16th Apr2020

ລາຍງານປະຈຳວັນທີ 16 ເມສາ ແມ່ນບໍ່ມີຜູ້ຕິດເຊື້ອໂຄວິດເພີ່ມ ຍັງຢູ່ທີ່ 19 ຄົນ

by somchan

ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ປະຈໍາວັນທີ 16 ເມສາ ປີ 2020 ໂດຍ: ທ່ານ ຮສ ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການ ຄະນະສະເພາະກິດ

I. ສະພາບການເຝົ້າລະວັງ COVID-19 ຢູ່ ສປປ ລາວຮອດ 5 ໂມງແລງ ຂອງວັນທີ 15 ເມສາ 2020
ວຽກງານຈຸດຜ່ານດ່ານ

ຈໍານວນຜູ້ເດີນທາງເຂົ້າມາ ມີທັງໝົດ 1,019 ຄົນ

ຜູ້ເດີນທາງ ຜ່ານ ດ່ານລາວໄທ ທັງໝົດ 287 ຄົນ, ໃນນັັ້ນ ມີແຮງງານລາວທີ່ກັບ

ມາແຕ່ໄທ 31 ຄົນ, ເຫຼືອນັ້ນແມ່ນ ພະນັກງານຂັບລົດບັນທຸກຂົນສິນຄ້າ

ຜູ້ເດີນທາງ ຜ່ານ ດ່ານລາວຈີນ ທັງໝົດ 237 ຄົນ,ທັງໝົດ ແມ່ນພະນັກງານຂັບລົດບັນທຸກຂົນສິນຄ້າ
ຜູ້ເດີນທາງ ຜ່ານ ດ່ານລາວຫວຽດ ທັງໝົດ 495 ຄົນ, ທັງໝົດແມ່ນພະນັກງານຂັບລົດບັນທຸກຂົນສິນຄ້າ
ຜູ້ເດີນທາງ ຜ່ານ ສະໜາມບິນ 00 ຄົນ
ໃນທຸກດ່ານ ແມ່ນໄດ້ກວດວັດ ອຸນຫະພູມຮ່າງກາຍແລະ ບໍ່ມີຄົນເປັນໄຂ້
ການເຝົ້າລະວັງ ແລະ ວິເຄາະ
ໃນວັນທີ 15 ເມສາ 2020, ໄດ້ ເກັບຕົວຢ່າງມາກວດທັງໝົດ 23 ຄົນ, ໃນນັ້ນມີຜູ້ສຳຜັດໃກ້ຊິດ ກັບຜູ້ຕິດເຊື້ອ02 ຄົນ, ກໍລະນີມີອາການສົງໄສ 21 ຄົນ (ໃນນີ້ມີແຮງງານລາວທີ່ກັບມາແຕ່ໄທ 01 ຄົນ).
ໃນຈຳນວນ 23 ຄົນທີ່ມາກວດນັ້ນ ມີ ນະຄອນຫຼວງວຽງຈັນ19 ຄົນ ແລະ ຕ່າງແຂວງ 04 ຄົນ ດັ່ງລຸ່ມນີ້:

ຫຼວງພະບາງ 01 ຄົນ

ອັດຕະປຶ 01 ຄົນ

ສະຫວັນນະເຂດ 02 ຄົນ
ຜົນກວດທັງໝົດ 23 ກໍລະນີ ແມ່ນບໍ່ພົບເຊື້ອ
ນັບແຕ່ເດືອນມັງກອນ ຮອດ ວັນທີ 15 ເມສາ 2020 ໄດ້ເກັບຕົວຢ່າງມາກວດ ທັງໝົດ ມີ 1,288 ຄົນ, ກວດພົບເຊື້ອທັງໝົດ 19 ຄົນ.
ຈໍານວນຜູ້ສໍາຜັດໃກ້ຊິດທັງໝົດ ທີ່ໄດ້ຕິດຕາມ ແຕ່ວັນທີ 23 ມີນາ15 ເມສາ 2020 ມີ ທັງໝົດ 488 ຄົນ,  ໝົດກໍານົດຕິດຕາມ ທັງໝົດ 420 ຄົນ, ຍັງສືບຕໍ່ຕິດຕາມ 68 ຄົນຊິ່ງມີລາຍລະອຽ ດັ່ງລຸມນີ້:
ນະຄອນຫຼວງວຽງຈັນ 32 ຄົນ (ໃນນັ້ນ 19 ຄົນ ແມ່ນຕິດຕາມຢູ່ບ້ານ ແລະ ອີກ 13 ຄົນແມ່ນຕິດຕາມຢູ່ໂຮງໝໍ 103)
ແຂວງ ໄຊສົມບູນ  35 ຄົນ (ທັງໝົດຕິດຕາມຢູ່ ແຄ້ມພູຄຳ)
ແຂວງ ວຽງຈັນ 01 ຄົນ (ຈຳກັດບໍລິເວນຢູ່ສູນ)
ສຳລັບ ການຕິດຕາມ ສະຖານທີ່ຈຳກັດບໍລິເວນ ແລະຜູ້ຈຳກັດບໍລິເວນ ຢູ່ເຮືອນ ໃນທົ່ວປະເທດ
ເລີ້ມແຕ່ວັນທີ 20 ມີນາ 2020 ມີແຮງງານລາວຈໍານວນຫຼວງຫຼາຍຈາກປະເທດໄທໄດ້ກັບເຂົ້າມາລາວຕາມຈຸດຜ່ານແດນຕ່າງໆ ມີທັງໝົດ 113,404 ຄົນ, ເພື່ອຮອງຮັບສະຖານນະການດັ່ງກ່າວ ອໍານາດການປົກຄອງ ໄດ້ມີການຈັດຕຽມສະຖານທີຈໍາກັດບໍລິເວນໃນແຕ່ລະເມືອງ, ກຸ່ມບ້ານທົ່ວປະເທດມີ 2,142 ສູນເຊິ່ງຮອງຮັບແຮງງານທັງໝົດ 68,534 ຄົນ ແລະ ໄດ້ຈໍາກັດບໍລິເວນຕົນເອງຢູ່ເຮືອນ 44,870 ຄົນ ໂດຍມີຄອບຄົວເປັນຜູ້ຢັ້ງຢືນ.
ມາຮອດວັນທີ 15 ເມສາ 2020 ທົ່ວປະເທດ ຍັງມີ1,929 ສູນ, ມີຜູ້ຈຳກັດບໍລິເວນຢູ່ສູນ 29,161 ຄົນ, ຈໍາກັດບໍລິເວນຢູ່ເຮືອນ 22,850 ຄົນ, ເກັບຕົວຢ່າງມາກວດວິເຄາະຫາເຊື້ອ ມີທັງໝົດ 115  ຄົນ ທັງໝົດບໍ່ພົບເຊື້ອ.
ການຕິດຕາມປີ່ນປົວຄົນເຈັບຢູ່ໂຮງໝໍ
ປະຈຸບັນຍັງນອນຢູ່ໂຮງໝໍ 17 ຄົນ, 02 ຄົນໄດ້ອອກໂຮງໝໍເຊິ່ງແມ່ນຜູ້ຕິດເຊື້ອກໍລະນີທີ 12 ແລະ ກໍລະນີທີ 14ແມ່ນອອກໂຮງໝໍມື້ເຊົ້ານີ້.
ຈຳນວນ 3 ຄົນຢູ່ໂຮງໝໍແຂວງຫຼວງພະບາງ ເຫັນວ່າມີອາການຄົງຕົວ ຂັ້ນເບົາບາງ ຍັງຕິດຕາມການກວດຫາເຊື້ອເພື່ອຢັ້ງຢືນ.
ຈຳນວນ 14 ຄົນຢູ່ໂຮງໝໍມິດຕະພາບ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມການກວດຫາເຊື້ອເພື່ອຢັ້ງຢືນ.
ຂໍ້ແນະນຳ

ຄືບັນດາທ່ານໄດ້ຮັບຊາບແລ້ວ ມື້ວານນີ້ໄດ້ມີກອງປະຊຸມທົບທວນແລະປະເມີນຄືນການຈັດປະຕິບັດຄໍາສັ່ງຂອງທ່ານນາຍົກລັດຖະມົນຕີ ເລກທີ 06/ນຍ, ທ່ານນາຍົກລັດຖະມົນຕີກໍ່ໄດ້ມີທິດຊີ້ນໍາໃຫ້ຫ້ອງວ່າການສໍານັກງານນາຍົກລັດຖະມົນຕີອອກແຈ້ງການຕໍ່ເວລາ ແລະ ການແນະນໍາເພີ່ມເຕີມກ່ຽວກັບການຈັດຕັ້ງປະຕິບັດຄໍາສັ່ງ ເລກທີ 06/ນຍ, ເນື້ອໃນສໍາຄັນທີ່ດ້ຊີ້ນໍາແມ່ນ

ສືບຕໍ່ປະຕິບັດບັນດານິຕິກໍາ, ຄໍາແນະນໍາ, ແຈ້ງການຂອງຄະນະສະເພາະກິດ ຂອງຫ້ອງວ່າການສໍານັກງານນາຍົກລັດຖະມົນຕີ ແລະ ຂະແໜງການກ່ຽວຂ້ອງອອກໄປຕື່ມ 14 ວັນ ຈົນຮອດວັນທີ 03 ພຶດສະພາ 2020 ຢ່າງຖືກຕ້ອງ ແລະ ເຂັ້ມງວດ
ການເປິດໂຮງຮຽນ ແລະ ສະຖາບັນການສຶກສາຕ່າງໆນັ້ນ ແມ່ນຈະໄດ້ລໍຖ້າປະເມີນສະພາບການລະບາດ ຫຼັງຈາກ 14 ວັນນີ້
ສໍາລັບພະນັກງານ-ລັດຖະກອນ ແມ່ນໃຫ້ສືບຕໍ່ຈໍາກັດພະນັກງານໄປປະຈໍາການ ຜັດປ່ຽນກັນ ເຮັດວຽກຢູ່ເຮືອນ ໂດຍບໍ່ໃຫ້ສວຍໂອກາດເອົາໂມງລັດຖະການໄປເຮັດວຽກສ່ວນຕົວເພື່ອຮັບປະກັນໃຫ້ລ້ອນໜ້າທີ່ ທີ່ການຈັດຕັ້ງມອບໝາຍໃຫ້
ສືບຕໍ່ເພີ່ມທະວີຄວາມເຂັ້ມງວດໃນການຈັດຕັ້ງປະຕິບັດມາດຕະການຕ່າງໆທີ່ໄດ້ກໍານົດໄວ້ໃນເລກທີ 06/ນຍ ເປັນຕົ້ນ: ການຫ້າມອອກຈາກເຮືອນ ຫຼື ທີ່ພັກອາໃສ ການໄປເຂດທີ່ມີຄວາມສ່ຽງໃນການຕິເຊື້ອ ການຊຸມແຊວທີ່ມີຈໍານວນຄົນເກີນ 10 ຄົນຂື້ນໄປ ແລະ ການຈັດງານທຸກປະເພດ ສ່ວນການໄປທໍາມາຫາກິນ ແລະ ການເຮັດຜະລິດກະສິກໍາຂອງປະຊາຊົນ ແມ່ນ ສາມາດໄປໄດ້ ແຕ່ໃຫ້ອໍານາດການປົກຄອງບ້ານເປັນຄຸ້ມຄອງຢ່າງຫັດກຸ
ແລະ ເຫັນດີຄົ້ນຄວ້ານະໂຍບາຍ ມາດຕະການທີ່ຕິດພັນກັບການເຄື່ອນໄຫວຂອງພາກທຸລະກິດ ທີ່ມີຄວາມຈໍາເປັນຈໍານວນໜຶ່ງ ເພື່ອຫຼຸດຜ່ອນຜົນກະທົບ ຕໍ່ເສດຖະກິດຂອງລາວ ແຕ່ຕ້ອງບົນພື້ນຖານຮັບປະກັນບໍ່ໃຫ້ມີຄວາມສ່ຽງໃນການຕິດເຊື້ອ

ສະນັ້ນ ຈີ່ງຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າຈົ່ງສືບຕໍ່ຮ່ວມໄມ້ຮ່ວມມືເປັນເຈົ້າການຮ່ວມກັນປະຕິບັດບັນດາຂໍ້ແນະນຳຕ່າງໆຢ່າງເຂັ້ມງວດ ເພື່ອໃຫ້ສະພາບການລະບາດຂອງພະຍາດໂຄວິດຜ່ອນຄາຍລົງ ຈີ່ງຈະສາມາດກັບມາດຳລົງຊີວິດຕາມປົກກະຕິ

ສະພາບການ COVID-19 ໃນທົ່ວໂລກ

ມາຮອດເວລາ 6:00 ໂມງເຊົ້າ ຂອງວັນທີ 16 ເມສາ 2020, ທົ່ວໂລກມີລາຍງານກໍລະນີທັງໝົດ 210(ປະເທດ/ເຂດ).

ກໍລະນີຢັ້ງຢືນ ຜູ້ຕິດເຊື້ອພະຍາດ COVID-19 ມີ2,075,532 (ໃໝ່ 83,343)
ເສຍຊິວິດ 134,286 (ໃໝ່ 8,220)  
ປີ່ນປົວຫາຍດີ 509,577 ຄົນ (ໃໝ່ 42,370)
ມີບາງປະເທດ ຈຳນວນຄົນຕິດເຊື້ອມື້ດຽວ ມີເຖິງ30,657 ຄົນ ແລະ ເສຍຊີວິດຫຼາຍກວ່າ 2,519 ຄົນ ຕໍ່ມື້
ອັດຕາຄວາມຮ້າຍແຮງເພີ້ມຂື້ນເປັນ 6.46% (ມື້ວານນີ້6.32%)
ມື້ນີ້ເປັນມື້ຂັງຂານຂື້ນ ເລີມຕົ້ນປີໃໝ່ 2563, ຍັງແມ່ນໄລຍະບຸນປີໃໝ່ລາວ ຢາກຮຽກຮ້ອງໃຫ້ທຸກໆຄົນ ສືບຕໍ່ເອົາໃຈໃສ່ຮ່ວມມື ໃນກາຈັດຕັ້ງປະຕິບັດ ຄຳສັ່ງ ເລກທີ 06/ ນຍ ຢ່າງຖືກຕ້ອງ ແລະ ເຂັ້ມງວດ.

ຂໍອວຍພອນປີໃໝ່ໃຫ້ບັນດາຜູ້ນຳພັກ-ລັດ, ພະນັກງານ, ລັດຖະກອນ, ພໍ່ຄ້າຊາວຂາຍ,ນັກທຸລະກິດ ຕະຫຼອດເຖີງພໍ່ແມ່ປະຊາຊົນບັນດາເຜົ່າທຸກທ່ານ ຈົ່ງມີສຸຂະພາບແຂງແຮງມີ ຄວາມຜາສຸກ ແລະ ໂຊກດີປີໃໝ່

Off

Comments are closed.