24th Apr2020

ຄະນະສະເພາະກິດ ຕ້ານໂຄວິດ-19 ກົມໃຫຍ່ການເມືອງ ລົງກວດກາຕິດຕາມການປະຕິບັດຄຳສັ່ງເລກທີ 06

by somchan

ຄະນະສະເພາະກິດ ຕ້ານໂຄວິດ-19 ກົມໃຫຍ່ການເມືອງ ປກສ ນຳໂດຍ ພົຈວ ປອ ສຸວັນນີ ສີສຸພາບມີໄຊ ຮອງຫົວໜ້າກົມໃຫຍ່ການເມືອງ ປກສ ໄດ້ລົງເຄື່ອນໄຫວຕິດຕາມ, ກວດກາ ສະພາບການຈັດຕັ້ງປະຕິບັດ ຄຳສັ່ງຂອງນາຍົກລັດຖະມົນຕີ ສະບັບເລກທີ 06 ຢູ່ທີ່ວິທະຍາຄານສັນຕິບານປະຊາຊົນ ແລະ ຄ້າຍຄຸມຂັງ-ດັດສ້າງຕານປ່ຽວ ໃນວັນທີ 23 ເມສາ 2020 ນີ້.

ໃນໂອກາດດັ່ງກ່າວ ຄະນະພັກ-ຄະນະບັນຊາ ທັງສອງພາກສ່ວນໄດ້ລາຍງານສະພາບ ການຈັດຕັ້ງປະຕິບັດຄຳສັ່ງຂອງນາຍົກລັດຖະມົນຕີ ສະບັບເລກທີ 06 ວ່າດ້ວຍການເພີ່ມທະວີມາດຕະການສະກັດກັ້ນ ກັນການລະບາດ ຄວມຄຸມ ແລະ ກະກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ຂອງພະນັກງານ-ນັກຮົບ, ຄູອາຈານ ແລະ ນັກສຶກສາ ຢູ່ວິທະຍາຄານ ສັນຕິບານປະຊາຊົນ ພ້ອມດ້ວຍພະນັກງານ-ນັບຮົບ ແລະ ນັກໂທດ, ຜູ້ຖືກຫາ ຜູ້ຖືກດັດສ້າງ ຢູ່ຄ້າຍຄຸມຂັງ-ດັດສ້າງຕານປ່ຽວ; ເຊິ່ງຜ່ານມາ ຄະນະພັກ-ຄະນະບັນຊາ ທັງສອງພາກສ່ວນ ໄດ້ນຳພາປະຕິບັດມາດຕະການ ທີ່ກຳນົດຢູ່ໃນຄຳສັ່ງເລກທີ 06 ຢ່າງເຂັ້ມງວດ ມາເຖິງປະຈຸບັນຍັງບໍ່ມີກໍລະນີຜູ້ຕິດເຊື້ອ ຫຼືກໍລະນີສົງໄສ.

ໂອກາດດຽວກັນ ພົຈວ ປອ ສຸວັນນີ ສີສຸພາບມີໄຊ ຍັງໄດ້ມອບຜ້າອັດປາກ-ດັງ ຈຳນວນໜຶ່ງໃຫ້ທັງສອງພາກສ່ວນ. ພ້ອມທັງ ໄດ້ຮຽກຮ້ອງໃຫ້ພ້ອມກັນສືບຕໍ່ເພີ່ມທະວີ ຈັດຕັ້ງປະຕິບັດຄຳສັ່ງເລກທີ 06 ຢ່າງເຂັ້ມງວດ ໄປຮອດວັນທີ 3 ພຶດສະພາ 2020 ເປັນຕົ້ນແມ່ນໃຫ້ເອົາໃຈໃສ່ ເຝົ້າລະວັງ ກວດກາ ຕິດຕາມ ສຸຂະພາບຂອງແຕ່ລະຄົນ, ກັກກັນທີ່ຢູ່ອາໄສ, ການຮັກສາໄລຍະຫ່າງທາງສັງຄົມ, ໝັ້ນລ້າງມື, ຫ້າມຈັດງານຊຸມນຸມ ທີ່ມີຄົນແຕ່ 10 ຄົນຂຶ້ນໄປ ແລະ ອື່ນໆ. ເພື່ອຄວາມເປັນເຈົ້າການຮ່ວມກັນສະກັດກັ້ນການລະບາດຂອງພະຍາດໂຄວິດ-19 ແລະ ພ້ອມກັນຜ່ານພົ້ນສະພາບທີ່ຫຍຸ້ງຍາກສັບສົນນີ້ໃຫ້ໄດ້ໂດຍໄວ.

Off

Comments are closed.