21st Jun2019

ໃຊ້ມີດຄາດຕະກຳຄົນຮັກ ເສຍຊີວິດຄ່າໂຮງແຮມ.

by somchan

ເກີດເຫດ ຊາຍໄວລຸ້ນ ອາຍຸ 29 ປີ  ນໍາໄປງໍ້ຄົນຮັກ ທີ່ເຮັດວຽກຢູ່ໂຮງແຮມແຫ່ງໜຶ່ງ ບ້ານຊຽງໄຈ ເມືອງສິງ ແຂວງຫຼວງນໍ້າທາ ແຕ່ຄົນຮັກປະຕິເສດບໍ່ລົມນໍາ ຈຶ່ງຢັນປະຕູຫ້ອງເຂົ້າໄປ ໃຊ້ມິດແທງຄໍ ຄົນຮັກຫຼາຍເທື່ອ ຈົນເສຍຊິວິດຄ່າທີ່ ແລ້ວເອົາຕົວຫຼົບໜີ.

ກອງບັນຊາການ ປກສ ເມືອງສິງ ໃຫ້ຮູ້ວ່າ: ໃນເວລາ 13:55 ໂມງ ຂອງວັນທີ 19 ມິຖຸນາ 2019 ເຊິ່ງຜູ້ເສຍຊິວິດ ຊື່ ນາງ ອາແລັງ ອາຍຸ 29 ປີ ຢູ່ບ້ານຊຽງຍືນ ເມືອງສິງ ແຂວງຫຼວງນໍ້າທາ ເປັນພະນັກງານ ຢູ່ໂຮງແຮມຫຼັງດັ່ງກ່າວ.  ສ່ວນຜູ້ກໍ່ເຫດ ແມ່ນຄົນຮັກຂອງຜູ້ເສຍຊີວິດ ຊື່ ທ້າວ ພອນສະຫວັນ ຫຼື ຍາຕູ່ ອາຍຸ 29 ປີ ຢູ່ບ້ານປ່າທວາຍ ເມືອງສິງ ແຂວງຫຼວງນໍ້າທາ.  ພາຍຫຼັງກໍ່ເຫດ ທ້າວ ພອນສະຫວັນ  ໄດ້ເອົາຕົວຫຼົບໜີ ວັນຕໍ່ມາ (ວັນທີ20 ມິຖຸນາ 2019 ) ຈຶ່ງຖືກເຈົ້າໜ້າທີ່ຈັບຕົວໄດ້.

ຄະດີດັ່ງກ່າວ, ເບື້້ອງຕົ້ນ ແມ່ນໄດ້ຮັບການລາຍງານຈາກ ພະນັກງານຢູ່ໂຮງແຮມຫຼັງດັ່ງກ່າວວ່າ: ມີເຫດການຄາດຕະກໍາຢູ່ໂຮງແຮງແຫ່ງໜຶ່ງ ເຂດບ້ານຊຽງໄຈ ເມືອງສິງ. ຈາກນັ້ນ, ຈຶ່ງໄດ້ຈັດກໍາລັງຕໍາຫຼວດ ສືບສວນ-ສອບສວນ ປະສານສົມທົບກັບພາກສ່ວນທີ່ກ່ຽວຂ້ອງ ໄປກວດກາສະຖານທີ່ເກີດເຫດ. ຜ່ານການສັນນະສູດສະຖານທີ່ເກີດເຫດ ເຫັນ ນາງ ອາແລັງ ເສຍຊິວິດ ຢູ່ໃນສະພາບນອນຫງາຍ ມີເລືອດໄຫຼອອກບໍລິເວນກວ້າງພາຍໃນຫ້ອງ, ມີບາດແຜຖືກແທງດ້ວຍຂອງມີຄົມເຂົ້າທີ່ຄໍ ຍາວປະມານ 8 ຊັງຕີແມັດ, ຢູ່ກ້ອງນົມເບື້ອງຊ້າຍ 1 ຈຸດ ແລະ ດ້ານຫຼັງ 2 ຈຸດ. ສອບຖາມເພື່ອນຮ່ວມງານຂອງຜູ້ເສຍຊີວິດ ຮູ້ວ່າ ຜູ້ກໍ່ເຫດ ຄົນຮັກ ຂອງຜູ້ຕາຍ ທີ່ນໍາມາງໍ້ ແຕ່ຜູ້ຕາຍບໍ່ຍອມເວົ້ານໍາ ເຮັດໃຫ້ມີເຫດການຄາດຕະກໍາໃນຄັ້ງນີ້.

ເຈົ້າໜ້າທີ່ ພະແນກຕໍາຫຼວດ ປກສ ເມືອງສິງ ໃຫ້ຮູ້ວ່າ: ທ້າວ ພອນສະຫວັນ ແລະ ຜູ້ເສຍຊິວິດ ແມ່ນໄດ້ພົວພັນກັນແບບບ່າວສາວ ມາໄດ້ປີກວ່າແລ້ວ ແຕ່ທາງຄອບຄົວຂອງ ນາງ ອາແລັງ ບໍ່ໃຫ້ຄົບຫາກັນ  ເນື່ອງຈາກ ທ້າວ ພອນສະຫວັນ  ມັກດື່ມເຫຼົາເບຍເປັນປະຈໍາ ແລະ ມີການຫຶງຫວງ ແລະ ຜິດຖຽງກັນເປັນປະຈໍາ.  ດັ່ງນັ້ນ ນາງ ອາແລັງ ຈຶ່ງຕີຕົວຫ່າງເຫີນ. ໃນມື້ເກີດເຫດ  ທ້າວ ພອນສະສະຫວັນ ໄດ້ຂີ່ລົດຈັກ ໄປງໍ້ຜູ້ເສຍຊີວິດ ຢູ່ໂຮງແຮມຫຼັງດັ່ງກ່າວ.   ເມື່ອ ທ້າວ ພອນສະຫວັນ ໄປຮອດ  ນາງ ອາແລັງ ບໍ່ລົມນໍາ ໄດ້ເຂົ້າໄປຫ້ອງນອນແລ້ວລັອກປະຕູ ແຕ່ ທ້າວ ພອນສະຫວັນ ໄດ້ ຢັນປະຕູເຂົ້າໄປຫ້ອງ ແລ້ວໃຊ້ມີດແທງທີ່ຢູ່ບໍລິເວນຄໍ ແລະ ຕາມຕົນໂຕຈົນເສຍເສຍຊີວິດ ແລ້ວເອົາຕົວຫຼົບໜີ. ແຕ່ເຈົ້າໜ້າທີ່ສາມາດຕິດຕາມຕົວຜູ້ກໍ່ເຫດໄດ້ ໃນເວລາ 10 ຂອງວັນທີ 20 ມິຖຸນາ ຢູ່ເຮືອນຂອງຜູ້ກ່ຽວ ໄປດໍາເນີນຄະດີຕາມກົດໝາຍ.

Off

Comments are closed.