24th Apr2020

ເກີດເຫດໄຟໄໝ້ເຮືອນປະຊາຊົນ ຢູ່ບ້ານສະກົວ ເສຍຫາຍຫຼາຍສົມຄວນ.

by somchan

ຕາມການລາຍງານສະພາບຈາກພະນັກງານວິຊາສະເພາະປະຈຳກອງບັນຊາການ ປກສ ເມືອງນາໝໍ້ ໄດ້ໃຫ້ຮູ້ວ່າ: ໃນວັນທີ 19 ເມສາ 2020 ເວລາ 14 ໂມງ 30 ນາທີ ໄດ້ເກີດເຫດອັກຄີໄພ(ໄຟໄໝ້ເຮືອນ)ຂອງປະຊາຊົນ ຢູ່ບ້ານ ສະກົວ ເມືອງນາໝໍ້ ແຂວງອຸດົມໄຊ ເຫດການອັກຄີໄພ(ໄຟໄໝ້)ໃນຄັ້ງນີ້ ມີເຮືອນຖືໄຟໄໝ້ 5 ຫຼັງຄາເຮືອນ ແລະ ມີເງິນກີບ 133.676.000 ກີບ, ເງິນໝັ້ນ ຈຳນວນ 08 ໝັ້ນ, ເງິນກາງ 06 ກາງ, ເງິນຫຼີ້ມ 03 ຫຼີ້ມ, ເງິນເຫຼັ້ມ 03 ເຫຼັ້ມ, ປືນເສິກຊະນິດ ເຊກ້າເຊ 01 ກະບອກ ແລະ ເຄື່ອງນຸ່ງ, ເຄື່ອງໃຊ້ໃນເຮືອນອີກຫຼາຍລາຍການ, ສວ່ນສາເຫດໃນຄັ້ງນີ້ແມ່ນເກີດຈາກຄວາມບໍ່ລະມັດລະວັງໃນການ ໃຊ້ໄຟ (ດັງໄຟແຕ່ງກິນບໍ່ມອດໃຫ້ລະອຽດ) ຕາມຄຳໃຫ້ການຂອງປະຊາຊົນທີ່ເຫັນເຫດການເບື້ອງຕົ້ນແມ່ນເຫັນແປວໄຟລູກໄໝ້ຢູ່ທີ່ເຮືອນຂອງນາງສີແລ້ວໄດ້ລຸກລາມໃສ່ເຮືອນອ້ອມຂ້າງຖືກໄຟໄໝ້ເສຍຫາຍ ທັງໝົດ ຈຳນວນ 05 ຫຼັງ;

ເຈົ້າໜ້າທີ່ວິຊາສະເພາະກອງບັນຊາການ ປກສ ເມືອງດັ່ງກ່າວ ຍັງໃຫ້ຮູ້ວ່າ: ພາຍຫຼັງທີ່ໄດ້ຮັບແຈ້ງຈາກພົນລະເມືອງວ່າມີເຫດການໄຟໄໝ້ເກີດຂື້ນທີ່ບ້ານດັ່ງກ່າວແລ້ວ ກໍ່ໄດ້ແຕ່ງຕັ້ງພະນັກງານ ວິຊາການ ພ້ອມພາຫານະ ລົດ ແລະ ອຸປະກອນຕ່າງໆເຂົ້າໄປຊ່ວຍດັບມອດໄຟຢ່າງທັນການ,ແຕ່ເນື່ອງຈາກສະພາບດິນຟ້າແຫ້ງແລ້ງ, ອາກາດຮ້ອນອົບເອົ້າ, ມີລົມພັດແຮງ ບວກກັບເຮືອນທີ່ຖືກໄຟໄໝ້ສ່ວນຫຼາຍເປັນເຮືອນມຸ່ງດ້ວຍສັງກະສີ,ມຸ້ງຫຍ້າ, ແອ້ມຟ້າໄມ້ປ່ອງ ຈິ່ງເປັນເຫດເຮັດໃຫ້ໄຟໄດ້ລຸກໄໝ້ຢ່າງໄວວາ ໂຊກດີທີ່ບໍ່ມີຄົນໄດ້ຮັບບາດເຈັບ ຫຼື ເສຍຊີວິດ ແລະ ເຈົ້າໜ້າທີ່ໆກຽ່ວຂ້ອງກໍ່ໄດ້ເອົາໃຈໃສ່ດັບມອດໄຟເພື່ອບໍ່ໃຫ້ລຸກລາມເປັນວົງກວ້າງທີ່ຈະເປັນການສ້າງຄວາມເສຍຫາຍຫຼາຍກວ່ານີ້.

Off

Comments are closed.