17th Oct2019

ຮ່ວມກັນຄ້າຂາຍຢາເສບຕິດ ຖືກຈັບພ້ອມຂອງກາງ 47 ແທ່ງ

by somchan

ໃນວັນທີ 13 ຕຸລາ 2019 ນີ້ ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຫົວພັນ ກັກຕົວຜູ້ລັກລອບຄ້າຂາຍຢາເສບຕິດໄດ້ 3 ຄົນ ພ້ອມຂອງກາງຢາເສບຕິດເຮໂຣອິນ ຈຳນວນ 47 ແທ່ງ ໃນຂະນະທີ່ພວກກ່ຽວພວມນັດສົ່ງກັບຜູ້ຮ່ວມຂະບວນການ ຢູ່ເຂດບ້ານລ້ອງກູ້ ເມືງວຽງໄຊແຂວງຫົວພັນ.

ເຈົ້າໜ້າທີ່ ປກສ ແຂວງຫົວພັນໃຫ້ຮູ້ວ່າ: ພາຍຫຼັງໄດ້ຮັບແຈ້ງ ໃນວັນທີ 12 ຕຸລາ 2019  ວ່າມີກຸ່ມຄົນບໍ່ດີ ຈະມີການລັກລອບເອົາຢາເສບຕິດປະເພດເຮໂຣອິນຈຳນວນຫຼາຍ ໄປຂາຍໃຫ້ຜູ້ສັ່ງຊື້ ຢູ່ເຂດບ້ານລ້ອງກູ້ ເມືອງວຽງໄຊ ໂດຍໃຊ້ລົດກະບະວິໂກ້ເປັນພາຫະນະຂົນສົ່ງ.

ຈາກນັ້ນ, ຈຶ່ງໄດ້ສົມທົບກັບໜ່ວຍງານວິຊາສະເພາະ ປກສ ເມືອງວຽງໄຊ ລົງຕິດຕາມເປົ້າໝາຍ ມາຮອດວັນທີ 13 ຕຸລາ ເວລາປະມານ 19:00 ໂມງ ພົບເຫັນເປົ້າໝາຍ ຈຳນວນ 3 ຄົນ ຢູ່ຈຸດເຂດບ້ານລ້ອງກູ້ ຈຶ່ງໄດ້ເຂົ້າກວດຄົ້ນ ແລະ ພົບເຫັນຂອງກາງຢາເສບຕິດ ປະເພດເຮໂຣອິນ ຈຳນວນ 47 ແທ່ງ ໝັກ 20,7 ກິໂລກຣາມ, ປືນສັ້ນ 1 ກະບອກ, ພ້ອມລູກປືນຈຳນວນໜຶ່ງ, ໂທລະສັບມືຖື 4 ໜ່ວຍ ແລະ ລົດກະບະວິໂກ້ 1 ຄັນ.

ຜູ້ຖືກຫາທັງ 3 ມີ: ທ້າວ ລາຈິປາວທໍ ຫຼືຖາຍທໍ ອາຍຸ 27 ປີ, ທ້າວ ຫຼ້າເຮີ ອາຍຸ 25 ປີ ທັງສອງຢູ່ບ້ານຊົງຈ່າ ເມືອງນ້ຳບາກ ແຂວງຫຼວງພະບາງ ແລະ ຕົວຊົງ ຫຼືຍົງຢາ ອາຍຸ 24 ປີ ຢູ່ບ້ານຫ້ວຍຫຼວງ ເມືອງລອງ ແຂວງຫຼວງນ້ຳທາ.

ຜ່ານການສືບສວນ-ສອບສວນຂອງເຈົ້າໜ້າທີ່ ພວກກ່ຽວທັງ 3 ຮັບສາລະພາບວ່າ: ເຮໂຣອິນຈຳນວນດັ່ງກ່າວ ແມ່ນຂອງພວກກ່ຽວແທ້, ເຊິ່ງໄດ້ຮ່ວມກັນຄ້າຂາຍ ໂດຍນັດສົ່ງໃຫ້ຜູ້ສັ່ງຊື້ ຢູ່ເຂດບ້ານລ້ອງກູ້ເມືອງວຽງໄຊ ພໍໄປຮອດກໍ່ຖືກເຈົ້າໜ້າທີ່ຈັບຕົວໄດ້ກ່ອນ.

ປັດຈຸບັນ ຄະດີດັ່ງກ່າວ ເຈົ້າໜ້າທີ່ຕຳຫຼວດ ພວມສືບສອບ-ສອບສວນ ຫາຜູ້ຮ່ວມຂະບວນການມາດຳເນີນການຕາມຂັ້ນຕອນຂອງກົດໝາຍ.

Off

Comments are closed.