21st Jan2020

ຄະນະກໍາມະການຄຸ້ມຄອງອິນເຕີເນັດ ແຫ່ງຊາດ ຈັດກອງປະຊຸມສະຫຼຸບວຽກງານປະຈຳປີ 2019 ແລະ ວາງທິດທາງ ປີ 2020

by somchan

ໃນວັນທີ 21 ມັງກອນ 2020 ທີ່ຫ້ອງປະຊຸມກະຊວງແຜນການ ແລະ ການລົງທືນ, ຄະນະກໍາມະການຄຸ້ມຄອງອິນເຕີເນັດ ແຫ່ງຊາດ ໄດ້ຈັດກອງປະຊຸມສະຫຼຸບວຽກງານປະຈຳປີ 2019 ແລະ ວາງທິດທາງປະຈຳປີ 2020 ຂື້ນຢ່າງເປັນທາງການ, ໂດຍການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທືນ, ປະທານຄະນະກໍາມະການຄຸ້ມຄອງອິນເຕີເນັດແຫ່ງຊາດ, ມີຄະນະປະທານບັນດາກະຊວງອ້ອມຂ້າງສູນກາງ ແລະ ຄະນະກຳມະການຈາກພາກສ່ວນທີ່ກ່ຽວຂ້ອງເຂົ້າຮ່ວມ ຢ່າງພ້ອມພຽງ.

ໃນໄລຍະ 1 ປີຜ່ານມາ, ຄະນະກໍາມະການຄຸ້ມຄອງອິນເຕີເນັດ ແຫ່ງຊາດ ໄດ້ເຄື່ອນໄຫວວຽກງານການຄຸ້ມຄອງອິນເຕີເນັດ ໃນ ສປປ ລາວ ຢ່າງເຂັ້ມງວດ, ເຊິ່ງເປັນໄລຍະທີ່ມີຫຼາຍເຫດການເກີດຂື້ນ ແລະ ທີ່ພົ້ນເດັ່ນ ກໍ່ແມ່ນບັນຫາຫາງສຽງສັງຄົມ ທີ່ຖືກເຜີຍແຜ່ເທີງອິນເຕີເນັດ ທີ່ໄດ້ເຮັດໃຫ້ເຫັນເຖິງຄວາມສຳຄັນໃນການຄຸ້ມຄອງອິນເຕີເນັດ, ເວົ້າສະເພາະກໍ່ແມ່ນສື່ສັງຄົມອອນລາຍ.ຄະນະກໍາມະການຄຸ້ມຄອງອິນເຕີເນັດ ແຫ່ງຊາດ ໄດ້ຊີ້ນຳຂະແໜງການທີ່ກ່ຽວຂ້ອງເອົາໃຈໃສ່ແກ້ໄຂບັນຫາດ້ວຍຮູບການຕ່າງໆ ຢ່າງມີປະສິດທິພາບ, ເປັນຕົ້ນແມ່ນການສ້າງ ແລະ ນຳໃຊ້ບັນດານິຕິກຳທີ່ກ່ຽວຂ້ອງກັບການຄຸ້ມຄອງອິນເຕີເນັດ, ໂດຍສະເພາະແມ່ນ ກົດໝາຍວ່າດ້ວຍ ການຕ້ານ ແລະ ສະກັດກັ້ນອາດຊະຍາກຳທາງຄອມພິວເຕີ ແລະ ດຳລັດວ່າດ້ວຍ ການຄຸ້ມຄອງຂໍ້ມູນຂ່າວສານຜ່ານອິນເຕີເນັດ, ໃຊ້ເປັນບ່ອນອີງໃນການຈັດຕັ້ງປະຕິບັດວຽກງານຄວບຄຸມ ແລະ ຈຳກັດການນຳໃຊ້ສື່ສັງຄົມອອນລາຍ ໄປໃນທາງທີ່ບໍ່ຖືກຕ້ອງ.

ວຽກງານທີ່ພົ້ນເດັ່ນທີ່ ຄະນະກໍາມະການຄຸ້ມຄອງອິນເຕີເນັດ ແຫ່ງຊາດ ໄດ້ຈັດຕັ້ງປະຕິບັດໃນຕະຫຼອດ 1 ປີທີ່ຜ່ານມາ ແມ່ນສຳເລັດການສ້າງດຳລັດ ວ່າດ້ວຍລະບົບສາຍສົ່ງໂທລະຄົມມະນາຄົມ, ການເຜີຍແຜ່ກົດໝາຍ ວ່າດ້ວຍລາຍເຊັນເອເລັກໂຕຣນິກ, ການກະກຽມສ້າງແຜນຍຸດທະສາດການຫັນເປັນດິຈິຕອນ, ການສ້າງເສດຖະກິດດິຈິຕອນ ແລະ ການກຽມຄວາມພ້ອມເພື່ອກ້າວເຂົ້າສູ່ຍຸກອຸດສາຫະກຳ 4,0. ນອກຈາກນີ້ ກໍ່ຍັງມີ ວຽກງານການເຜີຍແຜ່ຕອບຕ້ານ ແລະ ຕິດຕາມກວດກາບັນດາຫາງສຽງທີ່ບໍ່ດີໃນສັງຄົມ ໂດຍສະເພາະແມ່ນຜ່ານຊ່ອງທາງສື່ສັງຄົມອອນລາຍ, ເຊິ່ງໃນນີ້ບັນດາກະຊວງ ແລະ ຂະແໜງການທີ່ກ່ຽວຂ້ອງ ເຊັ່ນ: ກະຊວງປ້ອງ ກັນປະເທດ, ປະຊວງປ້ອງກັນຄວາມສະຫງົບ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງການຕ່າງປະເທດ, ກະຊວງສຶກສາທິການ ແລະ ກິລາ ແລະ ສູນກາງຊາວໜຸ່ມ ກໍ່ໄດ້ເຄື່ອນໄຫວປູກຈິດສຳນຶກໃຫ້ແກ່ພະນັກງານ ແລະ ສັງຄົມ, ໄດ້ສຳເລັດການຈັດກອງປະຊຸມລັດຖະມົນຕີໄອຊີທີອາຊຽນ ຄັ້ງທີ 19 ແລະ ກອງປະຊຸມເຈົ້າໜ້າທີ່ອາວຸໂສໄອຊີທີອາຊຽນ ຄັ້ງທີ 20 ທີ່ ສປປ ລາວ ເປັນເຈົ້າພາບ ທີ່ນະຄອນຫຼວງວຽງຈັນ, ໄດ້ມີການລົງໂຄສະນາເຜີຍແຜ່ຜົນດີຜົນຮ້າຍຂອງການນຳໃຊ້ສື່ສັງຄົມອອນລາຍ ຢູ່ໂຮງຮຽນມັດຖະຍົມ, ມະຫາວິທະຍາໄລຕ່າງໆ, ຜ່ານສື່ ແລະ ເວັບໄຊ້ທາງການຂອງ ບາງຂະ ແໜງການ.ໄດ້ປັບປຸງຊ່ອງທາງການປະສານງານເຮັດວຽກພາຍໃນ ໂດຍໄດ້ປັບປຸງຄືນ ການເຂົ້າເຖິງ-ການນຳໃຊ້ລະບົບອີເມວ ທີ່ຕິດຕັ້ງຢູ່ພາຍໃນປະເທດ ເພື່ອນຳສົ່ງ-ແລກປ່ຽນເອກະສານຕ່າງໆທາງເອເລັກໂຕຣນິກ ແລະ ຮັບປະກັນຄວາມປອດໄພໃຫ້ຫຼາຍຂື້ນ ປ້ອງກັນຂໍ້ມູນບໍ່ດີອອກໄປນອກປະເທດ. ຕິດພັນກັບການປ້ອງກັນຊາດ-ປ້ອງກັນຄວາມສະຫງົບ ວຽກງານກວດກາການນຳໃຊ້ຄື້ນຄວາມຖີ່ ແລະ ສັນຍາອິນເຕີເນັດທີ່ບໍ່ຖືກລະບຽບ, ວຽກງານການຂື້ນທະບຽນເບີໂທລະສັບ ແລະ ວຽກງານການຄຸ້ມຄອງລັດຖະບານເອເລັກໂຕຣນິກ ອຳນວຍຄວາມສະດວກໃຫ້ແກ່ການເຮັດວຽກຂອງພາກລັດຖະບານ, ເກັບກຳຂໍ້ມູນ ແລະ ການຕິດຕໍ່ສື່ສານພາຍໃນກົງຈັກ ລັດຢ່າງມີປະສິດທິພາບ ແລະ ປະສິດທິຜົນ.

Off

Comments are closed.