05th May2020

4 ບໍລິສັດ ມອບເງິນສົດ ແລະ ເຄື່ອງອຸປະກອນການແພດ ໃຫ້ລັດຖະບານລາວ

by somchan

ວັນທີ 28 ເມສາ 2020 ນີ້ ທີ່ສຳນັກງານນາຍົກລັດຖະມົນຕີ 4 ບໍລິສັດ ໄດ້ມອບເງິນ ແລະ ເຄື່ອງອຸປະກອນການແພດ ໃຫ້ລັດຖະບານລາວ ເພື່ອເປັນການປະກອບສ່ວນໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ໃນລາວ ລວມມູນຄ່າທັງໝົດໃນການມອບຄັ້ງນີ້ 2 ຕື້ ກວ່າກີບ, ໃນນີ້ ບໍລິສັດກໍ່ສ້າງທາງລົດໄຟລາວ-ຈີນ ມອບເຄື່ອງອຸປະກອນການແພດ ປະກອບມີຜ້າອັດປາກ-ດັງ 286,000 ອັນ, ເຄື່ອງວັດແທກອຸນຫະພູມ 250 ອັນ ລວມມູນຄ່າ 1,679,400,000 ກີບກ່າວມອບ ໂດຍທ່ານ ລີປີ້ງສວນ ຜູ້ອຳນວຍການໃຫຍ່ ບໍລິສັດກໍ່ສ້າງທາງລົດໄຟລາວ-ຈີນ, ບໍລິສັດກໍ່ສ້າງ ແລະ ລົງທຶນແຂວງຢູນານ ຫຸ້ນສ່ວນ ຈຳກັດ ມອບເງິນສົດ 500 ລ້ານກີບ ກ່າວມອບໂດຍທ່ານ ຫຼິວ ຫູ້ ຫົວໜ້າຫ້ອງການ ກຸ່ມບໍລິສັດກໍ່ສ້າງ ແລະ ລົງທຶນແຂວງຢູນານ ຫຸ້ນສ່ວນ ຈຳກັດ, ບໍລິສັດໄທເມດ ຫຼືມູນນິທິ ວິລະພູຊົງ ມອບເງິນສົດ 150 ລ້ານກີບ ຕາງໜ້າບໍລິສັດ ກ່າວມອບໂດຍ ທ່ານ ອານັນ ອິນທະວົງ ແລະ ບໍລິສັດ ສົມວັນຈະເລີນ ເປໂຕຣລ້ຽມເຈວລີ ຈຳກັດ ມອບເງິນສົດ 100 ລ້ານກີບ ກ່າວມອບໂດຍທ່ານ ສັນຕີ ສີດາວົງ ຮອງອຳນວຍການບໍລິສັດ ສົມວັນຈະເລີນ ເປໂຕຣລ້ຽມເຈວລີ ຈຳກັດ ແລະ ຕາງໜ້າໃຫ້ແກ່ລັດຖະບານ ຮັບເຄື່ອງ ແລະ ວັດຖຸປັດໄຈ ທີ່ໃຫ້ການຊ່ວຍເຫຼືອຊຸກຍູ້ໃນຄັ້ງນີ້ ໂດຍທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ.

ພ້ອມນີ້ ທ່ານກໍ່ໄດ້ສະແດງຄວາມຍ້ອງຍໍຊົມເຊີຍ ແລະ ສະແດງຄວາມຂອບໃຈນຳ ບໍລິສັດທີ່ໄດ້ໃຫ້ການອຸປະຖຳຊ່ວຍເຫຼືອແກ່ພັກ-ລັດຖະບານລາວ, ກໍ່ຄືປະຊາຊົນລາວບັນດາເຜົ່າ ໃນການປະກອບສ່ວນເຂົ້າໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະບາດໂຄວິດ-19 ໃນລາວ ແລະ ຈະນຳເອົາເຄື່ອງວັດຖຸປັດໄຈ ທີ່ມາມອບໃຫ້ໃນຄັ້ງນີ້ ໄປມອບໃຫ້ຂະແໜງການວິຊາສະເພາະ ແລະ ພາກສ່ວນຕ່າງໆ ໃນກອບສ່ວນເຂົ້າໃນໜ້າທີ່ວຽກງານ ປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃນລາວ ໃຫ້ໄດ້ຮັບໝາກຜົນສູງສຸດ.

Off

Comments are closed.