21st Jan2020

ກອງປະຊຸມຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ຄັ້ງທີ 11 ລະຫວ່າງນະຄອນຫຼວງວຽງຈັນ ສປປ ລາວ ແລະ ຈັງຫວັດໜອງຄາຍ ຣາຊະອານາຈັກໄທ

by somchan

ກອງປະຊຸມໄດ້ຈັດຂຶ້ນໃນວັນທີ 18 ມັງກອນ 2020 ນີ້ ທີ່ໂຮງແຮມຄາວພາຊາ ນະຄອນຫຼວງວຽງຈັນ ຝ່າຍລາວນຳໂດຍທ່ານ ດຣ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ປະທານຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ນະຄອນຫຼວງວຽງຈັນ, ຝ່າຍໄທ ນຳໂດຍທ່ານ ຣົນນະໄຊ ຈິດວິເສດ ຜູ້ວ່າຣາຊະການຈັງຫວັດໜອງຄາຍ ປະທານຄະນະກຳມະການຮ່ວມືຮັກສາຄວາມສະຫງົບຮຽບຮ້ອຍຕາມຊາຍແດນ ຈັງຫວັດໜອງຄາຍ, ພ້ອມດ້ວຍບັນດາຄະນະກຳມະການ ທັງສອງຝ່າຍເຂົ້າຮ່ວມ.

ໃນກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນຂອງທັງສອງຝ່າຍ ໄດ້ພ້ອມກັນປຶກສາຫາລືໃນຂົງເຂດກົນໄກການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ເປັນຕົ້ນ, ດ້ານການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ຊື່ງທັງສອງຝ່າຍໄດ້ຮ່ວມກັນຈັດຕັ້ງປະຕິບັດຕາມບົດບັນທຶກ ທີ່ສອງຝ່າຍໄດ້ຕົກລົງກັນ ແລະ ພ້ອມກັນສະກັກດກັ້ນ, ແກ້ໄຂບັນຫາທີ່ບໍ່ດີເກີດຂຶ້ນຕາມບໍລິເວນຊາຍແດນເຊັ່ນ: ການຄ້າຂາຍເຖື່ອນ, ການຄ້າມະນຸດ, ການລະເມີດຊາຍແດນ, ບັນຫາແຮງງານທີ່ບໍ່ຖືກຕ້ອງ ແລະ ບັນຫາໃດ ທີ່ເຫັນວ່າເປັນການລະເມີດຕໍ່ລະບຽບກົດໝາຍຂອງສອງປະເທດ, ການຮ່ວມມືແກ້ໄຂ ກໍລະນີຄົນຂອງສອງຝ່າຍຖືກຈັບກຸມຄຸມຂັງ ຫຼື ກະທຳຜິດຕໍ່ລະບຽບກົດໝາຍ. ພ້ອມນັ້ນ, ທັງສອງຝ່າຍໄດ້ຮ່ວມມືກັນກວດກາ, ແລກປ່ຽນຂໍ້ມູນຂ່າວສານກ່ຽວກັບປະຊາຊົນສອງຝ່າຍທີ່ກະທຳຜິດຕໍ່ລະບຽບກົດໝາຍ ແລະ ຖືກຈັບກຸມຄຸມຄັງຢູ່ດິນແດນຂອງທັງສອງຝ່າຍ ເພື່ອປະສານຂໍການຮ່ວມມືເຊິ່ງກັນ ແລະ ກັນ ໃນການເຂົ້າຢ້ຽມຢາມຂອງຍາດພີ່ນ້ອງ ແລະ ເຈົ້າໜ້າທີ່ກ່ຽວຂ້ອງຫຼື ການມອບ-ຮັບຕົວນັກໂທດ, ຕ້ອງຫາໃຫ້ແຕ່ລະຝ່າຍ ເພື່ອກັບຄືນທ້ອງຖິ່ນຂອງຕົນ ເພື່ອດຳເນີນຕາມກົດໝາຍ, ສ່ວນການຮ່ວມມືປົກປັກຮັກສາພື້ນທີ່ຊາຍແດນ ແລະ ການແກ້ໄຂບັນຫາການດູດຫີນ-ຊາຍ ທີ່ທັງສອງຝ່າຍໄດ້ສົ່ງຂໍ້ມູນຂ່າວສານກ່ຽວກັບສະພາບການລວງລະເມີດໜ່ານ້ຳ, ຂອບເຂດຊາຍແດນ ຕາມລຳແມ່ນຳ້ຂອງ ແມ່ນໄດ້ປະຕິບັດຕາມບົດບັນທຶກກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ລະຫວ່າງນະຄອນຫຼວງວຽງຈັນ-ໜອງຄາຍ ຄັ້ງທີ 11.

ໃນໂອກາດດຽວກັນ, ທັງສອງຝ່າຍກໍໄດ້ລົງນາມເຊັນບົດບັນທຶກກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ ນະຄອນຫຼວງວຽງຈັນ-ຈັງຫວັດໜອງຄາຍ.

Off

Comments are closed.