18th Sep2019

ພິທີຖະແຫຼງຂ່າວຜົນສຳເລັດກອງປະຊຸມ ລັດຖະບານເພື່ອປືກສາຫາລືການແກ້ໄຂ ໄພພິບັດນ້ຳຖວມໃນທົ່ວປະເທດ ປີ 2019

by somchan

ໃນວັນທີ 16 ກັນຍາ 2019 ທີ່ສຳນັກງານນາຍົກລັດຖະມົນຕີ ໄດ້ມີພິທີທະແຫຼງຂ່າວ ຜົນສຳເລັດກອງປະຊຸມລັດຖະບານ ເພື່ອປືກສາຫາລືການແກ້ໄຂໄພພິບັດນ້ຳຖ້ວມ ໃນທົ່ວປະເທດ ປີ 2019 ໂດຍການຖະແຫຼງຂ່າວຂອງ ທ່ານ ເຢຍ ປາວເຮີ ລັດຖະມົນຕີ ປະຈຳສຳນັກງານນາຍົກ ທັງເປັນໂຄສົກລັດຖະບານ ຊຶ່ງທ່ານໄດ້ໃຫ້ຮູ້ເຖີງ ຜົນສຳເລັດກອງປະຊຸມຄັ້ງນີ້ ບັນດາສະມາຊິກລັດຖະບານ ໄດ້ພ້ອມກັນຄົ້ນຄ້ວາ, ປະກອບຄຳຄິດເຫັນ ແລະ ປືກສາຫາລື, ເປັນເອກກະພາບກັນ ແລະ ກອງປະຊຸມໄດ້ຊີ້ນຳ ໃຫ້ບັນດາຂະແໜງການ ແລະ ທ້ອງຖີ່ນຈັດຕັ້ງປະຕິບັດຄື: ໃຫ້ຄະນະຮັບຜິດຊອບແກ້ໄຂໄພພິບັດຢູ່ແຕ່ລະແຂວງ ສົມທົບກັບຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ສືບຕໍ່ຈັດຕັ້ງຊີ້ນຳຢ່າງໃກ້ສິດການແກ້ໄຂ ແລະ ຊ່ວຍເຫຼືອປະຊາຊົນທີ່ຍັງຢູ່ທີພັກເຊົາຊົ່ວຄາວ, ຮັບປະກັນໃຫ້ມີເຂົ້າກີນ, ນ້ຳດື່ມ-ນ້ຳໃຊ້ສະອາດ, ບໍ່ໃຫ້ເກີດພະຍາດລະບາດ, ໃຫ້ມີຄວາມສະຫງົບ, ໃຫ້ມີການຈັດຕັ້ງ-ມີຫົວໜ້າຄະນະເພື່ອຊີ້ນຳຢ່າງໃກ້ສິດ.

ພ້ອມກັນນີ້ໃຫ້ສືບຕໍ່ປຸກລະດົມທົ່ວສັງຄົມ ເພື່ອສືບຕໍ່ຊ່ວຍເຫຼືອປະຊາຊົນທີໄດ້ຮັບຜົນກະທົບ (ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມອື່ນໆ), ໃຫ້ສຸມໃສ່ກຳລັງ (ທະຫານ, ຕຳຫຼວດ ແລະ ທຸກພາກສ່ວນ) ລວມທັງພາຫະນະ (ລົດດັບເພິງ, ເຮືອ,..), ມີການຈັດຕັ້ງຊີ້ນຳລະອຽດ ເພື່ອສຸມໃສ່ຊ່ວຍເຫຼືອປະຊາຊົນ ໃນການຍົກຍ້າຍຈາກທີພັກຊົ່ວຄາວ ກັບຄືນໄປບ້ານເຮືອນຂອງຕົນ. ພ້ອມທັງເອົາເຄື່ອງຊ່ວຍເຫຼືອ ທີໄດ້ຮັບບໍລິຈາກໃຫ້ໄປຮອດໄປເຖີງປະຊາຊົນຢ່າງແທ້ຈິງ. ພ້ອມດຽວກັນນີ້ , ໃຫ້ແຕ່ລະຂະແໜງການ ແລະ ທ້ອງຖີ່ນ ຕ້ອງສຸມໃສ່ວຽກງານແກ້ໄຂໄພພິບັດເປັນວຽກຈຸດໜັກ, ສຳຄັນມີການວາງແຜນ ແລະ ມີຜູ້ຊີ້ນຳໃນການຈັດຕັ້ງປະຕິບັດຕົວຈິງ; ໃຫ້ຂະແໜງການ ແລະ ທ້ອງຖີ່ນກະກຽມຟື້ນຟູການຜະລິດພາຍຫຼັງນ້ຳລົງ ເພືອເຮັດໃຫ້ການຜະລິດເຂົ້າສູ່ສະພາບປົກກະຕິ, ແນໃສ່ຮັບປະກັນດ້ານສະບຽງອາຫານ ໂດຍສະເພາະການຈັດສັນແນວພັນ, ປັດໄຈການຜະລິດ, ພາຫານະການຜະລິດ ແລະ ອື່ນໆ ໃຫ້ທັນການ; ໃຫ້ເອົາໃຈໃສ່ປັບປຸງພື້ນຖານໂຄງລ່າງ ໂດຍສະເພາະສອມແປງເສັ້ນທາງໃຫ້ສາມາດໄປມາໄດ້, ສ້ອມແປງໂຮງຮຽນ, ໂຮງໝໍ, ສຸກສາລາໃຫ້ສາມາດເປີດນຳໃຊ້ໄດ້; ໃຫ້ກະຊວງການເງີນຮີບຮ້ອນຄົ້ນຄ້ວາ ແລະ ກະກຽມດ້ານຫງົບປະມານເພື່ອແກ້ໄຂ ໄພພິບັດດັ່ງກ່າວ ດ້ວຍການນຳໃຊ້ເງີນທີ່ມີ (ເງີນແຮ, ເງີນສະສົມ, ເງີນບໍລິຈາກ ແລະ ເງີນກອງທືນຕ່າງໆ ຢູ່ກະຊວງແຮງງານ ແລະ ສະວັດດີການສັງຄົມ) ລວມທັງຄັງແຮເຂົ້າ, ຄັງແຮນ້ຳມັນ, ແລ້ວສະເໜີລັດຖະບານ ພິຈາລະນາຕົກລົງໂດຍໄວ. ພ້ອມນີ້, ໃຫ້ປຸກລະດົມທົ່ວສັງຄົມປະກອບສ່ວນຊ່ວຍເຫຼືອຜູ້ປະສົບໄພຕື່ມ; ໃຫ້ສູນບັນຊາການແກ້ໄຂໄພພິບັດຢູ່ເສັ້ນສູນກາງ ແລະ ທ້ອງຖີ່ນມີການປະສານງານກັນວ່ອງໄວ, ຄ່ອງຕົວສາມາດແກ້ໄຂບັນຫາໄດ້ຢ່າງທັນການ; ໃຫ້ກຳລັງປ້ອງກັນຊາດ-ປ້ອງກັນຄວາມສະຫງົບ ສືບຕໍ່ເປັນກຳລັງຕົ້ນຕໍໃນການຊ່ວຍເຫຼືອປະຊາຊົນທີ່ໄດ້ຮັບຜົນກະທົບ, ໃຫ້ເອົາໃຈໃສ່ຄຸ້ມຄອງລາຄາສີນຄ້າ, ອັດຕາແລກປ່ຽນ, ອັດຕາເງີນເຟີ້ ແລະ ຕ້ອງເຮັດຢ່າງແທ້ຈິງໂດຍມີການລົງໄປຕິດຕາມກວດກາຕົວຈິງຢູ່ທ້ອງຖີ່ນຕ່າງໆ; ໃຫ້ພາກສ່ວນກ່ຽວຂ້ອງຄົ້ນຄ້ວາລະອຽດກ່ຽວກັບການຍົກເວັ້ນພາສີ-ອາກອນ, ຫຼຸດອັດຕາຄ່າໄຟ້າ, ນະໂຍບາຍດ້ານສີ້ນເຊື່ອ, ປັດໄຈຜະລິດ ແລະ ອື່ນໆແນວສະເໜີລັດຖະບານພິຈາລະນາຕົກລົງ, ໃຫ້ກະຊວງຖະແຫຼງຂ່າວ, ວັດທະນາທຳ ແລະ ທ້ອງທ່ຽວເອົາໃຈໃສ່ລົງຕິດຕາມ ແລະ ລາຍງານສະພາບຕົວຈິງ ການແກ້ໄຂບັນຫາໄພພິບັດໃນຄັ້ງນີ້ ເພື່ອໃຫ້ສັງຄົມໄດ້ຮັບຊາບຂໍ້ມູນທີຖືກຕ້ອງ ຢ່າງລະອຽດ, ຈະແຈ້ງ ແລະ ທັນການ. ທັງເປັນການປຸກລະດົມ, ເຕົ້າໂຮມຄວາມສາມັກຄີທົ່ວສັງຄົມ ແລະ ສືກສາອົບຮົມການເມືອງແນວຄິດໃຫ້ປະຊາຊົນ. ພ້ອມກັນນັ້ນ, ໃຫ້ເອົາໃຈໃສ່ຕິດຕາມ ແລະ ແກ້ໄຂການອອກຂ່າວທີ່ບໍ່ມີມູນຄວາມຈິງ, ໃສ່ຮ້າຍປ້າຍສີ ແລະ ອື່ນໆ ຂອງບຸກຄົນ, ສື່ສັງຄົມອ່ອນລາຍຈຳນວນໜື່ງ ຢ່າງທັນການ, ໃຫ້ກະຊວງຊັບພະຍາກອນທຳມະຊາດ ແລະ ສີງແວດລ້ອມສືບຕໍ່ຕິດຕາມ ແລະ ແຈ້ງເຕືອນສະພາບດີນຟ້າອາກາດໃນແຕ່ລະວັນພ້ອມທັງແນະນຳ ແລະ ໃຫ້ຄວາມຮູ້ແກ່ປະຊາຊົນເພື່ອກະກຽມແລະປ້ອງກັນ; ໃຫ້ຄະນະກຳມະການປ້ອງກັນ ແລະ ຄວບຄຸມຳພພິບັດແຫ່ງຊາດສົມທົບກັບຂະແໜງການ ແລະ ທ້ອງຖີ່ນເພື່ອແກ້ໄຂໄພພິບັດທົ່ວປະເທດໃນປີ 2019 ນີ້ໃຫ້ກັບຄືນສູ່ສະພາບປົກກະຕິໂດຍໄວ, ສຳລັບຄະນະກຳມະການສະເພາະກິດແກ້ໄຂໄພພິບັດລະດັບຊາດແມ່ນໃຫ້ສຸມໃສ່ແກ້ໄຂບັນຫາຜົນກະທົບໄພພິບັດ ຢູ່ເມືອງສະໜາມໄຊ ແຂວງອັດຕະປື ສືບຕໍ່ຮຽກຮ້ອງທຸກພາກສ່ວນ ທົ່ວສັງຄົມໃຫ້ຮ່ວມແຮງ-ຮ່ວມໃຈກັນ ປຸກລະດົມການຊ່ວຍເຫຼືອ ການຮ່ວມມືທັງຈາກພາຍໃນ ແລະ ຕ່າງປະເທດ.

 

Off

Comments are closed.