັດຖະມົນຕີກະຊວງປ້ອງກັນຄວາມສະຫງົບ ສປປ ລາວ ໄດ້ຕາງໜ້າຄະນະ ນຳເອົາຄວາມຢື້ຢາມຖາມຂ່າວ ຄວາມຮັກແພງສາມັກຄີຈາກການນຳພັກ-ລັດ ສປປ ລາວ ມາເຖິງທ່ານປະທານປະເທດ ແຫ່ງ ສສ ມຽນມາພ້ອມດ້ວຍການນຳພັກ-ລັດ ແລະ ປະຊົນຊົນມຽນມາ ພ້ອມທັງລາຍງານຈຸດປະສົງ ໃນການເດີນທາງເຄື່ອນໄຫວຢ້ຽມຢາມ ສສ ມຽນມາ ໃຫ້ທ່ານປະທານປະເທດ ໄດ້ຮັບຊາບ. ຈາກນັ້ນ, ທ່ານ ອູ ວິນ ມິ່ນ ກໍ່ໄດ້ສະແດງຄວາມຕ້ອນຮັບ ແລະ ຊົມເຊີຍຕໍ່ຄະນະນຳກະຊວງປ້ອງກັນຄວາມສະຫງົບ ສປປ ລາວ ທີ່ໄດ້ມາຢ້ຽມຢຽມ ແລະ ເຮັດວຽກຢູ່ ສສ ມຽນມາ ເວົ້າສະເພາະກໍ່ແມ່ນການເຮັດວຽກຮ່ວມກັບກະຊວງພາຍໃນ, ທ່ານປະທານປະເທດ ສສ ມຽນ ຍັງໄດ້ເນັ້ນໜັກໃຫ້ສອງກະຊວງສືບຕໍ່ເສີມຂະຫຍາຍສາຍພົວພັນຮ່ວມມືທີ່ດີ ລະຫວ່າງລາວ-ມຽນມາໃຫ້ໝັ້ນຄົງທະນົງແກ່ນ ສືບຕໍ່ໃຫ້ການຊ່ວຍເຫຼືອເຊິ່ງກັນ ແລະ ກັນໃຫ້ເລິກເຊິ່ງກວ້າງຂວາງຂຶ້ນເພື່ອພັດທະນາສອງກຳລັງໃຫ້ເຕີບໃຫຍ່ເຂັ້ມແຂງຮັບປະກັນໃຫ້ສອງປະເທດລາວ-ມຽນມາມີຄວາມສະຫງົບປອດໄພ ປະຊາຊົນສອງຊາດໄປມາຫາສູ່ກັນຢ່າງສະດວກສະບາຍ ສ້າງຄວາມເຂັ້ມແຂງໃນການປົກປັກຮັກສາ ແລະ ພັດທະນາປະເທດຊາດໃຫ້ຈະເລີນຮຸ່ງເຮືອງ.

 

 

 

ພາບ ແລະ ຂ່າວ: ຮອ ຄຳແສງ ປັນຍາ

Off

Comments are closed.