16th Jul2019

ກອງປະຊຸມຮ່ວມມືຮັກສາຄວາມສະຫງົບລາວ-ຫວຽດນາມ ຄັ້ງທີ 10

by somchan

ກອງປະຊຸມຮ່ວມມືຮັກສາຄວາມສະຫງົບລາວ-ຫວຽດນາມ ຄັ້ງທີ 10 ໄດ້ຈັດຂື້ນໃນວັນທີ 15 ກໍລະກົດ 2019 ນີ້, ທີ່ໂຮງແຮມເມືອງແທັງ ນະຄອນຫຼວງວຽງຈັນ ຝ່າຍລາວນຳໂດຍ ພົນຕີ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ສປປລາວ, ຝ່າຍຫວຽດນາມນຳໂດຍ ພົນໂທ ບຸ່ຍ ວັນນາມ ຮອງລັດຖະມົນຕີກະຊວງຕຳຫຼວດ ສສ ຫວຽດນາມ, ມີບັນດາຜູ້ແທນທັງສອງຝ່າຍເຂົ້າຮ່ວມ.

ໃນວາລະດຳເນີນກອງປະຊຸມ ພົນຕີ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ໃນນາມປະທານກອງປະຊຸມຮ່ວມ ໄດ້ມີຄຳເຫັນກ່າວໄຂກອງປະຊຸມຢ່າງເປັນທາງການ ເຊິ່ງທ່ານໄດ້ກ່າວວ່າ ກອງປະຊຸມຮ່ວມມືຮັກສາຄວາມສະຫງົບລາວ-ຫວຽດນາມ ຄັ້ງທີ 10 ແມ່ນຈະໄດ້ພ້ອມກັນສະຫຼຸບຕີລາຄາ ຜົນໄດ້ຮັບໃນການຮ່ວມມືຮັກສາຄວາມສະຫງົບໃນຂົງເຂດຕ່າງໆ, ບັນດາວຽກງານທີ່ໄດ້ຮັບການຈັດຕັ້ງຜັນຂະຫຍາຍ ວຽກງານທີ່ຍັງຄົງຄ້າງ, ສາເຫດ ແລະ ອຸປະສັກໃນການຈັດຕັ້ງປະຕິບັດ ແລະ ແນ່ໃສ່ເຮັດໃຫ້ການຮ່ວມມືຂອງສອງປະເທດ ມີໝາກຜົນຍິ່ງໆຂື້ນຮັບປະກັນຄວາມສະຫງົບ ທາງດ້ານການເມືອງຂອງສອງປະເທດໃຫ້ໄດ້ຮັບ ໝາກຜົນສູງສຸດ.

ໃນກອງປະຊຸມຄະນະຜູ້ແທນທັງສອງຝ່າຍກໍໄດ້ລົງນາມເຊັນບົດບັນທຶກຊ່ວຍຈຳຮ່ວມກັນໃນການສືບຕໍ່ພົວພັນຮ່ວມມືຊ່ວຍເຫຼືອເຊິ່ງກັນ ແລະ ກັນລະຫວ່າງກະຊວງປ້ອງກັນຄວາມສະຫງົບລາວ-ກະຊວງຕຳຫຼວດຫວຽດນາມ ແລະ ກົມກອງວິຊາສະເພາະແຕ່ສູນກາງຮອດທ້ອງຖິ່ນ. ຝ່າຍລາວເຊັນໂດຍ ພົນຕີ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ, ຝ່າຍຫວຽດນາມເຊັນໂດຍພົນໂທ ບຸ່ຍ ວັນນາມ ຮອງລັດຖະມົນຕີກະຊວງຕຳຫຼວດ ຫວຽດນາມ .

Off

Comments are closed.