04th Jul2019

ເຈົ້າໜ້າທີ່ຕຳຫຼວດແຂວງບໍ່ແກ້ວ ຍຶດຢາໄອໄດ້ 600 ກິໂລກຣາມ

by somchan

ໃນວັນທີ 3 ກໍລະກົດ 2019 ນີ້ ເຈົ້າໜ້າທີ່ຕຳຫຼວດແຂວງບໍ່ແກ້ວ ສາມາດຍືດຢາໄອໄດ້ 600 ກິໂລກຣາມ ພ້ອມລົດຕູ້ສະຕາແລັກ ໝາຍເລກທະບຽນ 2917 ກຳແພງນະຄອນ ທີ່ຜູ້ກະທຳຜິດ ນຳໃຊ້ຂົນສົ່ງຢາໄອໃນຄັ້ງນີ້ ສ່ວນຜູ້ຂັບຂີ່ລົດຄັນດັ່ງກ່າວແມ່ນ ໄດ້ເອົາຕົວລົບໜີເຊີ່ງປະຈຸບັນເຈົ້າໜ້າທີຕຳຫຼວດ ພວມຕິດຕາມນຳຈັບຕົວເພື່ອມາດຳເນີນຄະດີ ຕາມກົດໝາຍ.

ຕາມການລາຍງານຂອງເຈົ້າໜ້າທີ່ຕຳຫຼວດ ແຂວງບໍ່ແກ້ວ ໃຫ້ຮູ້ວ່າໃນວັນທີ 3 ກໍລະກົດ 2019 ນີ້ ເຈົ້າໜ້າທີ່ໜ່ວຍສະເພາະກິດ ໄດ້ຕິດຕາມລົດຕູ້ສະຕາແລັກໝາຍເລກທະບຽນ 2917 ກຳແພງນະຄອນ ເຊີ່ງເປັນລົດເປົ້າໝາຍຕ້ອງສົງໄສຄ້າຢາເສບຕິດ ເພື່ອຂໍກວດກາແຕ່ຜູ້ຂັບຂີ່ລົດຄັນດັ່ງກ່າວຮູ້ໂຕວ່າມີເຈົ້າໜ້າທີ່ຕິດຕາມຈືງໄດ້ຈອດລົດໄວ້ຢູ່ໂຮງຮຽນປະຖົມສົມບູນ ບ້ານ ນ້ຳເກິ່ງໃໝ່ ແລ້ວເອົາຕົວລົບໜີ ຈາກນັ້ນເຈົ້າໜ້າທີ່ ໜ່ວຍສະເພາະກິດຈືງໄດ້ຮ່ວມກັບທະຫານແຂວງ, ປກສ ແຂວງ, ແລະ ໄອຍາການແຂວງ ກວດກາລົດຄັນດັ່ງກ່າວ ແລະ ໄດ້ພົບເຫັນຢາໄອທີຖືກບັນຈຸໃສ່ເປົາ ຈຳນວນ 30 ເປົາ ມີ 600 ຫໍ່ ລວມນ້ຳໜັກ 600 ກິໂລກຣາມ ແລະ ຊຸກເຊື່ອງຢູ່ໃນລົດ.

 

ປັດຈຸບັນເຈົ້າໜ້າທີ່ຕຳຫຼວດແຂວງບໍ່ແກ້ວ ໄດ້ຍືດຢາໄອຈຳນວນ 600 ຫໍ່ ເທົ່າກັບ 600 ກິໂລກຣາມ ແລະ ລົດຕູ້ສະຕາແລັກ ໝາຍເລກທະບຽນ 2917 ໄວ້ເປັນຫຼັກຖານ ພ້ອມທັງແຕ່ງຕັ້ງກຳລັງເພື່ອເຄື່ອນໄຫວ ເຮັດໜ້າທີສືບຄົ້ນຫາ ແລະ ຕິດຕາມນຳຈັບຕົວຜູ້ຂັບຂີ່ລົດມາດຳເນີນຄະດີຕາມກົດໝາຍ.

Off

Comments are closed.