29th Jul2019

ພິທີລະນຶກວັນສາກົນຕ້ານການຄ້າມະນຸດ

by somchan

ໃນວັນທີ 27 ກໍລະກົດນີ້ ຄະນະກຳມະການຕ້ານການຄ້າມະນຸດລະດັບຊາດ ໄດ້ຈັດພິທີລະນຶກວັນສາກົນຕ້ານການຄ້າມະນຸດ ຄືວັນທີ 30 ກໍລະກົດ ປະຈຳປີ 2019 ຂຶ້ນຢູ່ທີ່ສວນເຈົ້າຟ້າງຸ່ມ ໂດຍການໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກຳມະການຕ້ານການຄ້າມະນຸດລະດັບຊາດ, ມີພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ຮອງປະທານຄະນະກຳມະການຕ້ານການຄ້າມະນຸດລະດັບຊາດ, ມີບັນດາການນຳພັກ-ລັດ ອົງການຈັດຕັ້ງທີ່ກ່ຽວຂ້ອງ, ບັນດາທູ ຕານຸທູດ, ອົງການຈັດຕັ້ງສາກົນປະຈຳ ສປປ ລາວ, ພະນັກງານທະຫານ ຕຳຫຼວດ, ເຍົາວະຊົນ, ຊາວໜຸ່ມ ແລະ ມວນຊົນເຂົ້າຮ່ວມ.

ພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງ ປ້ອງກັນຄວາມສະຫງົບ ຮອງປະທານຄະນະກຳມະການຕ້ານການຄ້າມະນຸດລະດັບຊາດໄດ້ກ່າວວ່າ: ບັນຫາການຄ້າມະນຸດແມ່ນອາຊະຍາກຳຂ້າມຊາດ ທີ່ສົ່ງຜົນກະທົບໂດຍກົງຕໍ່ສິດທິມະນຸດ ແລະ ໄດ້ແຜ່ລາມໄປທົ່ວໂລກ, ສຳລັບ ສປປ ລາວ ຍັງເປັນປະເທດຕົ້ນທາງຂອງຂະບວນການຄ້າມະນຸດ ເພາະມີພົນລະເມືອງລາວຈຳນວນໜຶ່ງ ຕົກເປັນເຍື່ອຂອງກຸ່ມຄົນບໍ່ດີ ຊຶ່ງເກີດມາຈາກຫຼາຍປັດໃຈເປັນຕົ້ນແມ່ນ ບັນຫາຄວາມທຸກຍາກ, ລະດັບການສຶກສາ, ຄວາມຮູ້ດ້ານວິຊາຊີບ, ສີມືແຮງງານ, ສະພາບແຕກໂຕນດ້ານການພັດທະນາ ແລະ ສະພາບການປ່ຽນແປງຂອງສັງຄົມ, ເຮັດໃຫ້ຄົນຈຳນວນໜຶ່ງ ສະແຫວງຫາຊີວິດການເປັນຢູ່ທີ່ດີຂື້ນ ຈາກການໄປເຮັດວຽກອີກປະເທດໜຶ່ງ.

ຕໍ່ກັບບັນຫາດັ່ງກ່າວທາງພັກ-ລັດຖະບານ ກໍ່ໄດ້ເອົາໃຈໃສ່ແກ້ໄຂຢ່າງຈິງຈັງ, ເປັນຕົ້ນແມ່ນການໂຄສະນາເຜີຍແຜ່ຜົນຮ້າຍຄວາມເປັນອັນຕະລາຍຂອງການຄ້າມະນຸດດ້ວຍຫຼາຍຮູບແບບວິທີການ ເພື່ອປູກຈິດສຳນຶກໃຫ້ສັງຄົມກໍ່ຄືປະຊາຊົນ ມີຄວາມຮັບຮູ້ເຂົ້າໃຈເອົາໃຈໃສ່ຊ່ວຍເຫຼືອຜູ້ຖືກເຄາະຮ້າຍໃນດ້ານຕ່າງໆ ພ້ອມທັງດຳເນີນການສະກັດກັ້ນ, ຕ້ານການຄ້າມະນຸດ, ລົງໂທດຕໍ່ຜູ້ກະທຳຜິດຕາມລະບຽບກົດໝາຍຢ່າງເຂັ້ມງວດ ແລະ ສຸມໃສ່ແຕ່ລະໜ້າວຽກຢ່າງມີປະສິດທິຜົນ ແນໃສ່ເຮັດໃຫ້ບັນຫາການຄ້າມະນຸດນັບມື້ນັບຫຼຸດໜ້ອຍຖອຍລົງ ແລະ ໝົດໄປຈາກສັງຄົມລາວ.

ສຳລັບການຈັດກິດຈະກຳລະນຶກວັນສາກົນຕ້ານການຄ້າມະນຸດໃນຄັ້ງນີ້ ປະກອບມີການຮັບຊົມຮູບພາບ, ເຄື່ອງຜະລິດຕະພັນ ແລະ ວີດີໂອການເຄື່ອນໄຫວຂອງຄະນະກຳມະການຕ້ານການຄ້າມະນຸດ ພ້ອມທັງປ່ອຍປຸມເປົ້າ ແລະ ຍ່າງເພື່ອສຸຂະພາບອີກດ້ວຍ.

Off

Comments are closed.