17th Jul2019

ນາຍົກແຫ່ງ ສປປ ລາວ ຕ້ອນຮັບຄະນະນຳຂັ້ນສູງ ກະຊວງຕຳຫຼວດ ຫວຽດນາມ

by somchan

ໃນວັນທີ 16 ກໍລະກົດ ນີ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ພົນໂທ ບຸ່ຍ ວັນນາມ ກຳມະການສູນກາງພັກກອມມູນນິດຫວຽດນາມ ຮອງລັດຖະມົນຕີ ກະຊວງຕຳຫຼວດ ສສ ຫວຽດນາມ ພ້ອມດ້ວຍຄະນະ ເນື່ອງໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງວັນທີ 14-16 ກໍລະກົດ 2019.

ໃນການເຂົ້າຢ້ຽມຂ່ຳນັບທ່ານນາຍົກ ແຫ່ງ ສປປ ລາວ ໃນຄັ້ງນີ້ ພົນໂທ ບຸ່ຍ ວັນນາມ ໄດ້ລາຍງານກ່ຽວກັບການມາເຮັດວຽກຮ່ວມກັບກະຊວງປ້ອງກັນຄວາມສະຫງົບລາວ ເວົ້າສະເພາະແມ່ນກົມໃຫ່ຍສັນຕິບານລາວ ແລະ ກຳລັງສັນຕິບານ ສສ ຫວຽດນາມ, ໃນນັ້ນ ໄດ້ພ້ອມກັນຄົ້ນຄວ້າຕີລາຄາຄືນກ່ຽວກັບສະພາບການໃນການຮ່ວມມືໃນວຽກງານຮັກສາຄວາມສະຫງົບຂອງສອງປະເທດ ລາວ-ຫວຽດນາມ ໃນໄລຍຜ່ານມາ ແລະ ໄດ້ພ້ອມກັນວາງທິດທາງການຮ່ວມມືຈັດຕັ້ງປະຕິບັດວຽກງານຮັກສາຄວາມສະຫງົບໃນຕໍ່ໜ້າຢ່າງມີເນື້ອໃນຈຸດສຸມ ລະຫວ່າງກຳລັງສັນຕິບານລາວ ແລະ ກຳລັງສັນຕິບານ ສສ ຫວຽດນາມ ເພື່ອເຮັດໃຫ້ວຽກງານຮັກສາຄວາມສະຫງົບແຫ່ງຊາດ ມີສະຖຽນລະພາບທາງດ້ານການເມືອງ ແນ່ໃສ່ຮັບປະກັນໃຫ້ການຢ້ຽມຢາມຂອງບັນດາການນຳສອງປະເທດລາວ-ຫວຽດນາມ ມີຄວາມສະດວກ; ພ້ອມນັ້ນຍັງຈະພ້ອມກັນຮ່ວມມືຊ່ວຍເຫຼືອເຊິ່ງກັນ ແລະ ກັນ ໂດຍສະເພາະແມ່ນດ້ານການສ້າງບຸກຄະລາກອນ, ດ້ານອຸປະກອນເຕັກນິກຮັບໃຊ້ວຽກງານ ຮັບປະກັນໃຫ້ວຽກງານມີຄຸນນະພາບ.

ໂອກາດດັ່ງກ່າວ ທ່ານ ທອງລຸນ ສີສຸລິດ ໄດ້ສະແດງຄວາມຊົມເຊີຍຕໍ່ ພົນໂທ ບຸ່ຍ ວັນນາມ ພ້ອມຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ກໍຄືຮ່ວມກັບກະຊວງ ປກສ ລາວ ເພາະວ່າວຽກງານຮັກສາຄວາມສະຫງົບ ເປັນວຽກງານສຳຄັນໃນການແກ້ໄຂບັນດາປະກົດການຫຍໍ້ທໍ້ຕ່າງໆທີ່ເກີດຂື້ນຢູ່ປະເທດຂອງຕົນ ເປັນຕົ້ນແມ່ນລາວ-ຫວຽດນາມ ໃຫ້ມີຄວາມສະຫງົບ-ປອດໄພ ພ້ອມທັງສະແດງຄວາມຂອບໃຈມາຍັງການນຳພັກ-ລັດຖະບານ ແຫ່ງ ສສ ຫວຽດນາມ ເຊິ່ງຍາມໃດກໍ່ໃຫ້ການສະໜັບສະໜູນຊ່ວຍເຫຼືອແກ່ ສປປ ລາວ ຕະຫຼອດມາ ໂດຍສະເພາະແມ່ນການກໍ່ສ້າງບຸກຄະລາກອນ, ຊ່ວຍເຫຼືອທາງດ້ານວັດຖຸເຕັກນິກ ແລະ ເຮັດໃຫ້ ສປປ ລາວ ມີການພັດທະນາດີຂື້ນເປັນກ້າວໆ; ດັ່ງນັ້ນ ເພື່ອສືບຕໍ່ເສີມຂະຫຍາຍມູນເຊື້ອອັນດີງາມແຫ່ງສາຍພົວພັນມິດຕະພາບອັນຍິ່ງໃຫ່ຍ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ມີມາແຕ່ດົນນານ ໃຫ້ມີຄວາມແໜ້ນແຟ້ນຍິ່ງໆຂື້ນກວ່າເກົ່າ.

Off

Comments are closed.