09th Apr2020

ວັນທີ 9 ເມສາ ພົບຜູ້ຕິດເຊື້ອໂຄວິດ-19 ເພີ່ມ 1 ຄົນ ລວມ16ຄົນ

by somchan

ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ປະຈໍາວັນທີ 9 ເມສາ ປີ2020 ໂດຍ: ທ່ານ ຮສ ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດ

I. ສະພາບການ COVID-19 ໃນທົ່ວໂລກ

ມາຮອດເວລາ 6:00 ໂມງເຊົ້າ ຂອງວັນທີ 09 ເມສາ 2020, ທົ່ວໂລກມີລາຍງານກໍລະນີທັງໝົດ 209(ປະເທດ/ເຂດກໍລະນີຢັ້ງຢືນຜູ້ຕິດເຊື້ອພະຍາດ COVID-19 1,508,924 (ໃໝ່ 77,943). ເສຍຊິວິດ 88,318 (ໃໝ່ 6,282)   ແລະ ປີ່ນປົວຫາຍດີ 329,556 ອັດຕາຄວາມຮ້າຍແຮງ 5.85 % (ມື້ວານນີ້ 5, 74)

II. ການເຝົ້າລະວັງ COVID-19 ປະຈຳດ່ານ ໃນ ສປປ ລາວ ຮອດ 5 ໂມງແລງ ຂອງວັນທີ 8 ເມສາ 2020ຕາມດ່ານຊາຍແດນ ແລະ ສະໜາມບິນສາກົນ
1. ວຽກງານຈຸດຜ່ານດ່ານ

ຈໍານວນຜູ້ເດີນທາງເຂົ້າມາ ທັງໝົດມີ 1,528 ຄົນ

ຈໍານວນຜູ້ເດີນມທາງຜ່ານທາງດ່ານລາວ-ໄທ ທັງໝົດ 776 ຄົນ, ໃນນັ້ນ 668 ຄົນ ແມ່ນພະນັກງານຂັບລົດບັນທຸກຂົນສິນຄ້າ ແລະ 108 ຄົນ ແມ່ນແຮງງານລາວທີ່ຍັງເດີນທາງກັບບ້ານ.
ຜູ້ເດີນມທາງຜ່ານ ດ່ານລາວ-ຈີນ ທັງໝົດ 124 ຄົນ, ພະນັກງານຂັບລົດທັງໝົດ
ຜູ້ເດີນ ຜ່ານດ່ານລາວ-ຫວຽດ ທັງໝົດ 628 ຄົນ, ພະນັກງານຂັບລົດທັງໝົດ
ຜ່ານສະໜາມບິນ 00 ຄົນ
ໃນທຸກດ່ານແມ່ນໄດ້ກວດວັດ ອຸນຫະພູມຮ່າງກາຍແລະ ບໍ່ມີຄົນເປັນໄຂ້
2. ການເຝົ້າລະວັງ ແລະ ວິເຄາະ
ວັນທີ 8 ເມສາ 2020 ໄດ້ເກັບຕົວຢ່າງມາກວດ 122 ຄົນ, ໃນນີ້ແມ່ນຜູ້ສຳພັດໃກ້ຊິດກັບຜູ້ຕິດເຊື້ອ ມີ 73 ຄົນ, ຈາກ ບໍລິສັດພູເບັຍມາຍນິງ 42, ແງງານລາວມາຈາກປະເທດໄທ 2, ກໍລະນີ ສົງໃສ 5,ໃນນີ້ ພົບຜູ້ຕິດເຊື້ອ 1 ຄົນ.
ນັບແຕ່ເດືອນ ມັງກອນ ຮອດ ວັນທີ 8 ເມສາ 2020,ລວມມີ 903 ຄົນ, ຕິດເຊື້ອ ທັງໝົດ 16 ຄົນ (ເພີ້ມ1),  ເຊິ່ງມີ 5 ກຸ່ມ ການສຳພັດ ແລະ ຕິດພະຍາດ
ກໍລະນີຕິດເຊື້ອພະຍາດຄົນທີ 16, ເພດຍິງ ອາຍຸ 23 ປີ, ນັກສຶກສາຢູ່ວິທະຍາໄລລັດຕະນະ, ບ້ານໜອງດ້ວງ, ເມືອງ ສີໂຄດຕະບອງ, ນະຄອນຫຼວງວຽງຈັນ

ປະຫວັດການສຳພັດກັບພະຍາດ:

o ວັນທີ 26 ມີນາ ແມ່ນໄດ້ມີການຊຸມແຊວກັບ ກໍລະນີທີ # 10 (ພະນັກງານ DHL)
o ວັນທີ 27 ມີນາ ໄດ້ຮູ້ຂ່າວວ່າ ກໍລະນີທີ # 10(ພະນັກງານ DHL) ຕິດພະຍາດ ລາວຈິ່ງຈຳກັດບໍລິເວນໂຕເອງຢູ້ຫ້ອງພັກ, ບໍ່ໄດ້ອອກໄປ ທາງໃດຈົນຮອດວັນທີ 6 ເມສາ.
o ວັນທີ 7 ເມສາ ເລີ່ມຮູ້ສຶກເຈັບຫົວ, ຖືຄີງໄຂ້, ລີ້ນຊາ, ດັງບໍ່ໄດ້ກິ່ນ, ມີຂີ້ກະເທີ ແລະ ຫາຍໃຈຝືດ ແຕ່ຍັງບໍ່ກວດ
o ວັນທີ 8 ເມສາ, ອາການລີ້ນຊາຫຼາຍຂຶ້ນ, ດັງບໍ່ມີກິ່ນ, ຫາຍໃຈແສບດັງ, ໄຂ້ ແລະ ມີອາການຫາຍໃຈຝືດ, ຜູ້ກຽວໂທປຶກສາແພດ, ລົດນຳສົ່ງຄົນເຈັບໄດ້ຮັບໄປໂຮງໝໍ ມິດຕະພາບ ພ້ອມເກັບຕົວຢ່າງ ແລະ ກວດພົບວ່າ ຕິດເຊື້ອ,
o ມີຜູ້ສຳພັດໃກ້ຊິດກັັບຜູ້ກ່ຽວ 9 ຄົນ, ເຊິ່ງໄດ້ມີເບີໂທລະສັບຕິດຕໍ່ ແລະ ໄດ້ແນະນຳ ຈຳກັດລິເວນຕົນເອງແລ້ວ.
ຈຳານວນຜູ້ສໍາຜັດໃກ້ຊິດທັງໝົດທີ່ໄດ້ຕິດຕາມ ແຕ່ວັນທີ 23 ມີນາ ຮອດວັນທີ 8 ເມສາ 2020 ມີ ທັງໝົດ 292 ຄົນ . ໝົດກໍານົດຕິດຕາມທັງໝົດ 217 ຄົນ. ໃນວັນທີ 8 ເມສາ 2020 ຍັງສືບຕໍ່ຕິດຕາມທັງໝົດ 84
ສຳລັບການຕິດຕາມ ສະຖານທີ່ຈຳກັດບໍລິເວນ ໃນທົ່ວປະເທດ
o ສະຖານທີ່ຈຳກັດບໍລິເວນໃນຂອບເຂດທົ່ວປະເທດ ມີ 1,657 ແຫ່ງ,
o ຈຳນວນຄົນທີ່ຕິດຕາມຢູ່ ສູນຈຳກັດບໍລິເວນ ມີ 47,508 ຄົນ,
o ຈຳນວນທີ່ຈຳກັດບໍລິເວນທີ່ເຮືອນຂອງຕົນເອງ ມີ 20,185 ຄົນ.
o ການຕິດຕາມ ໃນວັນທີ 8 ເມສາ ພົບວ່າ ມີ 2 ຄົນ ມີໄຂ້, ທີມງານໄດ້ ເກັບຕົວຢ່າງມາກວດ ຜົນວິເຄາະແມ່ນບໍ່ພົບເຊື້ອ.

3. ຂໍ້ແນະນຳ

ວັນທີ 8 ເມສາ 2020, ຫ້ອງການ ສນຍ ໄດ້ອອກແຈ້ງການ ເພີ້ມເຕີມ ເລກທີ 461/ຫສນຍ, ເພື່ອຜັນຂະຫຍາຍ ຄຳສັ່ງ ນາຍຍົກລັດຖະມົນຕິ ເລກທີ 06/ນຍ, ເຊິ່ງປະກອບມີ 13 ຂໍ້ທີ່ສຳຄັນທີ່ຕ້ອງໄດ້ຈັດຕັ້ງປະຕິບັດຢ່າງຄັ່ງຄັດ ເພື່ອຮັບປະກັນ ໃຫ້ການປ້ອງກັນ ແລະ ຄວບຄຸມ ການແຜ່ລາມການລະບາດຂອງພະຍາດ ເປັນໄປຢ່າງມີປະສິດທິພາບ.

ສຳລັບແຮງງານລາວທີ່ເຂົ້າມາແລ້ວ ໃຫ້ນະຄອນຫຼວງແລະ ບັນດາແຂວງຊີ້ນຳບັນດາປົກຄອງເມືອງ, ບ້ານ ແຕ່ງຕັ້ງເຈົ້າໜ້າທີ່ ປກສ, ປກຊ,​ສົມທົບກັບທີມແພດໝໍລົງເກັບກຳ ແລະ ຂື້ນບັນຊີ ບັນດາແຮງງານເລົ່ານັ້ນໃຫ້ລະອຽດ ເພື່ອຕິດຕາມ ແລະ ກວດກາ ສຸຂະພາບ
ບ່ອນທີ່ກຳນັດໃຫ້ຈຳກັດບໍລິເວນຮ່ວມກັນ ຕ້ອງບໍ່ໃຫ້ມີຄວາມແອອັດ ໂດຍຮັກສາໄລຍະຫ່າງ ປະຕິບັດຕາມມາດຕະຖານທີ່ວາງອອກ ມີການຄຸ້ມຄອງ ຕີິດຕາມ ກວດກາ ສຸຂະພາບແຕ່ວັນຢ່າງເຂັ້ມງວດ
ໃຫ້ອຳນາດການປົກຄອງທ້ອງຖິ່ນ ໂດຍສະເພາະເມືອງ ແລະ ບ້ານ ເຂັ້ມງວດໃນການ ຈຳກັດ ປະຊາຊົນ ທົ່ວໄປ ໃຫ້ ຢູ່ເຮືອນ ຫຼື ບ່ອນພັກອາໃສ ບໍ່ຄວນອອກຈາກບ້ານຖ້າບໍ່ມີຄວາມຈຳເປັນ.
ອີກນື່ງອາທິດທີ່ຈະມາເຖິງ ນີ້ ແມ່ນເປັນບຸນ ປີໃໝ່ລາວ ແມ່ນຢາກຮຽກຮ້ອງໃຫ້ທຸກໆຄົນ ເອົາໃຈໃສ່ຮ່ວມມືທີ່ສຸດ ໃນການຈັດຕັ້ງປະຕິບັດ ຄຳສັ່ງ ເລກທີ 06/ ນຍ ທີ່ໄດ້ເນັ້ນໜັກ, ຈຳກັດການເດີນທາງ, ຈຳກັດການອອກເຮືອນ ຖ້າບໍ່ມີຄວາມຈຳເປັນແທ້, ໃຫ້ມີການຮັກສາໄລຍະຫ່າງ, ຫຼີກລ້ຽງງານຊຸມແຊວເປັນກຸ່ມ, ການປະກອບວຽກງານທາງສາດສະໜາກໍ່ຄວນປະຕິບັດ ແບບ ບໍ່ມີການລວມກຸ່ມໃຫ່ຍ.
Off

Comments are closed.