22nd May2019

ຕມ ລາວ-ຫວຽດນາມ ແລກປ່ຽນບົດຮຽນວຽກງານວິຊາສະເພາະ

by somchan

ກອງປະຊຸມພົບປະແລກປ່ຽນບົດຮຽນວຽກງານຄຸ້ມຄອງການເຂົ້າ-ອອກເມືອງລະຫວ່າງ ກົມຕຳຫຼວດກວດຄົນເຂົ້າ-ອອກເມືອງ ກົມໃຫ່ຍສັນຕິບານ ກະຊວງປ້ອງກັນຄວາມສະຫງົບລາວ ກັບກົມຄຸ້ມຄອງການເຂົ້າ-ອອກເມືອງ ກະຊວງຕຳຫຼວດຫວຽດນາມ ໄດ້ຈັດຂື້ນໃນວັນທີ 21 ພຶດສະພາ 2019 ນີ້ ຢູ່ທີ່ຫ້ອງປະຊຸມກະຊວງປ້ອງກັນຄວາມສະຫງົບ

ພາຍໃຕ້ການເປັນປະທານຮ່ວມຂອງ ພັນເອກ ສາຍສະໝິງ ສີວິໄລ ຫົວໜ້າກົມຕຳຫຼວດກວດຄົນເຂົ້າ-ອອກເມືອງ ກົມໃຫ່ຍສັນຕິບານ ກະຊວງປ້ອງກັນຄວາມສະຫງົບລາວ ພັນເອກ ເຈິນ ກວາງຕາມ ຫົວໜ້າກົມຄຸ້ມຄອງການເຂົ້າ-ອອກເມືອງ ກະຊວງຕຳຫຼວດຫວຽດນາມ ມີບັນດາຄະນະພັກ, ຄະນະບັນຊາຜູ້ແທນທັງສອງຝ່າຍເຂົ້າຮ່ວມ.

ຄະນະຜູ້ແທນທັງສອງຝ່າຍໄດ້ລາຍງານກ່ຽວກັບສະພາບການທີ່ພົ້ນເດັ່ນ, ກົນອຸບາຍຂອງສັດຕູ ແລະ ກຸ່ມຄົນບໍ່ດີທີ່ສວຍໃຊ້ການເຂົ້າ-ອອກເມືອງເພື່ອກໍ່ຄວາມບໍ່ສະຫງົບຢູ່ສອງປະເທດລາວ-ຫວຽດນາມ ໃນໄລຍະທີ່ຜ່ານມາ ພ້ອມທັງປຶກສາຫາລືແລກປ່ຽນຂໍ້ມູນຂ່າວສານກ່ຽວກັບການເຄື່ອນໄຫວລະເມີດກົດໝາຍຂອງພົນລະເມືອງສອງຝ່າຍ ເປັນຕົ້ນການແຕ່ງດອງບໍ່ຖືກຕ້ອງ, ການໄດ້ສຳມະໂນຄົວແບບບໍ່ຖືກຕ້ອງ, ການລີ້ຊ່ອນປະກອບອາຊີບ ແລະ ເຄື່ອນໄຫວຜິດລະບຽບການຕ່າງໆ. ນອກນີ້ຍັງໄດ້ປະສານສົມທົບແລກປ່ຽນຂໍ້ມູນຂ່າວສານໃນຂົງເຂດກວດກາການເຂົ້າ-ອອກເມືອງ ແລະ ຄຸ້ມຄອງຄົນຕ່າງປະເທດ, ຊ່ວຍເຫຼືອກັນໃນການຊອກຈັບ, ຕິດຕາມກວດກາເປົ້າໝາຍ ແລະ ອື່ນໆ. ເພື່ອແນ່ໃສ່ໃຫ້ພະນັກງານກວດຄົນເຂົ້າ-ອອກເມືອງທັງສອງປະເທດລາວ-ຫວຽດນາມຢູ່ດ່ານຊາຍແດນ ເພີ່ມທະວີຄວາມເປັນເຈົ້າການ, ປະສານສົມທົບປະຕິບັດໜ້າທີ່ວິຊາສະເພາະໃຫ້ຖືກຕ້ອງ, ຄ່ອງຕົວ ແລະ ຮັດກຸມ, ຜັນຂະຫຍາຍເນື້ອໃນແຜນການຮ່ວມມືຮັກສາຄວາມສະຫງົບຂອງສອງກະຊວງ ກໍ່ຄືສອງພັກສອງລັດລາວ-ຫວຽດນາມໃຫ້ແໜ້ນແຟ້ນ ແລະ ຍົກສູງປະສິດທິພາບວຽກງານກວດກາຄົນເຂົ້າ-ອອກເມືອງໃຫ້ມີປະສິດທິຜົນ.

ພັນເອກ ສາຍສະໝິງ ສີວິໄລ ຫົວໜ້າກົມຕຳຫຼວດກວດຄົນເຂົ້າ-ອອກເມືອງ ກົມໃຫ່ຍສັນຕິບານ ກະຊວງປ້ອງກັນຄວາມສະຫງົບ ໄດ້ມີຄຳເຫັນຕໍ່ການພົບປະໃນຄັ້ງນີ້ວ່າ ການພົບປະແລກປ່ຽນບົດຮຽນວຽກງານຄຸ້ມຄອງການເຂົ້າ-ອອກເມືອງລະຫວ່າງສອງກົມ, ສອງຄະນະຜູ້ແທນໃນຄັ້ງນີ້ເປັນຄັ້ງທີ່ 4 ເຊິ່ງເປັນການຢັ້ງຢືນເຖິງການຮ່ວມມືກັນຢ່າງຊະໜິດແໜ້ນ ແລະ ບົນພື້ນຖານການຈັດຕັ້ງຜັນຂະຫຍາຍ ສັນຍາວ່າດ້ວຍການເດີນທາງຂ້າມແດນ ທີ່ໄດ້ລົງນາມຮ່ວມກັນໃຫ້ປະກົດຜົນເປັນຈິງ ເພື່ອສ້າງເງື່ອນໄຂອຳນວຍຄວາມສະດວກໃຫ້ປະຊາຊົນທັງສອງປະເທດລາວ-ຫວຽດນາມ, ປະເທດທີ່ສາມໄດ້ໄປມາຫາສູ່ກັນມີຄວາມສະດວກສະບາຍໃນທຸກດ້ານ, ທັງເປັນການປະກອບສ່ວນເຂົ້າໃນພາລະກິດປົກປັກຮັກສາຄວາມໜັ້ນຄົງຄວາມເປັນລະບຽບຮຽບຮ້ອຍຕາມດ່ານຊາຍແດນ ແລະ ເຮັດໃຫ້ການສ້າງສາພັດທະນາເສດຖະກິດ-ສັງຄົມຂອງສອງປະເທດໃຫ້ນັບມື້ດີຂື້ນ ແລະ ມີຄວາມຍືນຍົງໄປເລື່ອຍໆ.

Off

Comments are closed.