20th Dec2019

ຈັບຄາເຮືອນພັກ ພ້ອມເຮໂຣອິນ 43 ແທ່ງ

by somchan

ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດກອງບັນຊາການ ປກສ ແຂວງ ສົມທົບກັບກອງບັນຊາການ ປກສ ເມືອງຊຳເໜືອ ແຂວງຫົວພັນ ໄດ້ນຳກຳລັງຕຳຫຼວດວິຊາສະເພາະເຂົ້າຈັບເປົ້າໝາຍ ຄ້າຂາຍຢາເສບຕິດໄດ້ 4 ຄົນ ພ້ອມເຮໂຣອິນ 43 ແທ່ງ ໃນວັນທີ 5 ທັນວາ 2019 ໃນຄະນະທີ່ພວກກ່ຽວກຳລັງນັດສົ່ງຢູ່ເຮືອນພັກແຫ່ງໜຶ່ງພາຍໃນເທດສະບານເມືອງຊຳເໜືຶອ

ຜູ້ຖືກຫາທັງ 4 ຄົນຊື່ທ້າວ ຢົວເລົາ ອາຍຸ 25 ປີ ຢູ່ບ້ານຈຽງຕອງ ເມືອງປາກທາ, ທ້າວ ຢາຊົງ ອາຍຸ 29 ປີ ບ້ານພຽງຍະ ເມືອງຮຸນ ທັງ 2 ຄົນຢູ່ແຂວງອຸດົມໄຊ ແລະ ທ້າວ ວາຊົງຢາ ອາຍຸ 32 ປີ, ທ້າວ ຢຶເພັງທໍ່ ອາຍຸ 36 ປີ ທັງສອງຄົນຢູ່ບ້ານຊຳເໜືອ ເມືອງຊຳເໜືອ ແຂວງຫົວພັນ.

ເຊິ່ງພວກກ່ຽວທັງ 4 ຄົນເປັນເປົ້າໝາຍຕິດຕາມຂອງເຈົ້າໜ້າທີ່ມາໄດ້ໄລຍະໜຶ່ງແລ້ວ, ເນື່ອງຈາກພວກກ່ຽວໄດ້ມີການເຄື່ອນໄຫວລັກລອບພົວພັນຄ້າຂາຍຢາເສບຕິດຮ່ວມກັນ.

ຄະດີດັ່ງກ່າວ ເຈົ້າໜ້າທີ່ກຳລັງດຳເນີນການສືບສວນ-ສອບສວນເພື່ອຂະຫຍາຍຜົນຫາກຸ່ມແກ້ງທີ່ພົວພັນກັບຢາເສບຕິດໄປດຳເນີນຄະດີຕາມກົດໝາຍ.

Off

Comments are closed.