27th Dec2019

ຮັບຈ້າງຂົນສົ່ງຢາເສບຕິດ 50,000 ບາດ ຖືກຈັບພ້ອມຂອງກາງຢາໄອສ໌ 200 ຫໍ່

by somchan

 

ໃນວັນທີ 20 ທັນວາ 2019 ນີ້, ເຈົ້າໜ້າທີ່ຕຳຫຼວດຈຳປະຈຸດກວດກາ ບ້ານນາຫຼວງເມືອງຫ້ວຍຊາຍ ແຂວງບໍ່ແກ້ວ ໄດ້ຢຶດຢາເສບຕິດປະເພດຢາໄອສ໌ ຈຳນວນ 8 ເປົາ ມີ 200 ຫໍ່ ທີ່ຊຸກເຊື່ອງຢູ່ຫົວລົດບັນທຸກ 12 ລໍ້ ໝາຍເລກທະບຽນ ບຄ 1639 ກຳແພງນນະຄອນ, ພ້ອມທັງກັກຕົວຜູ້ຂັບຂີ່ ຊື່ທ້າວຫຼ່ຽມເພັດ ອາຍຸ 31 ປີ ຢູ່ບ້ານໜອງບົວວຽງ ເມືອງນ້ຳທາ  ແຂວງຫຼວງນ້ຳທາ ສົ່ງໃຫ້ເຈົ້າໜ້າທີ່ວິຊາສະເພາະດຳເນີນການສອບສວນ.

ຜ່ານການສືບສວນ-ສອບສວນ  ຂອງເຈົ້າໜ້າທີ່ຕຳຫຼວດ ຜູ້ກ່ຽວຮັບສາລະພາບວ່າ: ຢາເສບຕິດຈຳນວນດັ່ງກ່າວ ແມ່ນຂອງຄົນຮູ້ຈັກກັນ, ຕົນໄດ້ຮັບຈ້າງໃຫ້ຂົນສົ່ງໄປຈຸດໝາຍ, ເຊິ່ງຈະໄດ້ຄ່າຕອບແທນເປັນເງິນຈຳນວນ 50,000 ບາດ.

ຜູ້ກ່ຽວໃຫ້ການວ່າ: ໃນວັນທີ 20 ທັນວາ 2019 ຫຼານຊາຍຂອງເຈົ້າຂອງຢາເສບຕິດ (ຢາໄອສ໌) ໄດ້ພາໄປເອົາລົດ 12 ລໍ້ຄັນດັ່ງກ່າວ, ຢູ່ແຄມທາງໃຫຍ່ ເຂດທາງເຂົ້າບ້ານດອນທາດ. ຈາກນັ້ນ, ຕົນກໍ່ໄດ້ຂັບລົດບັນທຸກຄັນນັ້ນໄປຄົນດຽວ. ສ່ວນຜູ້ທີ່ມານຳກັນ ແມ່ນໄດ້ຂັບລົດວີໂກ້ແຄັບ ສີປອນທອງ ບໍ່ຕິດປ້າຍທະບຽນນຳທາງໄປກ່ອນ ໂດຍມີຈຸດໝາຍສົ່ງຢາເສບຕິດແມ່ນຢູ່ແຄມທາງໃຫຍ່ ເຂດບ້ານຈະເລີນສຸກ ເມືອງນ້ຳທາ ແຂວງຫຼວງນ້ຳທາ ແຕ່ພໍຮອດຈຸດກວດກາບ້ານນາຫຼວງ ເມືອງຫ້ວຍຊາຍ ຈຶ່ງຖືກເຈົ້າໜ້າທີ່ກວດຄົ້ນ ແລະ ກັກຕົວພ້ອມຢາໄອສ໌ ຈຳນວນ 8 ເປົາ ມີ 200 ຫໍ່.

ຜູ້ກ່ຽວຍັງໃຫ້ການຕື່ມອີກວ່າ: ຜ່ານມາເຄີຍຂັບລົດຂົນສົ່ງຢາເສບຕິດ (ຢາໄອສ໌) ມາແລ້ວ 2 ຄັ້ງຄື: ໃນເດືອນຕຸລາ ແລະ ເດືອນພະຈິກ 2019.

Off

Comments are closed.