04th Jul2019

ກອງປະຊຸມຄົບຄະນະບໍລິຫານງານພັກ ກົມໃຫຍ່ການເມືອງ ປກສ ຄັ້ງທີ 8 ສະໄໝທີ 5

by somchan

ກົມໃຫ່ຍການເມືອງປ້ອງກັນຄວາມສະຫງົບ, ຈັດກອງປະຊຸມຄົບຄະນະບໍລິຫານງານພັກ ຄັ້ງທີ 8 ສະໄໝທີ 5 ໃນວັນທີ 4 ກໍລະກົດ ນີ້ ພາຍໃຕ້ການເປັນປະທານຂອງ ພົນຕີ ວັນທອງ ກອງມະນີ, ຄະນະປະຈຳພັກກະຊວງ, ເລຂາຄະນະພັກກົມໃຫ່ຍ, ຫົວໜ້າກົມໃຫ່ຍການເມືອງປ້ອງກັນຄວາມສະຫງົບ, ມີຮອງເລຂາຄະນະພັກ, ຄະນະປະຈຳພັກ ແລະ ຄະນະພັກກົມໃຫ່ຍການເມືອງປ້ອງກັນຄວາມສະຫງົບເຂົ້າຮ່ວມ.

ໃນກອງປະຊຸມ ພົນຈັດຕະວາ ອຸ່ນຫຼ້າ ວົງພະຈັນ ຮອງເລຂາຄະນະພັກ, ຮອງຫົວໜ້າກົມໃຫ່ຍການເມືອງປ້ອງກັນຄວາມສະຫງົບ ໄດ້ຜ່ານບົດສະຫຼຸບຕີລາຄາການເຄື່ອນໄຫວການຊີ້ນຳ-ນຳພາຂອງອົງຄະນະພັກກົມໃຫ່ຍການເມືອງປ້ອງກັນຄວາມສະຫງົບໃນ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2019 ຊຶ່ງທ່ານໄດ້ກ່າວວ່າ ໄລຍະ 6 ເດືອນຜ່ານມາ ໂດຍຈັດຕັ້ງປະຕິບັດຕາມພາລະບົດບາດ, ຂອບເຂດສິດໜ້າທີ່ຄວາມຮັບຜິດຊອບຂອງຕົນ ອົງຄະນະພັກກົມໃຫ່ຍການເມືອງປ້ອງກັນຄວາມສະຫງົບແມ່ນສ້າງໄດ້ຜົນງານໄດ້ຫຼາຍດ້ານ ເປັນຕົ້ນວຽກງານນຳພາສຶກສາອົບຮົມການເມືອງ-ແນວຄິດ, ວຽກງານປັບປຸງພັກ ແລະ ອົງການມະຫາຊົນ, ວຽກງານນຳພາປ້ອງກັນພາຍໃນພັກ, ວຽກງານວິຊາສະເພາະ ແລະ ວຽກງານສຳຄັນອື່ນໆ ເຊິ່ງສະແດງອອກຄະນະພັກກົມໃຫ່ຍການເມືອງປ້ອງກັນຄວາມສະຫງົບ ໄດ້ຖືເອົາຄວາມສຳຄັນເອົາໃຈໃສ່ຕໍ່ການປັບປຸງພັກທາງດ້ານການເມືອງ-ແນວຄິດການຈັດຕັ້ງ ແລະ ແບບແຜນນຳພາໂດຍຍຶດໜັ້ນລັດທິມາກ-ເລນິນ, ເຮັດວຽກມີແຜນການນຳພາເປັນໝູ່ຄະນະ, ບຸກຄົນຮັບຜິດຊອບ, ປະຕິບັດຕາມຫຼັກການລວມສູນປະຊາທິປະໄຕ, ຮັກສາໄດ້ລະບອບຮ່ວມຊີວິດ ເສຍເງີນບຳລຸງພັກ ປະຕິວັດລະບອບປະຊຸມຄະນະພັກປະຈຳເດືອນ, ໄຕມາດ ແລະ 6 ເດືອນ ໃນນີ້ໄດ້ສະເໜີມະຫາຊົນຜູ້ທີ່ມີຄວາມກ້າວໜ້າເຂົ້າຮຽນສະໜັບສະໜູນ ແລະ ຮຽນກົດລະບຽບພັກໄດ້ 88 ສະຫາຍ, ຍິງ 26 ສະຫາຍ, ຂະຫຍາຍເຂົ້າເປັນສະມາຊິກພັກສຳຮອງໄດ້ 22 ສະຫາຍ,ເລື່ອນສຳຮອງຂື້ນສົມບູນ 9 ສະຫາຍ ແລະ ໄດ້ປັບປຸງການຈັດຕັ້ງຂອງບາງໜ່ວຍພັກຮາກຖານ ເພື່ອໃຫ້ຖືກຕ້ອງຕາມກົດລະບຽບພັກສະໄໝທີ 10 ເພື່ອກະກຽມດຳເນີນກອງປະຊຸມໃຫ່ຍພັກແຕ່ລະຂັ້ນ ແລະ ການກໍ່ສ້າງໜ່ວຍພັກປອດໃສ, ເຂັ້ມແຂງໜັກແໜ້ນໄດ້ສຳເລັດ, ພ້ອມນີ້ຍັງໄດ້ປະສານສົມທົບກັບບັນດາກົມກອງອ້ອມຂ້າງກະຊວງປ້ອງກັນຄວາມສະຫງົບ, ປກສ ແຂວງໃນທົ່ວປະເທດ, ໄດ້ປັບປຸງໂຄງຮ່າງກົງຈັກການຈັດຕັ້ງຕາມພາລະບົດບາດຂອງບັນດາກົມກອງອ້ມຂ້າງກະຊວງ-ທ້ອງຖິ່ນທີ່ມີຄວາມຈຳເປັນໃຫ້ຖືກຕ້ອງຕາມລະບຽບຫຼັກການ ແລະ ຂັ້ນຕອນທີ່ກຳນົດໄວ້ໃນນີ້ ໄດ້ແຕ່ງຕັ້ງບັນດານາຍຕຳຫຼວດຢູ່ບັນດາກົມກອງອ້ອມຂ້າງໄດ້ 304 ສະຫາຍ, ຄົ້ນຄວ້າຂໍຄຳເຫັນແຕ່ງຕັ້ງຈຳນວນ 2,217 ສະຫາຍ, ອີງໃສ່ຄວາມຮູ້, ຄວາມສາມາດ ແລະ ຄວາມຮຽກຮ້ອງ

ຕ້ອງການຂອງໜ້າທີ່ວຽກງານ ແລະ ໃນນີ້ໄດ້ຈັດຕັ້ງປະກາດເລື່ອນຊັ້ນ ພັນເອກ ຂື້ນ ພົນຈັດຕະວາ ໄດ້ 4 ສະຫາຍ, ພັນໂທ ຂື້ນ ພັນເອກ 20 ສະຫາຍ ແລະ ສັງລວມການສະເໜີເລື່ອນຊັ້ນນາຍ ແລະ ພົນຕຳຫຼວດຢູ່ບັນດາກົມກອງອ້ມຂ້າງກະຊວງປ້ອງກັນຄວາມສະຫງົບໄດ້ 5,224 ສະຫາຍ, ແລະ ໄດ້ສົ່ງພະນັກງານໄປບຳລຸງກໍ່ສ້າງທັງພາຍໃນ ແລະ ຕ່າງປະເທດໄດ້ 1,795 ສະຫາຍ, ຍິງ 369 ສະຫາຍ, ເອົາໃຈໃສ່ປະຕິບັດນະໂຍບາຍດ້ານຕ່າງໆຕໍ່ສະມາຊິກພັກ, ພະນັກງານ-ນັກຮົບ ແລະ ພະນັກງານອາວຸໂສບຳນານເປັນຕົ້ນແມ່ນການຍ້ອງຍໍສັນນະເສີນຫຼຽນໄຊ, ຫຼຽນກາໄດ້ 24 ໜ່ວຍ, ໃບຍ້ອງຍໍ 13,206 ໃບ ແລະ ອື່ນໆ.

ພ້ອມນີ້ບັນດາຄະນະພັກແຕ່ລະສະຫາຍໄດ້ຜັດປ່ຽນກັນປະກອບຄຳເຫັນໃສ່ບົດສະຫຼຸບ ແລະ ທິດທາງແຜນການ 6 ເດືອນທ້າຍປີ 2019 ດ້ວຍຄວາມຮັບຜິດຊອບສູງ ແລະ ມີເນື້ອໃນເລິກເຊິ່ງເພື່ອພ້ອມກັນປັບປຸງຈຸດອ່ອນຂໍ້ຄົງຄ້ານໃນໄລຍະຜ່ານມາ ແລະ ພ້ອມກັນນຳເອົາເນື້ອໃນຈິດໃຈຂອງຮ່າງທິດທາງແຜນການ 6 ເດືອນທ້າຍປີ 2019 ນີ້ ນຳໄປຈັດຕັ້ງຜັນຂະຫຍາຍຢູ່ໃນກົມກອງໃຫ້ໄດ້ຮັບໝາກຜົນສູງສຸດ.

Off

Comments are closed.