24th Oct2019

2 ມື້ ເກີດເຫດໄຟໄໝ້ ຢູ່ 2 ແຂວງ ຜົນເສຍຫາຍຍັງຢູ່ໃນຂັ້ນຕອນການສືບສວນ

by somchan

ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານອັກຄີໄພ ປກສ ແຂວງຫົວພັນ ໄດ້ລາຍງານໃຫ້ຮູ້ວ່າ ເວລາ ປະມານ 17 ໂມງ ຂອງວັນທີ 22 ຕຸລາ 2019 ໄດ້ເກີດເຫດໄຟໄໝ້ເຮືອນຂອງປະຊາຊົນ ຢູ່ບ້ານສົ້ນຂົ້ວ ເມືອງ ຫົວເມືອງ ແຂວງຫົວພັນ

ມີເຮືອນປະຊາຊົນໄດ້ຮັບຄວາມເສຍຫາຍຈາກໄຟໄໝ້ ທັງໝົດ 23 ຫຼັງ ເນື່ອງຈາກເຮືອນປະຊາຊົນທີ່ຖືກໄຟໄໝ້ໃນຄັ້ງນີ້ ສ່ວນຫຼາຍເປັນເຮືອນໄມ້ມຸ່ງດ້ວຍຫຍ້າ ແລະ ຕັ້ງຢູ່ຫ່າງໄກສອກຫຼີກຈາກຕົວເມືອງ ເຮັດໃຫ້ເຈົ້າໜ້າທີ່ໃຊ້ເວລາເດີນທາງເຂົ້າຊ່ວຍເຫຼືອດັບມອດໄຟເກືອບ 3 ຊົ່ວໂມງ ຈຶ່ງຮອດສະຖານທີ່ເກີດເຫດ ແລະ ເຮັດໃຫ້ການຊ່ວຍເຫຼືອຊ້າ ສ່ວນມູນຄ່າເສຍຫາຍ ແລະ ສາເຫດຂອງການເກີດອັກຄີໄພໃນຄັ້ງນີ້ ຍັງຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່ຕຳຫຼວດ.

ແລະ ຂ່າວຍັງໃຫ້ຮູ້ຕື່ມອີກວ່າ:

ໃນວັນທີ 23 ຕຸລາ 2019 ເວລາ 2 ໂມງ ໄດ້ເກີດເຫດໄຟໄໝ້ຢູ່ຕະຫຼາດ ທີ່ຕັ້ງຢູ່ບ້ານໂພນໄຊ ເມືອງປາກຊັນ ແຂວງບໍລິຄຳໄຊ ເຊິ່ງເຮັດໃຫ້ຮ້ານຂາຍເຄື່ອງຕ່າງໆພາຍໃນຕະຫຼາດຖືກໄຟໄໝ້ເປັນຈຳນວນຫຼວງຫຼາຍ ເຊິ່ງເຈົ້າໜ້າທີ່ຕຳຫຼວດໄດ້ນຳໃຊ້ລົດມອດໄຟເຂົ້າດັບມອດ 4 ຄັນ ແລະ ໃຊ້ເວລາເກືອບ 8 ຊົ່ວໂມງຈຶ່ງສາມາດຄວບຄຸມໄຟໄວ້ໄດ້ ສ່ວນສາເຫດຂອງການເກີດອັກຄີໄພໃນຄັ້ງນີ້ ແລະ ມູນຄ່າຄວາມເສຍຫາຍຍັງຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່ຕຳຫຼວດ.

Off

Comments are closed.