12th May2020

ຮອງລັດຖະມົນຕີກະຊວງສາທາລະນະສຸກ ຢຽ້ມຢາມແຮງງານລາວ ທີ່ກັບມາຈາກຕ່າງປະເທດຢູ່ສູນຫຼັກ 27

by somchan

 

ໃນວັນທີ່ 27 ພຶດສະພາ 2020 ນີ້ ທ່ານ ຮສຈ ດຣ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ຜູ້ປະຈຳການຄະນະສະເພາະກິດ ພ້ອມດ້ວຍຄະນະ ໄດ້ເຄື່ອນໄຫວຢຽ້ມຢາມແຮງງານລາວ ທີ່ກັບມາຈາກຕ່າງປະເທດ ທີ່ສູນກັກກັນແຮງງານສະໝາມຍິງປືນກອງທັບ ( ຫຼັກ 27 ) ໂດຍມີທ່ານ ບຸນທອງ ພົມມະຈັນ ຫົວໜ້າຄະນະຈັດຕັ້ງນະຄອນຫຼວງວຽງຈັນ ຮອງຫົວໜ້າສະເພາະກິດຂັ້ນ ນະຄອນຫຼວງວຽງຈັນ ທ່ານ ຄຳແກ້ວ ມະຫາໄຊ ຮອງຫົວໜ້າພະແນກແຮງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ພ້ອມດ້ວຍພາກສ່ວນກ່ຽວຂ້ອງ ໃຫ້ການຕ້ອນຮັບ.

ທ່ານ ນາງ ນາລີ ຂັນທະລັກ ຮອງຫົວໜັາພະແນກສາທາລະນະສຸກ ນວ ຫົວໜ້າໜ່ວຍງານຄຸ່ມຄອງ ແລະ ອະນາໄມກັນພະຍາດ ໄດ້ລາຍງານສະພາບລວມໃຫ້ຊາບວ່າ: ປັດຈຸບັນຢູ່ສູນດັ່ງກ່າວມີແຮງງານກັບມາຈາກປະເທດ ທັງໝົດ 436 ຄົນ ຍິງ 127 ຄົນ ແລະ ໄດ້ສັ່ງໄປກັກກັນຢູ່ແຕ່ລະແຂວງແລ້ວ 179 ຄົນ ເພື່ອໄປຕິດຕາມອາການເຂົາເຈົ້າ ສຳລັບການຕິດຕາມ ແລະ ເຝົ້າລະວັງພາຍໃນສູນຄະນະຮັບຜິດຊອບໄດ້ເອົາໃຈໃສ່ຕິດຕາມຢ່າງໃກ້ຊິດ ໂດຍໄດ້້ມີການຄັດແຍກຫ້ອງນອນໃນສູນອອກເປັນ 4 ຕຶກ ເຊິ່ງຕຶກໜື່ງຮັບໄດ້ 90 ຄົນ ມີ 40 ຫ້ອງນອນ ແລະ ສາມາດນອນນຳກັນໄດ້ 3 ຄົນ ຕໍ່ຫ້ອງ ພ້ອມນັ້ນຍັງໄດ້ຈັດສົ່ງທີມງານແພດຕິດຕາມເຝົ້າລະວັງ ຕິດຕາມອາການຢ່າງເປັນປະຈຳ ຖ້າວ່າພົບມີກໍລະນີສົງໄສ ທາງສູນກໍຈະໄດ້ສົ່ງໄປໂຮງໝໍທັນທີ ແຕ່ຖ້າບໍ່ມີອາການຫຍັງສຳລັບຄົນຕ່າງແຂວງ ແມ່ນໄດ້ມອບໃຫ້ຄະນະສະເພາະກິດຂອງແຕ່ລະແຂວງ ນຳໄປສູນກັກກັນຂອງແຂວງ ເພື່ອສືບຕໍ່ຕິດຕາມອາການເປັນໄລຍະເວລາ 14 ວັນຕື່ມອີກ.

ໃນໂອກາດນີ້ ທ່ານຮອງລັດຖະມົນຕີສາທາລະນະສຸກ ໄດ້ສະແດງຄວາມຊົມເຊີຍຕໍ່ການເອົາໃຈໃສ່ຂອງຄະນະຮັບຜິດຊອບສູນ ແລະເນັ້ນໃຫ້ທຸກພາກສ່ວນເອົາໃຈໃສ່ ຕໍ່ການປະຕິບັດວຽກງານຢ່າງຈິງຈັງ ໂດຍສະເພາະການຕິດຕາມແລະເຝົ້າລະວັງຢ່າງໃກ້ຊິດ ເພື່ອບໍ່ໃຫ້ມີກໍລະນີໃໝ່ ໃນລາວເພີ່ມຂື້ນ ພ້ອມນັ້ນຄະນະຍັງໄດ້ມີການປຶກສາຫາລືກ່ຽວກັບບາງມາດຕະການໃຫ້ຄວາມຊ່ວຍເຫຼືອທີ່ຈຳເປັນໂດຍສະເພາະເລື່ອງອາຫານການກິນໃນແຕ່ລະວັນຂອງເຂົາເຈົ້າ ແລະ ແຜນການລະດົມທຶນໃນສັງຄົມໃຫ້ກ້ວາງຂວາງ ແລະອື່ນໆເພື່ອໃຫ້ການຊ່ວຍເຫຼືອເຂົາເຈົ້າຢ່າງທົ່ວເຖິງ.

 

 

 

Off

Comments are closed.