24th Apr2020

ຄະນະສະເພາະກິດ ຮັບເຄື່ອງ ແລະ ເງິນຊ່ວຍເຫຼືອລັດຖະບານ ຈາກ 4 ພາກສ່ວນ

by somchan

ໃນຕອນບ່າຍ ຂອງວັນທີ 24 ເມສາ 2020 ທີ່ ສໍານັກງານນາຍົກລັດຖະມົນຕີ, ທ່ານ ສົມດີ – ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວຫນ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19 ໄດ້ຮັບເຄື່ອງ ແລະ ເງິນ ຊ່ວຍເຫຼືອລັດຖະບານ ຈາກ 4 ພາກສ່ວນ, ລວມມູນຄ່າ 3 ຕື້ກວ່າກີບ, ໂດຍມີຄະນະສະເພາະກິດ ແລະ ພະນັກງານທີ່ກ່ຽວຂ້ອງ ຂອງແຕ່ລະພາກສ່ວນເຂົ້າຮ່ວມ.

ພາກສ່ວນທີ່ນໍາເຄື່ອງ ແລະ ເງິນ ມາມອບຊ່ວຍເຫຼືອໃນຄັ້ງນີ້ ປະກອບມີ: ບໍລິສັດ ສົມບູນ ການຄ້າ ຂາອອກ-ຂາເຂົ້າ ມອບເງິນຊ່ວຍເຫຼືອ ຈໍານວນ 2.000.000.000 ກີບ, ໃນນັ້ນ ມອບໃຫ້ ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ກະຊວງສາທາລນະສຸກ ແລະ ຫ້ອງວ່າການສໍານັກງານນາຍົກລັດຖະມົນຕີ ພາກສ່ວນລະ 500.000.000 ກີບ, ກ່າວມອບໂດຍ ທ່ານ ອຸດົມສັກ ອຸດົມທອງກະເສີມ, ປະທານບໍລິສັດ ສົມບູນການຄ້າ ຂາອອກ-ຂາເຂົ້າ; ບໍລິສັດ ວິສະວະກໍາ ທາງ ລົດໄຟຈີນ ມອບເງິນ ຈໍານວນ 1.000.000.000 ກີບ, ກ່າວມອບໂດຍ ທ່ານ ຫວາງສີຮຸ່ຍ (WANG QIHUI) ທູດທີ່ ປຶກສາເສດຖະກິດ ແລະ ການຄ້າ, ສະຖານເອກອັກຄະລັດຖະທູດຈີນ ປະຈໍາ ສປປ ລາວ; 3). ບໍລິສັດ ບີຄຣີມ ພະລັງງານລາວ ມອບເງິນ 1.200.000 ບາດ, ກ່າວມອບໂດຍ ທ່ານ  ສຸລັກ ກຳເພັດ (SUARK KUMPET), ຜູ້ຊ່ວຍຜູ້ຈັດການຝ່າຍບໍລິຫານ, ບໍລິສັດ ບີຄຣີມ ພະລັງງານລາວ; 4). ກະຊວງ ພະລັງງານ ແລະ ບໍ່ແຮ່ ມອບເຄື່ອງປ້ອງກັນພະຍາດ ມູນຄ່າ 100.000.000 ກີບ ແລະ ເງິນສົດ 100.000.000 ກີບ, ກ່າວມອບໂດຍ ທ່ານ ຄໍາມະນີ ອິນທິລາດ, ລັດຖະມົນຕີກະຊວງພະລັງງານ ແລະ ບໍ່ແຮ່.

ໃນໂອກາດນີ້, ທ່ານ ສົມດີ ດວງດີ ໄດ້ກ່າວສະແດງຄວາມຊົມເຊີຍ ແລະ ຂອບໃຈ ຕໍ່ທຸກພາກສ່ວນທີ່ໃຫ້ການສະໜັບສະປະກອບສ່ວນເຂົ້າໃນການເຮັດໜ້າທີ່ສະກັດກັ້ນພະຍາດໂຄວິດ-19ໃນຄັ້ງນີ້.

Off

Comments are closed.