21st Feb2020

ປະກາດແຕ່ງຕັ້ງອຳນວຍການລັດວິສາຫະກິດ ລາວບໍລິການຄວາມປອດໄພ-ລະຫວ່າງປະເທດ

by somchan

ກະຊວງ ປກສ ຈັດພິທີປະກາດແຕ່ງຕັ້ງ ອຳນວຍການລັດວິສາຫະກິດ ລາວບໍລິການຄວາມປອດໄພ-ລະຫວ່າງປະເທດ ໃນວັນທີ 19 ກຸມພາ 2020 ໂດຍການເຂົ້າຮ່ວມຂອງ ພົຕ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ມີບັນດາຄະນະພັກ-ຄະນະບັນຊາພາຍໃນລັດວິສາຫະກິດເຂົ້າຮ່ວມ.

ພັທ ສົມພອນ ແກ້ວພູທອນ ຮອງຫົວໜ້າກົມຈັດຕັ້ງພະນັກງານ ໄດ້ຜ່ານຂໍ້ຕົກລົງຂອງລັດຖະມົນຕີ ກະຊວງປ້ອງກັນຄວາມສະຫງົບ ສະບັບເລກທີ 244/ປກສ, ລົງວັນທີ 31 ມັງກອນ 2020, ວ່າດ້ວຍການແຕ່ງຕັ້ງ ອຳນວຍການ ລັດວິສາຫະກິດ ລາວບໍລິການຄວາມປອດໄພ-ລະຫວ່າງປະເທດ ເຊິ່ງໄດ້ ຕົກລົງແຕ່ງຕັ້ງ ພັທ ລີຕູ້ ມີໄຊຕູ້ ເປັນອຳນວຍການ ລັດວິສາຫະກິດ ລາວບໍລິການຄວາມປອດໄພ-ລະຫວ່າງປະເທດ, ສ່ວນຮອງທີ່ມີຢູ່ແລ້ວແມ່ນຮັກສາໄວ້ຄືເກົ່າ.

ໃນພິທີຍັງໄດ້ມອບຮັບໜ້າທີ່ລະຫວ່າງ ພັອ ດຳດີ ອ້ວນມະນີວົງ ອຳນວຍການ ລັດວິສາຫະກິດ ລາວບໍລິການຄວາມປອດໄພ-ລະຫວ່າງປະເທດ ຜູ້ເກົ່າ ແລະ ພັທ ລີຕູ້ ມີໄຊຕູ້ ອຳນວຍການ ລັດວິສາຫະກິດ ລາວບໍລິການຄວາມປອດໄພ-ລະຫວ່າງປະເທດ ຜູ້ໃໝ່.

ໂອກາດດຽວກັນ, ພົຕ ກົງທອງ ພົງວິຈິດ ໄດ້ສະແດງຄວາມຍ້ອງຍໍຊົມເຊີຍຕໍ່ຫົວໜ້າອຳນວຍການຜູ້ເກົ່າ ຕະຫຼອດຮອດຄະນະພັກ-ຄະນະບັນຊາ, ພະນັກງານ ທົ່ວລັດວິສາຫະກິດທີ່ໄດ້ທຸ້ມເທເຫືຶ່ອ, ແຮງ, ສະຕິປັນຍາ, ມີຄວາມອົດທົນສູ້ຊົນເຂົ້າໃນວຽກງານການເມືອງ ແລະ ໜ້າທີ່ວຽກງານວິຊາສະເພາະ ເພື່ອສ້າງລາຍຮັບໃຫ້ແກ່ລັດວິສາຫະກິດ ແລະ ກະຊວງ; ພ້ອມທັງເນັ້ນໃຫ້ຄະນະພັກ, ຄະນະອໍານວຍການ ຜູ້ໃໝ່ ເອົາໃຈໃສ່ຄວາມສາມັກຄີເປັນເອກະພາບພາຍໃນໃຫ້ໜັກແໜ້ນ ປະຕິບັດແບບແຜນວິທີເຮັດວຽກຕາມຫຼັກການລວມສູນປະຊາທິປະໄຕ ຕົກລົງເປັນໝູ່ຄະນະມອບວຽກໃຫ້ບຸກຄົນຮັບຜິດຊອບ ເພື່ອຮັບປະກັນໃຫ້ໜ້າທີ່ການເມືອງທີ່ພັກ-ລັດມອບໝາຍໃຫ້ມີຜົນສຳເລັດ; ນອກນີ້, ຕ້ອງສືບຕໍ່ດໍາເນີນທຸລະກິດໃຫ້ມີຜົນກໍາໄລ ແລະ ປະຕິບັດພັນທະຖືກຕ້ອງຕາມຂໍ້ກໍານົດ ຂອງ ກະຊວງວາງອອກ ພ້ອມປະຕິບັດພັນທະອາກອນໃຫ້ທ່ວງທັນເວລາ; ເອົາໃຈໃສ່ ແລະ ຂະຫຍາຍຕະຫຼາດໃຫ້ກ້ວາງຂວ້າງ, ປະກອບອຸປະກອນເຕັກນິກ ຊ່ວຍໜູນ, ກ້າວສູ່ຫັນເປັນທັນສະໄໝເທື່ອລະກ້າວ.

ຂ່າວຍັງໃຫ້ຮູ້ອີກຕື່ມວ່າ: ກອງບັນຊາການປ້ອງກັນສູນກາງ ກະຊວງປ້ອງກັນຄວາມສະຫງົບ ໄດ້ຈັດພິທີມອບຮັບໜ້າທີ່ລະຫວ່າງ ພັອ ຄຳເຄື່ອງ ບຸນວິໄລ ຫົວໜ້າກອງບັນຊາການປ້ອງກັນສູນກາງຜູ້ເກົ່າ ແລະ ພັອ ສົມພົງ ຂຳວິລຸນ ຫົວຫນ້າກອງບັນຊາການປ້ອງກັນສູນກາງຜູ້ໃໝ່, ໃນວັນທີ 20 ກຸມພາ 2020 ນີ້ ມີຄະນະພັກຄະນະກອງບັນຊາການເຂົ້າຮ່ວມ.

ໃນການມອບຮັບໜ້າທີຄັ້ງນີ້ ເພື່ອຕອບສະໜອງກັບຄວາມຮຽກຮ້ອງຕ້ອງການ ຂອງໜ້າທີ່ການເມືອງ ທັງເປັນການປັບປຸງກົງຈັກການຈັດຕັ້ງ ຢູ່ແຕ່ລະຂັ້ນໃຫ້ມີຄວາມຖືກຕ້ອງ ສອດຄ່ອງກັບສະພາບຕົວຈິງ ແລະ ຖືກຕ້ອງຕາມແນວທາງຂອງພັກ-ກົດໝາຍຂອງລັດ ແລະ ຂອງກຳລັງປ້ອງກັນຄວາມສະຫງົບວາງອອກຢ່າງເຂັ້ມງວດ, ທັງເປັນການເສີມຂະຫຍາຍໜ້າທີວຽກງານວິຊາສະເພາະ ໃຫ້ມີຄວາມກ້າວໜ້າທັນສະໄໝຂື້ນ, ພ້ອມນີ້ຫົວໜ້າກອງບັນຊາການ ປ້ອງກັນສູນກາງຜູ້ເກົ່າ ແລະ ຫົວໜ້າກອງບັນຊາການປ້ອງກັນສູນກາງຜູ້ໃໝ່ ຍັງໄດ້ເຊັ້ນບົດບັນທືກ ມອບ-ຮັບໜ້າທີຢ່າງເປັນທາງການ

 

Off

Comments are closed.