23rd Jan2020

ປກສ ແຂວງ ໄຊຍະບູລີ ສະຫຼຸບວຽກງານປະຈໍາປີ 2019 ແລະ ກໍານົດທິດທາງຈຸດສຸມປີ 2020

by somchan

ກອງປະຊຸມສະຫຼຸບວຽກງານ ປ້ອງກັນຄວາມສະຫງົບ ທົ່ວແຂວງ ໄຊຍະບູລີ ປະຈໍາປີ 2019 ແລະ ກໍານົດທິດທາງແຜນການວຽກງານຈຸດສຸມປີ 2020 ໄດ້ຈັດຂຶ້ນໃນລະຫວ່າງວັນທີ 20 – 21 ມັງກອນ 2020 ນີ້ ຢູ່ທີ່ສະໂມສອນ ກອງບັນຊາການ ປກສ ແຂວງ ພາຍໃຕ້ການເປັນປະທານຂອງ ພັອ ຄໍາແພງ ເພັດ ຫົວໜ້າ ກອງບັນຊາການ ປກສ ແຂວງ, ມີບັນດາ ຄະນະກອງບັນຊາການ ປກສ ແຂວງ, ແຂກຖືກເຊີນຈາກ ກອງບັນຊາການທະຫານແຂວງ, ຫົວໜ້າ – ຮອງຫົວໜ້າຫ້ອງ, ກອງອ້ອມຂ້າງ, ມີຫົວໜ້າກອງບັນຊາການ ປກສ ເມືອງ, ຫົວໜ້າດ່ານສາກົນ ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມ.

ໃນກອງປະຊຸມສະຫຼຸບຄີລາຄາຄືນການຈັດຕັ້ງປະຕິບັດວຽກງານປ້ອງກັນຄວາມສະຫງົບທົ່ວແຂວງໄຊຍະບູລີ ໃນໄລຍະຜ່ານມາ. ພ້ອມທັງໄດ້ ຕີລາຄາສະພາບການອັນພົ້ນເດັ່ນ ທີ່ພົວພັນເຖິງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ, ບັນຫາທີ່ເປັນສິ່ງທ້າທາຍໃຫ້ແກ່ການຈັດຕັ້ງ ແລະ ເຄື່ອນໄຫວ ວຽກງານປ້ອງກັນຄວາມສະຫງົບ ໃນໄລຍະຜ່ານມາ. ໂດຍພາຍໃຕ້ການຊີ້ນໍາ – ນໍາພາເດັດຂາດ, ໂດຍກົງ ແລະ ຮອບດ້ານຂອງປະທານປ້ອງກັນຊາດ – ປ້ອງກັນຄວາມສະຫງົບແຂວງ, ກໍ່ຄືຄະນະພັກ ກະຊວງປ້ອງກັນຄວາມສະຫົງບ; ໃນປີຜ່ານມາ ຄະນະພັກ – ຄະນະບັນຊາແຕ່ລະຂັ້ນ ໄດ້ເອົາໃຈໃສ່ເຮັດວຽກງານສຶກສາອົບຮົມການເມືອງ – ແນວຄິດ ໃຫ້ບັນດາສະຫາຍນາຍ ແລະ ພົນຕໍາຫຼວດທົ່ວກໍາລັງ ມີທັດສະນະຫຼັກໜັ້ນ, ການເມືອງໜັກແໜ້ນ, ພ້ອມກັນບຸກບືນຜ່ານຜ່າຂໍ້ຫຍຸ້ງຍາກກ້າວຂື້ນເຮັດສໍາເລັດໜ້າທີ່ການເມືອງທີ່ພັກ – ລັດ ແລະ ປະຊາຊົນມອບໝາຍ ຍາດໄດ້ຜົນງານອັນພົ້ນເດັ່ນຫຼາຍດ້ານ ເຊິ່ງໄດ້ປະກອບສ່ວນອັນສໍາຄັນເຮັດໃຫ້ສະພາບໂດຍລວມໃນທົ່ວແຂວງ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂອງແຂວງຂະຫຍາຍຕົວຢ່າງຕໍ່ເນື່ອງ, ປະຊາຊົນບັນດາເຜົ່າໄດ້ດໍາລົງຊີວິດຢ່າງສະຫງົບສຸກ ແລະ ປະກອບສ່ວນເຂົ້າໃນວຽກງານປ້ອງກັນຊາດ – ປ້ອງກັນຄວາມສະຫງົບຢ່າງເປັນຂະບວນກວ້າງຂວາງ. ພ້ອມນັ້ນ ຜູ້ເຂົ້າຮ່ວມກອງປະຊຸມໄດ້ປະກອບຄຳຄິດຄຳເຫັນໃສ່ບົດສະຫຼຸບ ແລະ ທິດທາງແຜນການ ເພື່ອພ້ອມກັນນຳໄປຈັດຕັ້ງປະຕິບັດໃນປີ 2020 ໃຫ້ສຳເລັດຜົນຕາມຄາດໝາຍ.

ໂອກາດນີ້, ພັອ ຄໍາແພງ ເພັດ ຫົວໜ້າກອງບັນຊາການ ປກສ ແຂວງ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ ພ້ອມທັງໃຫ້ທິດຊີ້ນໍາວຽກງານຈຸດສຸມໃນປີຕໍ່ໜ້າ,ໂດຍເນັ້ນໜັກ ບັນດາສະຫາຍຄະນະພັກ – ຄະນະບັນຊາແຕ່ລະກົມກອງ ຈົ່ງນໍາເອົາເນື້ອໃນຈິດໃຈກອງປະຊຸມຄັ້ງນີ້ ໄປສືບຕໍ່ຄົ້ນຄວ້າໃຫ້ເລິກເຊິ່ງ ພ້ອມທັງຜັນຂະຫຍາຍລົງສູ່ຂົງເຂດວຽກງານວິຊາສະເພາະໃຫ້ທົ່ວເຖິງ ແລະ ນໍາພາຈັດຕັ້ງປະຕິບັດ ໃຫ້ປະສົບຜົນສໍາເລັດຕາມຄາດໝາຍ.

 

 

Off

Comments are closed.