30th Mar2020

ລັດຖະບານຈີນ ມອບອຸປະກອບດ້ານການແພດຊ່ວຍປະເທດລາວ ຕ້ານພະຍາດ ໂຄວິດ-19 ລວມມູນຄ່າເກືອບ 4 ຕື້ກີບ

by somchan

ໃນວັນທີ 30 ມີນາ 2020 ນີ້ ລັດຖະບານ ສປ ຈີນ ໄດ້ນຳເອົາອຸປະກອນຮັບໃຊ້ດ້ານການແພດມາມອບໃຫ້ ລັດຖະບານ ສປປ ລາວ ຢູ່ທີ່ສາງພະລາທິການການແພດ ເຂດດົງໂພສີ ເມືອງຫາດຊາຍຟອງ ນະຄອນຫລວງວຽງຈັນ ກ່າວມອບໂດຍທ່ານ ວາງຊິຮຸ່ຍ ທູດທີ່ປຶກສາເສດຖະກິດການຄ້າ ສປ ຈີນ ປະຈຳ ສປປ ລາວ ກ່າວຮັບໂດຍ ທ່ານ ປອ ດຣ ບຸນແຝງ ພູມມະໄລສິດ ຮອງນາຍົກລັດຖະມົນຕີ ກະຊວງສາທາລະນະສຸກ ມີຕ່າງຫນ້າຈາກສຳນັກງານນາຍົກລັດຖະມົນຕີ ຄະນະກຳມາທິການຮ່ວມມື ລາວ-ຈີນ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ວາງຊິຮຸ່ຍ ໄດ້ກ່າວວ່າ: ເຄື່ອງອຸປະກອນຮັບໃຊ້ທາງການແພດທີ່ນຳມາມອບໃຫ້ໃນຄັ້ງນີ້ປະກອບມີ: ຫນ້າກາກອານະໄນທົ່ວໄປ ຈຳນວນ 4 ແສນອັນ ຫນ້າກາກອານະໄນ N95 ຈຳນວນ 5 ພັນອັນ ເສື້ອຊຸດປ້ອງກັນຕົນເອງ 5 ພັນຊຸດ ນ້ຳຢາກວດຫາເຊື້ອພະຍາດ ໂຄວິດ-19 ຈຳນວນ 2 ຫມື່ນກວ່າຊຸດ ລວມມູນຄ່າເກືອບ 4 ຕື້ກີບ ໂດຍຈຳນວນຫນຶ່ງແມ່ນໄດ້ຮັບການສະຫນັບສະຫນູນຈາກມູນລະນິທິ ແຈັກມ່າ.

ໃນໂອກາດນີ້ ທ່ານ ປອ ດຣ ບຸນແຝງ ພູມມະໄລສິດ ກໍ່ໄດ້ກ່າວຄຳຂອບໃຈຕໍ່ລັດຖະບານກໍ່ຄືປະຊາຊົນຈີນ ທີ່ເຫັນໄດ້ຄວາມຫຍຸ້ງຍາກຂາດເຂີນ ແລະໄດ້ນຳເອົາເຄື່ອງດັ່ງກ່າວມາມອບໃຫ້ ເຊິ່ງສະແດງໃຫ້ເຫັນນ້ຳມິດຕະພາບ ແລະຄູ່ຮ່ວມຊະຕາກຳດຽວກັນ ຄວາມເອື້ອເຟືອເພື່ອແຜ່ທີ່ມີຕໍ່ກັນ ແລະກັນ ຊຶ່ງເຄືອງອຸປະກອນນີ້ ທາງລັດຖະບານ ສປປ ລາວ ຈະນຳໃຊ້ເຂົ້າໃນການຕ້ານພະຍາດໂຄວິດ-19 ຢ່າງມີປະສິດທິຜົນ

Off

Comments are closed.