24th Jan2020

ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ຕັດສິນຄະດີຢາເສບຕິດ 22 ຄົນ ປະຫານຊີວິດ 8 ຄົນ

by somchan

ພາຍຫຼັງທີ່ ປະເທດຊາດ ໄດ້ຮັບການສະຖາປະນາເປັນ ສາທະລະນະລັດ ປະຊາທິປະ ໄຕ ປະຊາຊົນລາວ, ພັກ ແລະ ລັດຖະບານ ໄດ້ສຸມໃສ່ນໍາພາປະຕິບັດສອງຫນ້າທີ່ຍຸດທະສາດ ຄື ປົກປັກ ຮັກສາ ແລະ ສ້າງສາພັດທະນາປະເທດຊາດ ໃຫ້ກ້າວເຂົ້າສູ່ຄວາມຈະເລີນສີວິໄລ, ນໍາພາປະຊາຊົນ ໃຫ້ຫຼຸດພົ້ນຈາກທຸກຍາກ ແລະ ນໍາເອົາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະ ນາ ແຕ່ວ່າການທີ່ຈະເຮັດໄດ້ຕາມຄວາມມຸ້ງຫມາດປາຖະຫນານັ້ນ, ກໍ່ມີຄວາມຫຍຸ້ງຍາກພໍສົມຄວນ ເນື່ອງຈາກວ່າຍັງມີກຸ່ມຄົນບໍ່ດີ ທີ່ເປັນຫນໍ່ແຫນງສ້າງຄວາມບໍ່ສະຫງົບທາງດ້ານການເມືອງ ສ້າງຄວາມບໍ່ເປັນລະບຽບຮຽບຮ້ອຍທາງສັງຄົມ ໂດຍສະເພາະແມ່ນບັນຫາຢາເສບຕິດ ທີ່ເປັນຕົ້ນເຫດ ເຮັດໃຫ້ ເກີດປະກົດການຫຍໍ້ທໍ້ຕ່າງໆ ເຊັ່ນ: ຄາດຕະກໍາ, ລັກຊັບ, ປຸ້ນຊັບ, ກໍ່ອາລະວາດ ແລະ ອາຊະຍາກໍາ ອື່ນໆ.

ເຊິ່ງຕະຫຼອດໄລຍະທີ່ຜ່ານມາ ພັກ-ລັດຖະບານ ກໍ່ຄືເຈົ້າຫນ້າທີ່ ທີ່ກ່ຽວຂ້ອງໄດ້ເອົາໃຈໃສ່ໃນ ການເຄື່ອນໄຫວສະກັດກັ້ນ ແລະ ແກ້ໄຂ ຢ່າງເອົາຈິງເອົາຈັງ ແລະ ສາມາດແກ້ໄຂໄດ້ຫຼາຍກໍລະນີ ເຊິ່ງສະແດງອອກ ໃນ ປີ 2016-2017 ເຈົ້າຫນ້າທີ່ວິຊາສະເພາະ ໄດ້ແກ້ໄຂຂະບວນການ ຄ້າຂາຍຢາ ເສບຕິດລາຍໃຫຍ່ ກັກຕົວຜູ້ຖືກຫາໄດ້ຈໍານວນ 22 ຄົນ ຈາກນັ້ນຈຶ່ງໄດ້ດໍາເນີນຄະດີຕາມຂັ້ນຕອນ ຂອງກົດຫມາຍ, ຈົນມາຮອດວັນທີ 23 ມັງກອນ 2020 ສານປະຊາຊົນຂັ້ນຕົ້ນ ນະຄອນຫຼວງວຽງ ຈັນ ໄດ້ນໍາເອົາຈໍາເລີຍ 22 ຄົນ ມາພິຈາລະນາຕັດສິນ, ໃນນີ້ມີ 8 ຄົນຖືກຕັດສິນປະຫານຊີວິດ.

ຜ່ານການຄົ້ນຄວ້າບັນດາຂໍ້ມູນຫຼັກຖານ ແລະ ເອກະສານຕ່າງໆ ທີ່ມີຢູ່ ໃນສໍານວນຄະດີ ພ້ອມທັງພິຈາລະນາຜົນຂອງການໄຕ່ສວນໃນທີ່ປະຊຸມສານ ຢ່າງລະອຽດຖີ່ຖ້ວນ, ຮອບດ້ານ ແລະ ພາລະວິໄສສານ ຈຶ່ງໄດ້ຕັດສິນລົງໂທດພວກຈໍາເລີຍດັ່ງນີ້:

– ລົງໂທດຕັດສີນປະຫານຊີວິດຈໍານວນ8 ຄົນ ຄື: ທ້າວ ກິນ້ອຍ, ນາງ ປາວິນາ ທ້າວ ຫວາດ, ນາງ ແກ້ວ, ທ້າວ ຄອນປະສົງ , ນາງ ມະນີວັນ , ທ້າວ ໄມແສງຊອນ ແລະ ທ້າວ ເພັດສາຄອນ.

– ໄດ້ຕັດສິນລົງໂທດ; ທ້າວ ສົມບູນ ຈໍາຄຸກ 20 ປີ ປັບໃຫມ 105.500.000 ກີບ;ທ້າວ | ບນທີ ຈໍາຄຸກ 10 ປີປັບໃຫມ 100.000.000ກີບ; ນາງ ໂນນ ຈໍາຄຸກ 20 ປີ ປັບໃຫມ 600.000.000 ກີບ; ທ້າວ ສົມດີ ຈໍາຄຸກ 19 ປີ ປັບໃຫມ 601.000.000 ກີບ;ນາງ ບົວໄລ, ເຊິນ ຈໍາຄຸກ 3 ປີ 3 ເດືອນ ປັບໃຫມ ຕາມລະບຽບການ 10% ຂອງມູນຄ່າ, ທ້າວຕູ້ຍ ຈໍາຄຸກ 20ປີປັບໃຫມ 105.000.000 ກີບ; ທ້າວ ສົມນຶກ ຈໍາຄຸກ 16 ປີ 6 ເດືອນ ປັບໃຫມ 64.500.000 ກີບ; ນາງ ບົວສີ ຈໍາຄຸກ 15 ປີ ປັບໃຫມ 60.000.000 ກີບ; ທ້າວ ທະນົງສັກ ຈໍາຄຸກ 6 ປີ ປັບ ໃຫມ 11.000.000 ກີບ; ທ້າວ ລະພິພົງ ຈໍາຄຸກ 10 ປີ ປັບໃຫມ 15.000.000 ກີບ; ທ້າວ ສົມບັດ ຈໍາຄຸກ 10 ປີ ປັບໃຫມ 15.000.000 ກີບ; ນາງ ອ່ອນ ຈໍາຄຸກ 13 ປີ 6 ເດືອນ ປັບໃຫມ 522.000.000 ກີບ; ທ້າວ ອິດທິສັກ ຈໍາຄຸກ 5 ປີ 3 ເດືອນ ປັບໃຫມ 10.200.000 ກີບ ແລະທ້າວ ໂອລົດ ຈໍາຄຸກ 2 ປີປັບໃຫມ 2.000.000ກີບ,ນອກນີ້ສານຍັງໄດ້ຍຶດຊັບທີ່ພົວພັນກັບການກະທໍາຜິດຂອງພວກຈໍາເລີຍໃນຄັ້ງນີ້ ເຊັ່ນ: ເຮືອນ , ທີ່ດີນ, ລົດ, ຊັບສິນທີ່ມີຄ່າ ແລະ ອື່ນໆ ເຂົ້າເປັນຂອງລັດ.ຄວາມເສຍຫາຍທີ່ເກີດຂຶ້ນຈາກການເຄື່ອນໄຫວຂອງພວກກ່ຽວ ມັນມີຜົນກະທົບຢ່າງໃຫຍ່ ຫຼວງຕໍ່ຄວາມຫມັ້ນຄົງຂອງຊາດ, ສະຖຽນລະພາບທາງດ້ານການເມືອງ, ສ້າງຄວາມເສື່ອມເສຍໃຫ້ ແກບົດບາດຂອງຊາດ, ມີຜົນກະທົບຕໍ່ກັບລະບົບເສດຖະກິດ ເປັນການກົດຫນ່ວງທ່ວງດຶງການ ພັດທະນາປະເທດຊາດ, ນອກນັ້ນ, ຍັງໄດ້ທໍາລາຍລູກຫຼານ, ຊາວຫນຸ່ມ-ຍິງສາວ ທີ່ເປັນກໍາລັງແຮງ ຂອງຊາດໃຫ້ສູນເສຍສຸຂະພາບກາຍ, ສຸຂະພາບຈິດ, ພາໃຫ້ເກີດປະກົດການຫຍໍ້ທໍ້ຕ່າງໆຢູ່ ໃນ ຄອບຄົວ ແລະ ສັງຄົມ.

ໂດຍເຫັນໄດ້ຄວາມໂຫດຮ້າຍແລະ ໄພອັນຕະລາຍດັ່ງກ່າວ ລັດຖະບານ ກໍ່ຄືການນໍາ ກະຊວງປ້ອງກັນຄວາມສະຫງົບກໍ່ໄດ້ເອົາໃຈໃສ່ຊີ້ນໍາເຈົ້າຫນ້າທີ່ວິຊາສະເພາະທີ່ກ່ຽວຂ້ອງປະສານສົມ ກັນຢ່າງແຫນ້ນຫນາ, ນໍາໃຊ້ເຕັກນິກວິຊາສະເພາະ ຕິດຕາມ, ເກັບກໍາຂໍ້ມູນການເຄື່ອນໄຫວຂອງພວກກ່ຽວຢ່າງໃກ້ສິດ,ຖືກຕ້ອງຕາມຫຼັກການວິຊາສະເພາະຈົນມາດແກ້ໄຂຄະດີດັ່ງກ່າວໄດ້ໃນທີ່ສຸດ.ການກະທໍາຜິດຕໍ່ລະບຽບກົດຫມາຍ ເປັນການທໍລະຍົດຕໍ່ຕົນເອງ ແລະ ບັນພະບຸລຸດ, ເປັນ ການທໍາຮ້າຍສັງຄົມ ແລະ ປະເທດຊາດ, ສະນັ້ນ, ຂໍໃຫ້ທຸກຄົນໃນສັງຄົມ ຈົ່ງຫຼີກລ່ຽງການກະທໍາທີ່ຜິດຕໍ່ລະບຽບກົດຫມາຍ, ບໍ່ໄປພົວພັນກັບບັນຫາຢາເສບຕິດ, ເປັນເຈົ້າການຕ້ານ ແລະ ສະກັດກັ້ນບັນຫາຢາເສບຕິດເອົາໃຈໃສ່ສຶກສາອົບຮົມຄົນໃນຄອບຄົວບໍ່ໃຫ້ໄປພົວພັນກັບຢາເສບຕິດ ຫຼືອະບາຍຍະມຸກທຸກປະເພດ ເພື່ອໃຫ້ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍ ຊີວິດຂອງທຸກຄົນມີຄວາມປອດໄພ.

 

Off

Comments are closed.