25th Oct2019

ກອງປະຊຸມຄົບຄະນະຊີ້ນຳໂຄງການສ້າງທາງ ລົດໄຟລາວ-ຈີນ ຄັ້ງທີ 7

by somchan

ກອງປະຊຸມຄົບຄະນະຊີ້ນຳໂຄງການສ້າງທາງລົດໄຟລາວ-ຈີນ ຄັ້ງທີ 7ໄດ້ຈັດຂື້ນໃນວັນທີ 24 ຕຸລາ 2019 ນີ້, ທີ່ຫ້ອງປະຊຸມຄະນະກວດກາສູນກາງພັກ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ປອ ບຸນທອງ ຈິດມະນີ ຮອງນາຍຍົກລັດຖະມົນຕີ, ປະທານອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ຫົວໜ້າຄະນະຊີ້ນຳໂຄງການສ້າງທາງລົດໄຟລາວ-ຈີນ ມີຮອງຫົວໜ້າຄະນະຊີ້ນຳໂຄງການ ກໍ່ສ້າງທາງລົດໄຟລາວ-ຈີນ,

ບັນດາລັດຖະມົນຕີ, ຮອງລັດຖະມົນຕີ, ຮອງເຈົ້າຄອງນະຄອນຫຼວງວຽງຈັນ, ເຈົ້າແຂວງ, ຮອງເຈົ້າແຂວງ ແລະ ຮອງປະທານອົງການຈັດຕັ້ງມະຫາຊົນຂັ້ນສູງກາງ ທີ່ຢູ່ໃນຄະນະຊີ້ນຳໂຄງການ ກໍ່ສ້າງທາງລົດໄຟລາວ-ຈີນ ເຂົ້າຮ່ວມ.

ໃນການດຳເນີນກອງປະຊຸມທີ່ມີຄວາມໝາຍສຳຄັນນີ້ ປອ ບຸນທອງ ຈິດມະນີ ປະທານກອງປະຊຸມໄດ້ມີຄຳເຫັນວ່າ: ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອສືບຕໍ່ປຶກສາຫາລືກ່ຽວກັບການຈັດຕັ້ງປະຕິບັດໂຄງການ ກໍ່ສ້າງທາງລົດໄຟລາວ-ຈີນ, ເຊິ່ງເປັນໂຄງການຂະໜາດໃຫ່ຍທີ່ມີຄວາມໝາຍສຳຄັນ ແລະ ເປັນໂຄງການໜຶ່ງຂອງຂໍ້ລິເລີ່ມໜຶ່ງແລວ ໜຶ່ງເສັ້ນທາງທີ່ຜ່ານ ສາທາລະນະລັດ ປະຊາທິປະໄຕ ປະຊາຊົນລາວ, ໂດຍການນຳຂອງ ພັກ ແລະ ລັດຖະບານ ສປປ ລາວ ແລະ ສປ ຈີນ ໄດ້ຕົກລົງເປັນເອກະພາບກັນໃຫ້ເປັນໂຄງການຕົວແບບຂອງການຮ່ວມມືມິດຕະພາບລາວ-ຈີນ ເປັນໂຄງການປອດໃສຂາວສະອາດ ແລະ ໄດ້ປະກາດໃຫ້ສັງຄົມ, ໂລກໄດ້ຮັບຮູ້ວ່າ ໂຄງການນີ້ຈະສຳເລັດ ແລະ ເປີດການບໍລິການໃນວັນທີ 2 ທັນວາ 2021 ທີ່ຈະມາເຖິງນີ້.

ພ້ອມນີ້ກອງປະຊຸມຍັງໄດ້ຮັບຟັງການລາຍງານຄວາມຄືບໜ້າການຈັດຕັ້ງປະຕິບັດໂຄງການກໍ່ສ້າງທາງລົດໄຟລາວ-ຈີນ. ເຊິ່ງສະເໜີໂດຍ ປອ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ, ຮອງຫົວໜ້າຄະນະຊີ້ນຳໂຄງການກໍ່ສ້າງທາງລົດໄຟລາວ-ຈີນ, ໄດ້ໃຫ້ຮູ້ວ່າ: ຄວາມຄືບໜ້າການຈັດຕັ້ງປະຕິບັດໂຄງການກໍ່ສ້າງທາງລົດໄຟລາວ-ຈີນ ມາຮອດວັນທີ 30 ກັນຍາ 2019 ນີ້ ໄດ້ປະຕິບັດສຳເລັດ 78,20 ສ່ວນຮ້ອຍຂອງວຽກງານກໍ່ສ້າງພື້ນຖານໂຄງລ່າງທາງລົດໄຟ ແລະ ທຽບໃສ່ເດືອນຜ່ານມາເພີ່ມຂື້ນ 1,80 ສ່ວນຮ້ອຍ, ໃນນີ້ໄດ້ລົງມືກໍ່ສ້າງໂຄງການທັງໝົດ 973 ຈຸດກໍ່ສ້າງ, ຊີເຈາະອຸໂມງທັງໝົດ 74 ອຸໂມງ, ໃນຈຳນວນ 75 ຈຸດກໍ່ສ້າງ ແລະ ໃນນີ້ເຈາະທະລຸແລ້ວ 30 ອຸໂມງ, ລົງມືກໍ່ສ້າງຂົວ 161ແຫ່ງ ໃນຈຳນວນທັງໝົດ 164 ແຫ່ງ ແລະ ສ້າງເສົາຂົວສຳເລັດແລ້ວ 1,779 ເສົາເທົ່າກັບ 88 ສ່ວນຮ້ອຍຂອງການອອກແບບ, ຊີເຈາະເຂັມເສົາຂົວ ມີຄວາມຍາວ 241,819 ເມັດ ເທົ່າກັບ 96 ສ່ວນຮ້ອຍຂອງການອອກແບບທັງໝົດ ແລະ ສຳເລັດການວາງທາງຂົວ 381 ຊ່ອງເສົາ ກວມເອົາ 37 ສ່ວນຮ້ອຍຂອງການອອກແບບທັງໝົດ ມາຮອດປະຈຸບັນນີ້ ຄະນະກຳມະການໄກ່ເກັ່ຍຂັ້ນທ້ອງຖິ່ນ ສາມາດມອບພື້ນທີ່ໃຫ້ແກ່ການກໍ່ສ້າງໄດ້ທັງໝົດ 400 ກວ່າ ກິໂລແມັດ, ເທົ່າກັບ 98 ສ່ວນຮ້ອຍຂອງລວງຍາວແລວທາງທັງໝົດ 409 ກິໂລແມັດ ຍັງເຫຼືອພຽງ 4,33 ກິໂລແມັດ ແລະ ນອກຈາກນີ້ການເບີກຈ່າຍຄ່າຊົດເຊີຍໄດ້ຮັບການຈັດຕັ້ງປະຕິບັດແລ້ວ, ໂດຍເລີ່ມການເບີກຈ່າຍຄ່າຊົດເຊີຍຕາມແຜນທີ່ເປັນບູລິມະສິດຂອງໂຄງການ ເຊິ່ງລວມທັງໝົດ 7 ງວດ ລວມມູນຄ່າ 851,53 ຕື້ກີບ ແລະ ໃນຮ່ວງເງີນງົບປະມານຂອງລັດຖະບານໃນບ້ວງເງີນ 250 ຕື້ກີບ, ໄດ້ໂອນໃຫ້ບັນດາແຂວງ ແລະ ນະຄອນຫຼວງສຳເລັດຮ້ອຍສ່ວນຮ້ອຍ ລວມມູນຄ່າ 507,92 ຕື້ກີບ ແລະ ອື່ນໆ, ພ້ອມນີ້ຜູ້ແທນກອງປະຊຸມຍັງໄດ້ປະກອບ ຄຳເຫັນເຂົ້າໃສ່ບັນດາວຽກງານຕ່າງໆຂອງໂຄງການ ເພື່ອພ້ອມກັນປັບປຸງແກ້ໄຂຂອດທີ່ຍັງຄົງຄ້າງໃຫ້ດີຂື້ນ ແລະ ນຳໄປຈັດຕັ້ງປະຕິບັດໃຫ້ສຳເລັດຕາມໂຄງການແຜນງານທີ່ວາງໄວ້.

 

 

Off

Comments are closed.