17th Oct2019

ກອງປະຊຸມແລກປ່ຽນບົດຮຽນລະຫວ່າງ ກະຊວງປກສລາວ ແລະ ກະຊວງພາຍໃນ ກຳປູເຈຍ

by somchan

ກອງປະຊຸມແລກປ່ຽນບົດຮຽນລະຫວ່າງກົມໃຫ່ຍຕຳຫຼວດຄຸມຂັງ-ດັດສ້າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກົມໃຫ່ຍຄຸມຂັງ-ດັດສ້າງ ກະຊວງພາຍໃນ ແຫ່ງຣາຊະອານາຈັກກຳປູເຈຍ ໄດ້ຈັດໃນວັນທີ 16 ຕຸລາ 2019 ນີ້ ຢູ່ທີ່ໂຮງແຮມວຽງຈັນພາຊາ ນະຄອນຫຼວງວຽງຈັນ.

ຝ່າຍລາວ ໂດຍ ພົຈວ ສົມລິດ ດາວຮຸ່ງສຸລິ ຫົວໜ້າກົມຕຳຫຼວດຄຸມຂັງ-ດັດສ້າງ ກະຊວງປ້ອງກັນຄວາມສະຫງົບ ແລະ ຝ່າຍກຳປູເຈຍ ໂດຍ ພົອ ປອ ຈັນ ຄິມແສງ ຫົວໜ້າກົມໃຫຍ່ຄຸມຂັງ-ດັດສ້າງ ກະຊວງພາຍໃນ.

ໂອກາດນີ້ ພົຈວ ສົມລິດ ດາວຮຸ່ງສຸລິ ກໍ່ໄດ້ສະແດງການຕ້ອນຮັບຢ່າງອົບອຸ່ນ, ຈາກນັ້ນທັງສອງຝ່າຍຍັງໄດ້ລາຍງານສະພາບຈຸດພິເສດທີ່ຕັ້ງຂອງປະເທດ ແລະ ກົງຈັກການຈັດຕັ້ງຄຸມຂັງ-ດັດສ້າງໃຫ້ກັນ ແລະ ກັນຊາບ, ພ້ອມທັງໄດ້ປຶກສາຫາລື ແລະ ແລກປ່ຽນບົດຮຽນກ່ຽວກັບລະບົບກົງຈັກການຈັດຕັ້ງວຽກງານຄຸມຂັງ-ດັດສ້າງ, ວຽກງານຄຸ້ມຄອງການສຶກອົບຮົມ, ຝຶກວິຊາຊີບໃຫ້ແກ່ນັກໂທດ, ລະບຽບການ ລະ ເງື່ອນໄຂໃນການມອບ-ຮັບຕົວນັກໂທດລະຫວ່າງປະເທດກໍ່ຄືສອງກະຊວງ ຄື: ກະຊວງປ້ອງກັນຄວາມສະຫງົບລາວ-ກະຊວງພາຍໃນ ກຳປູເຈຍ ແລະ ອື່ນໆ.

ແນ່ໃສ່ເພື່ອເຮັດໃຫ້ກຳລັງຕຳຫຼວດຄຸມຂັງ-ດັດສ້າງ ຂອງທັງສອງປະເທດ ໄດ້ມີການພົວພັນຮ່ວມມືກ່ຽວກັບການແລກປ່ຽນບົດຮຽນ, ການປະສານງານທາງດ້ານວຽກງານວິຊາສະເພາະ ແລະ ອື່ນໆ ມີຄວາມສະດວກ, ແໜ້ນແຟ້ນ, ແລະ ມີຄວາມຖືກຕ້ອງຕາມກົດໝາຍຂອງທັງສອງປະເທດ.

Off

Comments are closed.