19th Aug2019

ເຈົ້າໜ້າທີ່ສາມາດກັກຕົວພວກຄາດຕະກຳ ໄອຍາການເຂດ 1 ແຂວງ ຄຳມ່ວນໄດ້ 2 ຄົນ

by somchan

ຈາກເຫດການຄົນຮ້າຍ ໃຊ້ປືນ AK ຍິງທ້າວສຸກສະໄຫວ ໄອຍາການການເຂດ 1 ແຂວງ ຄຳມ່ວນ ເສຍຊີວິດຄາທີ່ຢູ່ສົ້ນຂົວ ເສັ້ນທາງ 11 B ເຂດ ບ້ານ ທ່າງາມ ເມືອງ ທ່າແຂກ ແຂວງ ຄຳມ່ວນ ໃນວັນທີ 14 ສິງຫາ 2019 ທີ່ຜ່ານມາ ປະຈຸບັນແມ່ນສາມາດກັກຕົວ ຜູ້ຄາດຕະກຳ ໄດ້ 2 ຄົນ ແລະ ຜູ້ສົມຮູ້ຮ່ວມຄິດ ໃຫ້ການຊ່ວຍເຫຼືອຫຼົບໜີ 1 ຄົນ.

 

 

ພັອ ຄຳພອນ ສີກຸມພົນ ຮັກສາການ ຫົວໜ້າກອງບັນຊາການ ປກສ ແຂວງ ຄຳມ່ວນ ໄດ້ໃຫ້ສຳພາດວ່າ: ພາຍຫຼັງມື້ເກີດເຫດ ທາງເຈົ້າໜ້າທີ່ກອງບັນຊາການ ປກສ ແຂວງ ຄຳມ່ວນ ໄດ້ປະສານສົມທົບກັບ ກອງບັນຊາການ ປກສ ແຂວງ ສະຫວັນນະເຂດ ແລະ ເຈົ້າໜ້າທີ່ກ່ຽວຂ້ອງ ຕິດຕາມກວດກາມາຮອດວັນທີ 15 ສິງຫາ ແມ່ນສາມາດກັກຕົວຜູ້ໃຫ້ການຊ່ວຍເຫຼືອຜູ້ກໍ່ເຫດໄດ້ຊື່: ນາງ ຕາ ອາຍຸ 28 ປີ ຢູ່ບ້ານຊຽງຫວາງ ເມືອງໜອງບົກ ແຂວງ ຄຳມ່ວນ ຫຼັງຈາກນັ້ນ ວັນທີ 16 ສິງຫາ ຈຶງກັກຕົວ ພວກຄາດຕະກຳ ໄດ້ 2 ຄົນ ຄື: ທ້າວ ຄຳບົດ ອາຍຸ 41 ປີ ແລະ ທ້າວ ເຄືອນເພັດ ຫຼື ເພັດ ອາຍຸ 38 ປີ ທັງສອງ ອາຊີບຄ້າຂາຍ ຢູ່ບ້ານຊຽງຫວາງ ເມືອງ ໜອງບົກ ແຂວງ ຄຳມ່ວນ.

ປະຈຸບັນ ທາງເຈົ້າໜ້າທີ່ ພວມດຳເນີນ ຄະດີຕາມລະບຽບກົດໝາຍ.

Off

Comments are closed.