23rd May2019

ລັດຖະມົນຕີ ກະຊວງປ້ອງກັນຄວາມສະຫງົບ ລົງຊີ້ນຳວຽກງານ ຢູ່ ກອງບັນຊາການ ປກສ ແຂວງ ໄຊຍະບູລີ

by somchan

 ວັນທີ 22 ພຶດສາພາ 2019 ນີ້, ພົນໂທ ວິໄລ ຫຼ້າຄໍາຟອງ ລັດຖະມົນຕີ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ຊີ້ນຳວຽກງານ ຢູ່ ກອງບັນຊາການ ປກສ ແຂວງໄຊຍະບູລີ ມີບັນດາສະຫາຍຄະນະພັກ – ຄະນະບັນຊາ, ພະນັກງານຫຼັກແຫຼ່ງຈາກບັນດາຫ້ອງ, ກອງບັນຊາການ ປກສ ເມືອງ ເຂົ້າຮ່ວມ.

ພັອ ຄໍາແພງ ເພັດ ຫົວໜ້າກອງບັນຊາການ ປກສ ແຂວງ ໄດ້ລາຍງານໂດຍຫຍໍ້ກ່ຽວກັບສະພາບການ ທີ່ພົວພັນເຖິງຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍທາງດ້ານສັງຄົມ; ບັນຫາປະກົດການຫຍໍ້ທໍ້ຕາງໆທີ່ເກີດຂື້ນຢູ່ພາຍໃນແຂວງ ເປັນຕົ້ນແມ່ນ: ບັນຫາຢາເສບຕິດ, ອຸບັດຕິເຫດຕາມທ້ອງຖະໜົນ ແລະ ບັນຫາອາຊະຍະກໍາປະເພດຕ່າງໆ ເຊິ່ງຜ່ານມາ ກຳລັງປ້ອງກັນຄວາມສະຫງົບ ປກສ ແຂວງ ໄຊຍະບູລີ ໄດ້ສົມທົບອໍານາດການປົກຄອງທຸກຂັ້ນທີ່ກ່ຽວຂ້ອງດໍາເນີນການແກ້ໄຂຢ່າງທັນການ; ຄຽງຄູ່ກັນນີ້, ບັນດາແຜນງານ, ວຽກງານຍຸດທະສາດ ທີ່ກະຊວງປ້ອງກັນຄວາມສະຫງົບວາງອອກ; ຄະນະພັກ – ຄະນະບັນຊາ ແຕ່ລະຂັ້ນກໍ່ໄດ້ນໍາພາຈັດຕັ້ງຄົ້ນຄວ້າເຊື່ອມຊືມ ແລະ ຜັນຂະຫຍາຍເຂົ້າສູ່ລວງເລິກແຕ່ລະຂົງເຂດວຽກງານວິຊາສະເພາະ, ພ້ອມກັນຈັດຕັ້ງປະຕິບັດມີຜົນສໍາເລັດເປັນກ້າວໆ, ອັນໄດ້ປະກອບສ່ວນເຮັດໃຫ້ສະພາບໂດຍລວມໃນທົ່ວແຂວງ ມີສະຖຽນລະພາບທາງດ້ານການເມືອງຢ່າງໜັກແໜ້ນ;  ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານເຮັດໃຫ້ປະຊາຊົນບັນດາເຜົ່າມີຄວາມອຸ່ນອ່ຽງທຸ່ນທ່ຽງໃນການທໍາມາຫາກິນ.

ໂອກາດນີ້, ທ່ານລັດຖະມົນຕີ ກະຊວງປ້ອງກັນຄວາມສະຫງົບ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຍາດມາໄດ້; ພ້ອມທັງໃຫ້ກຽດໂອ້ລົມ ແລະ ໃຫ້ທິດຊີ້ນໍາ, ເນັ້ນໜັກບັນດາສະຫາຍ ຄະນະພັກ – ຄະນະບັນຊາແຕ່ລະຂັ້ນ, ພະນັກງານຫຼັກແຫຼ່ງ ຈົ່ງເພີ່ມທະວີສຶກສາອົບຮົມພະນັກງານ – ນັກຮົບໃນທົ່ວກໍາລັງ ໃຫ້ມີຄວາມໜັກແໜ້ນທາງດ້ານການເມືອງ – ແນວຄິດ,  ເຂັ້ມແຂງທາງດ້ານການຈັດຕັ້ງ, ມີລະບຽບວິໄນເຂັ້ມງວດ, ມີຄວາມຮັບຜິດຊອບສູງຕໍ່ໜ້າທີ່ວຽກງານ, ຍົກສູງນໍ້າໃຈເດັດດ່ຽວ, ສ້າງສະຕິກຽມພ້ອມເຮັດສໍາເລັດໜ້າທີ່; ພ້ອມທັງສຸມໃສ່ ຕ້ານ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ທີ່ອາດຈະເກີດຂື້ນຢູ່ໃນສັງຄົມ ຢ່າງຮີບດ່ວນ ແລະ ທັນເຫດການ; ຄົ້ນຄວ້າທຸກເງື່ອນໄຂທ່າແຮງບົ່ມຊ້ອນ ປະກອບສ່ວນເຂົ້າໃນການ ພັດທະນາກົມກອງ ແລະ ຊຸກຍູ້, ສົ່ງເສີມການຜະລິດເສດຖະກິດ ເພື່ອຕອບສະໜອງຊີວິດການເປັນຢູ່ໃນທົ່ວກໍາລັງໃຫ້ດີຂື້ນເປັນກ້າວໆ; ຕັ້ງໜ້າປັບປຸງກໍ່ສ້າງພັກ – ກໍ່ສ້າງພະນັກງານໃຫ້ປອດໃສ, ເຂັ້ມແຂງ, ໜັກແໜ້ນ ແລະ ສືບຕໍ່ຫັນເອົາພະນັກງານລົງກໍ່ສ້າງຮາກຖານການເມືອງ ສະໜິດຕິດພັນກັບຮາກຖານ ປະຊາຊົນ ຢູ່ບັນດາທ້ອງຖິ່ນ, ເຂດຈຸດສຸມ, ຫ່າງໄກສອກຫຼີກ ເພື່ອນໍາພາອໍານາດການປົກຄອງ ແລະ ປະຊາຊົນບັນດາເຜົ່າ ຈັດຕັ້ງປະຕິບັດວຽກງານປ້ອງກັນຄວາມສະຫງົບໃຫ້ໜັກແໜ້ນ, ເຂັ້ມແຂງ; ເຮັດໃຫ້ຄອບຄົວ ແລະ ຮາກຖານບ້ານ ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍເທື່ອລະກ້າວ.

Off

Comments are closed.