23rd Jul2019

ກອງປະຊຸມສະຫຼຸບການຈັດຕັ້ງປະຕິບັດແຜນແມ່ບົດແຫ່ງຊາດ ເພື່ອຄວບຄຸມສະກັດກັ້ນ ແລະ ຕ້ານຢາເສບຕິດໄລຍະ 3 ປີ

by somchan

ກອງປະຊຸມສະຫຼຸບການຈັດຕັ້ງປະຕິບັດແຜນແມ່ບົດແຫ່ງຊາດ ເພື່ອຄວບຄຸມສະກັດກັ້ນ ແລະ ຕ້ານຢາເສບຕິດໄລຍະ 3 ປີ ໄດ້ຈັດໃນວັນທີ 23 ກໍລະກົດນີ້ ທີ່ໂຮງແຮມຄຣາວພຣາຊາ ນະຄອນຫຼວງວຽງຈັນ. ໂດຍການເປັນປະທານຂອງ ພົນຕີ ປອ ສົມຫວັງ ທຳມະສິດ ຮອງລັດຖະມົນຕີກະຊວງ ປກສ ຮອງປະທານຜູ້ປະຈຳການຄະນະກຳມະການແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ

ຫົວໜ້າຄະນະຊີ້ນຳວຽກງານກວດກາ ແລະ ຄວບຄຸມຢາເສບຕິດ ກະຊວງ ປກສ, ມີຕາງໜ້າບັນດາກະຊວງອ້ອມຂ້າງສູນກາງ ແລະ ຜູ້ຕາງໜ້າສະພາບໍລິຫານກອງທຶນ ເພື່ອຄວບຄຸມສະກັດກັ້ນ ແລະ ຕ້ານຢາເສບຕິດ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ພັນເອກ ອ່ອນຜິວ ໂຄ້ງວຽງທອງ ຫົວໜ້າຫ້ອງການກວດກາ ແລະ ຄວບຄຸມຢາເສບຕິດໄດ້ລາຍງານການຈັດຕັ້ງປະຕິບັດແຜນແມ່ບົດແຫ່ງຊາດ ເພື່ອຄວບຄຸມສະກັດກັ້ນ ແລະ ຕ້ານຢາເສບຕິດໃນໄລຍະ 3 ປີຜ່ານມາ ໂດຍຈັດຕັ້ງປະຕິບັດຕາມ 9 ແຜນງານຄື: ແຜນງານສ້າງ ແລະ ປັບປຸງນິຕິກຳທີ່ກ່ຽວຂ້ອງກັບຢາເສບຕິດ, ແຜນງານເກັບກຳ ແລະ ວິໄຈຂໍ້ມູນ-ຂ່າວສາວ, ແຜນງານສຶກສາອົບຮົມ ແລະ ໂຄສະນາເຜີຍແຜ່ກົດໝາຍ ແລະ ຜົນຮ້າຍຂອງຢາເສບຕິດ, ແຜນງານປິ່ນປົວ ແລະ ຝຶກວິຊາຊີບໃຫ້ຜູ້ທີ່ຕິດຢາເສບຕິດ, ແຜນງານພັດທະນາທາງເລືອກທົດແທນການລັກລອບປູກຝິ່ນ-ປູກກັນຊາ, ແຜນງານປະຕິບັດມາດຕະຖານດ້ານກົດໝາຍ, ແຜນງານຄວບຄຸມສານເຄມີ ການວິໄຈ ແລະ ກວດສອບຕົວຢ່າງຢາເສບຕິດ, ແຜນຮ່ວມມືກັບສາກົນ ແລະ ແຜນງານປັບປຸງກົງຈັກການຈັດຕັ້ງຄະນະກຳມະການກວດກາ ແລະ ຄວບຄຸມຢາເສບຕິດຂັ້ນສູນກາງ ແລະ ທ້ອງຖິ່ນ, ເຊິ່ງໃນແຕ່ລະແຜນງານຈະມີກິດຈະກຳສະເພາະຂອງແຕ່ລະວຽກງານສະແດງອອກ, ກິດຈະກຳສ້າງຄວາມເຂັ້ມແຂງໃຫ້ແກ່ວຽກງານແກ້ໄຂຄະດີຢາເສບຕິດ. ໃນໄລຍະ 3 ປີຜ່ານມາ ທົ່ວປະເທດສາມາດມ້າງຄະດີຢາເສບຕິດໄດ້ 9,436 ເລື່ອງ, ຈັບຜູ້ຖືກຫາໄດ້ 13,912 ຄົນ, ຍິງ 1,815 ຄົນ, ຄົນຕ່າງປະເທດ 261 ຄົນ, ຢຶດຢາເສບຕິດປະເພດຢາບ້າ 37 ລ້ານກວ່າເມັດ ເທົ່າກັບ 3 ໝຶ່ນກິໂລກຼາມ, ເຮໂລອິນ 735 ກິໂລກຼາມດ ຢາໄອ 2 ພັນກິໂລກຼາມ, ຢາຝິ່ນ 432 ກິໂລກຼາມ, ລົດໃຫ່ຍ 344 ຄັນ, ລົດຈັກ 1,335 ຄັນ ແລະ ອື່ນໆ, ການດຳເນີນຄະດີຂອງເຈົ້າໜ້າທີ່ຕຳຫຼວດແມ່ນດຳເນີນຖືກຕ້ອງຕາມກົດໝາຍ, ມີຄວາມໂປງໃສ, ມີຄວາມເປັນທຳ ແລະ ສອດຄ່ອງກັບຫຼັກການສາກົນ. ໃນກອງປະຊຸມບັນດາຜູ້ແທນເຂົ້າຮ່ວມກອງປະຊຸມຍັງໄດ້ພ້ອມກັນປະກອບຄຳຄິດຄຳເຫັນໃສ່ແຕ່ລະແຜນງານຢ່າງກົງໄປກົງມາເຊິ່ງມີທາງຈຸດດີ ແລະ ຈຸດອ່ອນຂໍ້ຄົງຄ້າງ ແລະ ທິດທາງແຜນການໃນຕໍ່ໜ້າເພື່ອເຮັດໃຫ້ການປະຕິບັດວຽກງານມີປະສິດທິຜົນກວ່າເກົ່າ.

Off

Comments are closed.