05th Apr2020

ຮອດວັນທີ 5 ເມສາ ປະເທດລາວ ກວດພົບຜູ້ຕິດເຊື້ອເພີ່ມອີກ 1 ຄົນ ທັງຫມົດ 11 ຄົນ

by somchan

ທ່ານ ຮສຈ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈຳການ ຄະນະຄວບຄຸມ ປ້ອງກັນ ແລະ ແກ້ໄຂພະຍາດໂຄວິດ-19 ໄດ້ຖະແຫຼ່ງຂ່າວປະຈຳວັນທີ 5 ເມສາ 2020 ວ່າ: ໄດ້ກວດພົບຜູ້ຕິດເຊື້ອໂຄວິດ-19 ເພີ່ມອີກ 1 ຄົນ ເປັນເພດຊາຍ ອາຍຸ 55 ປີ ພະນັກງານ ບໍລິສັດພູເບ້ຍມາຍນິງ ສັນຊາດ ຢາປົວນິວກີເນຍ ມີປະຫວັດການເດີນທາງມາຈາກປະເທດ ຢາປົວນິວກີເນຍ ຜ່ານປະເທດສິງກະໂປ, ໄທ ແລະເຂົ້າມາປະເທດລາວ ໃນວັນທີ 23 ມີນາ 2020 ໂດຍມາຮອດວັນທີ 5 ເມສາ ສັງລວມ ຜູ້ຕິດເຊື້ອໂຄວິດ-19 ຢູ່ປະເທດລາວ ລວມທັງໝົດ 11 ຄົນ.

05th Apr2020

ວັນທີ 4 ເມສາ 2020 ກວດພົບຜູ້ຕິດເຊື້ອໂຄວິດເພີ່ມ 1 ລວມທັງໝົດເປັນ 11ຄົນ.

by somchan

ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ລາຍງານປະຈໍາວັນທີ 5 ເມສາ ປີ2020 ໂດຍ: ທ່ານ ຮສ ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດ

I. ສະພາບການ COVID-19 ໃນທົ່ວໂລກ
ເວລາ 8:30 ໂມງເຊົ້າ ຂອງວັນທີ 5 ເມສາ 2020, ທົ່ວໂລກມີລາຍງານກໍລະນີ ທັງໝົດ 205 ປະເທ/ເຂດ ແລະ 02 ເຮືອສໍາລານ. ບໍ່ໄດ້ເພີ້ມຂື້ນຈາກວານນີ້
ກໍລະນີຢັ້ງຢືນຜູ້ຕິດເຊື້ອພະຍາດ COVID-19 ແລ້ວ1,201,443 ຄົນ (ເພີ່ມຂື້ນ 82,800 ຄົນ), ເສຍຊິວິດ 64,688(ເພີ່ມຂື້ນ 5,801 ຄົນ) ແລະ ປີ່ນປົວຫາຍດີ 246,258 (ເພີ່ມຂື້ນ 17,853).
ບາງປະເທດ ຍັງສືບຕໍ່ ມີລາຍງານກໍລະນີຕິດເຊື້ອເພີມຂື້ນ 34,196 ຄົນ ແລະ ກໍລະນີເສຍຊິວິດເພີມຂື້ນ 1,331 ຄົນພາຍໃນ 1 ມື້.

ອົງການອະນາໄມໂລກໄດ້ປະເມີນ ອັດຕາຄວາມຮ້າຍແຮງ 5.38 ຂອງຈໍານວຄົນເຈັບຕິດເຊື້ອທັງໝົດ

II. ການເຝົ້າລະວັງ COVID-19 ປະຈຳດ່ານ ໃນ ສປປ ລາວຮອດ 5 ໂມງແລງ ຂອງວັນທີ 4 ເມສາ 2020 ຕາມດ່ານຊາຍແດນ ແລະ ສະໜາມບິນສາກົນ
1. ວຽກງານຈຸດຜ່ານດ່ານ
ຈໍານວນຜູ້ເດີນທາງເຂົ້າມາ ທັງໝົດ: 2,850 ຄົນ
ຈໍານວນຜູ້ເດີນທາງຜ່ານສະໜາມບິນ ທັງໝົດ 00 ຄົນ
ຈໍານວນຜູ້ເດີນມທາງຜ່ານທາງດ່ານລາວ-ໄທ ທັງໝົດ 2,344 ຄົນ
ຈໍານວນຜູ້ເດີນມທາງຜ່ານທາງດ່ານລາວ-ຈີນ ທັງໝົດ 167 ຄົນ
ຈໍານວນຜູ້ເດີນມທາງຜ່ານທາງດ່ານລາວ-ຫວຽດ ທັງໝົດ 339 ຄົນ
ຈໍານວນຄົນໄຂ້ທີ່ກວດພົບທັງໝົດ 00 ຄົນ
ຄາດວ່າມື້ວານນີ້ຈະບໍ່ມີຜູ້ຜ່ານຊາຍແດນເຂົ້າມາ
2. ການເຝົ້າລະວັງ ແລະ ວິເຄາະ
ໃນວັນທີ 4 ເມສາ 2020, ໄດ້ມີກໍລະນີສົງໃສ ແລະ ເກັບຕົວຢ່າງມາກວດ 31 ຄົນ ໄດ້ແກ່
o ນະຄອນຫລວງຽງຈັນ 14 ຄົນ (ຄົນລາວ 13 ແລະ ຄົນປາປົວນິວກີເນຍ 01) : (ຜ່ານດ່ານລາວ-ໄທ 01 ຄົນ, ກໍລະນີຍັງຖືກຕິດຕາມຜູ້ສໍາຜັດໃກ້ຊິດກັບຜູ້ຕິດເຊື້ອ 04 ຄົນ ບໍ່ພົບເຊື້ອ, ກໍລະນີສົງໃສທົ່ວໄປ 9 ຄົນ)
o ຕ່າງແຂວງ 17 ຄົນ ເປັນຕົ້ນ:
ແຂວງອຸດົມໄຊ (03) ຄົນ (03 ກໍລະນີສົງໄສທົ່ວໄປ)
ຈໍາປາສັກ (02) ຄົນ ໃນນັ້ນ ມີ 01 ກໍລະນີສົງໄສທົ່ວໄປ, 01 ແມ່ນແຮງງານລາວກັບມແຕ່ໄທ
ໄຊຍະບູລີ (02) ຄົນ (02 ກໍລະນີສົງໄສທົ່ວໄປ)
ຫຼວງນໍ້າທາ (02) ຄົນ (02 ກໍລະນີສົງໄສທົ່ວໄປ)
ສາລະວັນ (02) ຄົນ (02 ກໍລະນີສົງໄສທົ່ວໄປ)
ສະຫວັນນະເຂດ (01) ຄົນ (1 ກໍລະນີ ແມ່ນແຮງງານລາວກັບມແຕ່ໄທ)
ບໍ່ແກ້ວ (01) ຄົນ (1 ກໍລະນີ ແມ່ນແຮງງານລາວກັບມແຕ່ໄທ)
ຫົວພັນ  (01) ຄົນ (1 ກໍລະນີສົງໄສທົ່ວໄປ)
ຫຼວງພະບາງ  (01) ຄົນ (1 ກໍລະນີສົງໄສທົ່ວໄປ)
ແຂວງ ເຊກອງ (01) ຄົນ (1 ກໍລະນີສົງໄສທົ່ວໄປ)
ອັດຕະປື (01) ຄົນ (1 ກໍລະນີສົງໄສທົ່ວໄປ)

ຕົວຢ່າງທີ່ເກັບທັງໝົດ 31 ຄົນ, ຜົນກວດພົບຜູ້ຕິດເຊື້ອ 01 ຄົນ ເຊິງແມ່ນກໍລະນີນໍາເຂົ້າ: ເປັນພະນັກງານບໍລິສັດພູເບ້ຍ ເພດຊາຍ ອາຍຸ 55 ປີສັນຊາດ ປາປົວນິວກີເນຍ ເດີນທາງຈາກ ປາປົວນິວກີເນຍ ຜ່ານ:

ສິງກະໂປ ວັນທີ 21/3/20.
ວັນທີ 22/3/20 ຢູ່ສິງກະໂປ
ວັນທີ 23/3/20 ເດີນທາງເຂົ້າມາລາວ ຜ່ານສະໜາມບິນປະເທດໄທ
ວັນທີ 23 ຫາ 24/03/2020 ພັກຢູ່ໂຮງແຮມຄຣາວພາຊາ.
ວັນທີ 25 /03/2020 ເດີນທາງໂດຍລົດບໍລິສັດໄປພູເບ້ຍມາຍນິງ 11 ຄົນ ໃກ້ຊິດ, ພົວພັນບ່ອນເຮັດວຽກປະມານ 100 ຄົນ
ວັນທີ 3/4/20 ເລີ້ມມີອາການໄຂ້, ໄອ, ເຈັບຄໍ, ເຈັບຫົວ
ວັນທີ 4/4/2020  ເວລາ 10:00 ໂມງ ເຂົ້າມາກວດຢູ່ ໂຮງໝໍມິດຕະພາບ ແລະ ໄດ້ເກັບຕົວຢ່າງມາກວດ ແລະ ພົບວ່າຕິດເຊື້ອ ໂຄວິດ 19. ປະຈຸບັນແມ່ນນອນປິ່ປົວຢູ່ຫ້ອງແຍກປ່ຽວ ໂຮງໝໍມິດຕະພາບ.
ແຕ່ເດືອນ ມັງກອນ 2020 ຮອດ ວັນທີ 4 ເມສາ 2020 ໄດ້ເກັບຕົວຢ່າງມາກວດທັງໝົດ 604 ຄົນ, ກວດພົບເຊື້ອທັງໝົດ 11ຄົນ.
o ມາຮອດວັນທີ 4 ເມສາ 2020 ຕົວຢ່າງທັງໝົດໃນນັ້ນມີແຮງງານລາວ ຈາກ ໄທ 47 ຄົນ (ກໍລະນີ ສົງໄສໃໝ່ 3 ກໍລະນີ ແລະ ກວດບໍ່ພົບເຊື້ອ).
4/4/2020 ີກໍລະນີຍັງຖືກຕິດຕາມຜູ້ສໍາຜັດໃກ້ຊິດ ມີ  89  ຄົນ, ໄດ້ຕິດຕາມຄົບກໍານົດ 14 ວັນແລ້ວ 127 ຄົນ
o 4/4/2020 ມີອາການ ທັງໝົດ 04  ຄົນ ເກັບຕົວຢ່າງ ຜົນກວດບໍ່ພົບເຊື້ອ
4/4/2020 ແຮງງານລາວກັບມາແຕ່ໄທ ມີອາການທັງໝົດ 03ຈັກຄົນ, ໄດ້ເກັບຕົວຢ່າງທັງໝົດ 03 ຄົນ, ບໍ່ພົບເຊື້ອທັງໝົດ)

ຂໍ້ແນະນຳ

ຕໍ່ຜູ້ຕິດເຊື້ອຜູ້ທີ 11 ນີ້ເຊິ່ງເປັນຊາວຕ່າງປະເທດພະນັກງານບໍລິສັດພູເບັ້ຍມາຍນິ່ງນີ້, ມາດຕະການສຳຄັນທີ່ຈະຕ້ອງປະຕິບັດ
ເອົາໃຈໃສ່ປິ່ນປົວຕໍ່ຜູ້ກ່ຽວ
ສົ່ງທິມງານໄດ້ລົງສຳຫຼວດເກັບກຳຂໍ້ມູນຜູ້ສຳພັດໃກ້ຊິດ
ເລີ່ມຈາກຖ້ຽວບິນອອກຈາກປະເທດໄທ ມາລາວ
ບ່ອນພັກເຊົາຢູ່ໂຮງແຮມ ຄລາວພາຊາ 2 ຄືນ
ການຂີ່ລົດຕູ້ບໍລິສັດຈາກໂຮງແຮມໄປບໍລິສັດມີ 11 ຄົນ
ເພື່ອນຮ່ວມງານເຮັດວຽກໃກ້ຊິດຢູ່ບໍລິສັດປະມານ 100 ຄົນ
ການອະນາໄມຂ້າເຊື້ຶອລົດຕູ້, ບ່ອນເຮັດວຽກ, ບ່ອນພັກເຊົາ
ເຝົ້າລະວັງຜູ້ຈຳກັດບໍລິເວນ ຕິດຕາມອາການ ຜູ້ສຳພັດຢ່າງໃກ້ຊິດ ເກັບຕົວຢ່າງມາກວດ ວິເຄາະ
ຢຸດຕິການເຮັດບໍລິສັດ
ສືບຕໍປິດດ່ານຊາຍແດນຢ່າງເຂັ້ມງວດ ຫຼື ກວດກາຢ່າງເຄັ່ງຄັດລົດຂົນສົ່ງສິນຄ້າ ຕາມຂໍ້ກຳນົດທີ່ວາງອອກ
ເກັບຕົວຢ່າງຜູຈຳກັດບໍລິເວນຈຳນວນ 89 ຄົນ ຫຼື ວ່າແຮງງານລາວ ສະເພາະຜູ້ທີ່ມີຄວາມສ່ຽງຕິດເຊື້ອສູງມາກວດວິເຄາະຢັ້ງຢືນການບົ່ງມະຕິ
ເອົາໃຈໃສ່ປິ່ນປົວ 11 ຄົນທີ່ຕິດເຊື້ອພະຍາດໂຄວິດແລ້ວນີ້ໃຫ້ຫາຍດີໄວ
ພະນັກງານ, ລັດຖະກອນ, ປະຊາຊົນບັນດາເຜົ່າຕ້ອງປະຕິບັດມາດຕະການ ຈຳກັດການອອກຈາກເຮືອນ, ການເດີນທາງຢ່າງເຄັ່ງຄັດຕາມຄຳສັ່ງເລກທີ 06

ສະນັ້ນ ຮຽກຮ້ອງໃຫ້ ທຸກພາກສ່ວນໃນສັງຄົມມີສ່ວນຮ່ວມຢ່າງເປັນເຈົ້າການດ້ວຍຄວາມ ຮັບຜິດຊອບສູງ  ເປັນຕົ້້ນ ຕໍ່ເຈົ້າໜ້າທີ່ຢູ່ດ່ານຊາຍແດນ, ຜູ້ຖືກແນະນຳ ໃຫ້ຈຳກັດບໍລິເວນຕົນເອງ,ຄອບຄົວຂອງຜູ້ຖຶກແນະນຳຈຳກັດຕົນເອງ, ອຳນາດການປົກຄອງທ້ອງຖິ່ນ, ສະເພາະແພດໝໍ, ພະຍາບານຂອງພວກເຮົາກໍຈະໃຊ້ຄວາມພະຍາຍາມສູງ ເພື່ອປິ່ນປົວຄົນເຈັບຕາມຫຼັກວິທະຍາສາດເພື່ອໃຫ້ຫາຍດີໄວ.

ໂອກາດນີ້ກໍຂໍສະແດງຄວາມຂອບໃຈ ຮູ້ບຸນຄຸນຢ່າງສູງຕໍ່ປະເທດເພື່ອນມິດ, ຕໍ່ອົງການຈັດຕັ້ງສາກົນ, ອົງຈັດຕັ້ງທາງສັງຄົມ, ນັກທຸລະກິດ ທີ່ໄດ້ໃຫ້ການສະໜັບສະໜູນທາງດ້ານງົບປະມານ,  ວັດຖຸ ອຸປະກອນຮັບໃຊ້ແກ່ວຽກງານ ປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ19 ພວກຂ້າພະເຈົ້າຈະນຳໃຊ້ໃຫ້ຖືກຕາມວັດຖຸປະສົງ ແລະ ໃຫ້ມີປະສິດທິຜົນສູງ

04th Apr2020

ສະຫາຍເລຂາທິການໃຫຍ່, ປະທານປະເທດ ແຫ່ງ ສປປ ລາວ ສົນທະນາທາງໂທລະສັບກັບ ສະຫາຍເລຂາທິການໃຫຍ່, ປະທານປະເທດ ແຫ່ງ ສປ ຈີນ

by somchan

 ໃນວັນທີ 3 ເມສາ 2020, ສະຫາຍ ບຸນຍັງ ວໍລະຈິດເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ໄດ້ສົນທະນາທາງໂທລະສັບກັບ ສະຫາຍສີ ຈິ້ນຜິງ, ເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນ, ປະທານປະເທດ ແຫ່ງ ສປ ຈີນ.

ໃນໂອກາດດັ່ງກ່າວ, ສະຫາຍ ບຸນຍັງ ວໍລະຈິດ ໄດ້ສະແດງຄວາມຊົມເຊີຍ ຢ່າງຈິງໃຈຕໍ່ພັກ, ລັດຖະບານ ແລະ ປະຊາຊົນຈີນ ທີ່ປະສົບຜົນສໍາເລັດ ຢ່າງໜ້າພາກພູມໃຈ ໃນການສະກັດກັ້ນປ້ອງກັນ ແລະຄວບຄຸມການແຜ່ລະບາດ ຂອງເຊື້ອພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ (ໂຄວິດ-19). ສະຫາຍ ຕີລາຄາວ່າ: ພາຍໃຕ້ການຄວບຄຸມ ີ້ນໍາບັນຊາຢ່າງໃກ້ຊິດ ແລະ ຮອບດ້ານ ຂອງສູນກາງພັກກອມມູນິດຈີນ ທີ່ມີ ສະຫາຍເລຂາທິການໃຫຍ່ ສີຈິ້ນຜິງ ເປັນແກນກາງນັ້ນ, ສປ ຈີນ ສາມາດຄວບຄຸມ ແລະ ຮັບມືກັບພະຍາດດັ່ງກ່າວ ຢ່າງທັນການ ແລະ ມີປະສິດທິຜົນທີ່ສຸດ, ເຊິ່ງເປັນໄຊຊະນະອັນຍິ່ງໃຫຍ່ໜຶ່ງຂອງພັກ, ລັດຖະບານຈີນ ໃນການຮັບມືກັບພະຍາດໂຄວິດ-19, ເຊິ່ງເປັນການສະແດງໃຫ້ເຫັນເຖິງຄວາມຕັດສິນໃຈດ້ານ ການເມືອງອັນເດັດດ່ຽວ, ໜັກແໜ້ນ ແລະການນໍາໃຊ້ມາດຕະການ ທີ່ມີປະສິດທິຜົນໃນ ການຮັບມືກັບບັນຫາ, ພ້ອມທັງສະແດງໃຫ້ເຫັນເຖິງ ສະຕິປັນຍາອັນແຫຼມຄົມ ແລະຄວາມຮັບຜິດຊອບອັນສູງສົ່ງ ຂອງພັກ ແລະ ລັດຖະບານຈີນ ທີ່ມີຕໍ່ປະຊາຊົນຈີນ ກໍຄືມວນມະນຸດຢູ່ໃນໂລກ. ບົດຮຽນ ແລະ ມາດຕະການຂອງ ສປ ຈີນ ໄດ້ຮັບການຍອມຮັບ ແລະ ຕີລາຄາສູງຈາກບັນດາ ປະເທດໃນໂລກ ທີ່ພວມປະສົບກັບວິກິດການ ໃນການຕ້ານພະຍາດລະບາດ ໃນປັດຈຸບັນ. ບົນເນື້ອໃນແຫ່ງການສ້າງຄູ່ ຮ່ວມຊາຕາກໍາຂອງມວນມະນຸດ, ເຖິງວ່າ ສປ ຈີນ ຍັງມີຄວາມຫຍຸ້ງຍາກຍ້ອນຜົນກະທົບ ຂອງພະຍາດລະບາດຢູ່ພາຍໃນ ສປ ຈີນ ໃນ 2 ເດືອນຜ່ານມາ, ແຕ່ກໍ່ຍັງໃຫ້ການສະໜັບສະໜູນຊ່ວຍເຫຼືອປະເທດຕ່າງໆ 80 ກວ່າປະເທດ ໃນການຕ້ານກັບພະຍາດໂຄວິດ-19. ພັກ ແລະ ລັດຖະບານລາວ ສະໜັບສະໜູນການທີ່ ພັກກອມມູນິດຈີນ ສະເໜີກັບບັນດາພັກການເມືອງໃນໂລກ ໃນການຮ່ວມມືກັນຢ່າງໃກ້ຊິດກວ່າເກົ່າ ເພື່ອຮັບມືກັບພະຍາດອັກເສບປອດຈາກເຊື້ອຈຸລະໂລກສາຍພັນໃໝ່.

      ສະຫາຍເລຂາທິການ ໃຫຍ່, ປະທານປະເທດ ບຸນຍັງ ວໍລະຈິດຍັງໄດ້ຕາງໜ້າໃຫ້ ຄະນະບໍລິຫານງານສູນກາງພັກ ປປ ລາວສະແດງຄວາມຂອບໃຈ ຕໍ່ຄະນະກໍາມະການສູນກາງພັກກອມມູນິດຈີນ ທີ່ໄດ້ສົ່ງໂທລະເລກຊົມເຊີຍວັນສ້າງຕັ້ງພັກ ປປ ລາວ ົບຮອບ65 ປີ ແລະ ໄດ້ສະແດງ ຄວາມຂອບໃຈຢ່າງສູງຕໍ່ ພັກ, ລັດຖະບານແລະ ປະຊາຊົນຈີນອ້າຍນ້ອງ ທີ່ໄດ້ໃຫ້ການຮ່ວມມື, ບິແບ່ງບົດຮຽນອັນປະເສີດ ໃນການຕ້ານກັບພະຍາດ ໂຄວິດ-19 ແລະ ໄດ້ສົ່ງທີມແພດຊ່ຽວຊານ ພ້ອມດ້ວຍອຸປະກອນການແພດ ທີ່ກ່ຽວຂ້ອງໃຫ້ແກ່ສປປ ລາວ ໃນການສະກັດກັ້ນ ແລະ ຮັບມືກັບພະຍາດໂຄວິດ-19, ທັງໄດ້ເອົາໃຈໃສ່ຕິດຕາມເບິ່ງແຍງຊ່ວຍເຫຼືອ ແລະ ອໍານວຍຄວາມສະດວກໃຫ້ແກ່ພົນລະເມືອງ ແລະ ນັກສຶກສາລາວ ທີ່ອາໄສຢູ່ ສປຈີນ ໃນເວລາທີ່ເກີດການລະບາດ ຂອງພະຍາດຢູ່ ສປ ຈີນ ໄລຍະທີ່ຜ່ານມາ.ສະຫາຍ ບຸນຍັງ ວໍລະຈິດ ຍັງໄດ້ແຈ້ງກ່ຽວ ກັບສະພາບການແຜ່ລະບາດຂອງ ໂຄວິດ-19 ແລະ ການຮັບມືກັບພະຍາດດັ່ງກ່າວຢູ່ ສປປ ລາວ ໃຫ້ສະຫາຍ ສີ ຈິ້ນຜິງ ຮັບຊາບ.

       ສະຫາຍ ສີ ຈິ້ນຜິງ ໄດ້ແຈ້ງໃຫ້ຊາບກ່ຽວກັບສະພາບ ຂອງການການແຜ່ລະບາດ ຂອງພະຍາດໂຄວິດ-19 ຢູ່ໃນ ສປ ຈີນ, ໂດຍພາຍໃຕ້ການນໍາພາ ອັນເດັດດ່ຽວຂອງພັກ ແລະ ຄວາມເປັນເຈົ້າການ ຂອງບັນດາສະມາຊິກພັກ, ລັດຖະບານ ແລະ ປະຊາຊົນຈີນ ໃນທົ່ວປະເທດ ໃນການປະຕິບັດ ບັນດາມາດຕະການຕ່າງໆຢ່າງເຄັ່ງຄັດ, ເດັດດ່ຽວ, ມີປະສິດທິຜົນ, ເຮັດໃຫ້ ສປ ຈີນ ສາມາດສະກັດກັ້ນພະຍາດ ດັ່ງກ່າວໂດຍໄວ. ປັດຈຸບັນ, ພັກ, ລັດ ແລະປະຊາຊົນຈີນ ພວມເດັດດ່ຽວສູ້ຊົນ ເອົາຊະນະພະຍາດໂຄວິດ-19 ຢ່າງສິ້ນເຊີງ. ໃນຖານະທີ່ລາວຈີນ ເປັນຄູ່ຮ່ວມຊາ ຕາກໍາດຽວກັນ, ຝ່າຍຈີນຍິນດີແບ່ງປັນບົດຮຽນດ້ານການປ້ອງກັນ, ຄວບຄຸມແລະການປິ່ນປົວຜູ້ຕິດເຊື້ອຢູ່ ສປປ ລາວ ດ້ວຍການສົ່ງທີມແພດຊ່ຽວຊານແລະ ແພດທີ່ປຶກສາ ເຂົ້າມາສົມທົບກັບແພດຂອງລາວ ໃນການໃຫ້ຄໍາປຶກສາ, ແນະນໍາການປິ່ນປົວ ແລະ ຮັບມືກັບພະຍາດດັ່ງກ່າວ, ພ້ອມທັງສະໜອງອຸປະກອນ ການແພດ ແລະ ຢາປົວພະຍາດທີ່ ຈໍາເປັນຈໍານວນໜຶ່ງ ໃຫ້ແກ່ ສປປ ລາວ ເພື່ອພ້ອມກັນຮັບມື ແລະຜ່ານຜ່າການແຜ່ລະບາດພະຍາດດັ່ງກ່າວ.

       ໃນການສົນທະນາ, ການນໍາສູງສຸດຂອງສອງພັກ, ສອງລັດລາວຈີນ ຍັງໄດ້ແລກປ່ຽນຄວາມຄິດເຫັນ ກ່ຽວກັບທິດທາງໃນການເສີມ ຂະຫຍາຍສາຍພົວພັນຮ່ວມ ມືລະຫວ່າງ ສອງພັກ, ສອງລັດແລະ ປະຊາຊົນສອງຊາດ ລາວຈີນ, ໂດຍສອງຝ່າຍຍິນດີຈະສືບຕໍ່ເພີ່ມທະວີຄວາມໄວ້ ເນື້ອເຊື່ອໃຈເຊິ່ງກັນ ແລະ ກັນທາງດ້ານການເມືອງ, ສືບຕໍ່ແລກປ່ຽນບົດຮຽນໃນ ການຄຸ້ມຄອງພັກບໍລິຫານປະເທດ ແລະ ການປະຕິບັດແຜນການຮ່ວມມືສອງຝ່າຍ ໃນຂົງເຂດຕ່າງໆທີ່ໄດ້ຕົກລົງນໍາກັນ; ສືບຕໍ່ການຮ່ວມມື ດ້ານເສດຖະກິການຄ້າ ແລະ ການລົງທຶນ ໃຫ້ເປັນຮູບປະທໍາ ໂດຍສະເພາະແມ່ນ ການຊຸກຍູ້ບັນດາໂຄງການຮ່ວມມື ຕາມເນື້ອໃນຂອງແຜນແມ່ ບົດວ່າດ້ວຍການສ້າງຄູ່ຮ່ວມຊາຕາກໍາ ລາວຈີນ ແລະ ຂອບການຮ່ວມມືແລວ ເສດຖະກິດ ລາວຈີນ, ເປັນຕົ້ນແມ່ນ ໂຄງການສ້າງເສັ້ນທາງລົດໄຟ ລາວຈີນ ກໍ່ຄືບັນດາໂຄງການຮ່ວມມື ແລະ ໂຄງການຊ່ວຍເຫຼືອອື່ນໆ ທີ່ພວມດໍາເນີນຢູ່ໃນປັດຈຸບັນ ໃຫ້ໄດ້ຮັບການຈັດຕັ້ງປະຕິບັດ ດ້ວຍຄຸນນະພາບ ແລະ ປະສິດທິຜົນສູງ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວຈີນ.

04th Apr2020

ລັດຖະບານ ສສ ຫວຽດນາມ ມອບອຸປະກອນການແພດ ໃຫ້ ສປປ ລາວ ເພື່ອປ້ອງກັນ ແລະ ຕ້ານພະຍາດ ໂຄວິດ-19

by somchan

ວັນທີ 4 ເມສາ 2020 ນີ້ ຢູ່ທີ່ສະຫນາມບິນສາກົນວັດໄຕ ລັດຖະບານ ສສ ຫວຽດນາມ ໄດ້ນຳເອົາອຸປະກອນຮັບໃຊ້ການແພດ ມາມອບໃຫ້ລັດຖະບານລາວ ກ່າວມອບໂດຍ ທ່ານຫວຽນ ບາຮຸ່ງ ເອອັກຄະລັດຖະທູດ ສສ ຫວຽດນາມ ປະຈຳ ສປປ ລາວ ແລະກ່າວຮັບໂດຍ ທ່ານ ສົມດີ ດວງດີ ຮອງນາຍົກລັດຖະມົນຕີ ມີທ່ານ ຮສຈ ດຣ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ແລະ ຄະນະທັງສອງພາກສ່ວນເຂົ້າຮ່ວມ.

ເຄື່ອງທີ່ນຳມາມອບໃນຄັ້ງນີ້ ມີຜ້າປິດປາກ-ດັງ ຊະນິດຕ່າງໆ 417 ແກັດ ລວມທັງໝັດ 3 ແສນ 3 ໝື່ນອັນ, ຊຸດປ້ອງກັນພະຍາດ 1 ພັນຊຸດ, ເຄື່ອງຮັບໃຊ້ໃນການວິເຄາະພະຍາດ 3 ເຄື່ອງ ແລະ ນ້ຳຢາກວດຫາເຊື້ອອີກຈຳນວນໜຶ່ງ ລວມມູນຄ່າ 3 ແສນກວ່າໂດລາສະຫະລັດ.

ໃນໂອກາດນີ້ ທ່ານ ສົມດີ ດວງດີ ຮອງນາຍົກລັດຖະມົນຕີ ກໍ່ໄດ້ຕ່າງໜ້າລັດຖະບານ ກໍຄືປະຊາຊົນລາວ ບັນດາເຜົ່າ ກ່າວຄຳຂອບໃຈໄປຍັງລັດຖະບານ ກໍຄືປະຊາຊົນ ຫວຽດນາມ ທີ່ໄດ້ໃຫ້ການຊ່ວຍເຫຼືອໃນຄັ້ງນີ້ ແລະເຊື້ອໝັ້ນວ່າ ເຄື່ອງຈຳນວນດັ່ງກ່າວ ແມ່ນຈະເປັນປະໂຫຍດທີ່ສຸດໃຫ້ແກ່ປະເທດລາວ ໃນການປ້ອງກັນ ຕ້ານກັບການລະບາດຂອງພະຍາດ ໂຄວິດ-19.

03rd Apr2020

ຜູ້ຕິດເຊື້ອໂຄວິດ-19 ຢູ່ລາວຍັງຢູ່ທີ່ 10 ຄົນ

by somchan

ທ່ານ ຮສຈ ດຣ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ຜູ້ປະຈຳການຄະນະສະເພາະກິດ ປ້ອງກັນ ຄວບຄຸມ ແລະ ແກ້ໄຂພະຍາດ ໂຄວິດ-19 ໄດ້ລາຍງານປະຈຳວັນທີ 3 ເມສາ 2020 ນີ້ວ່າ: ສະພາບການລະບາດຂອງພະຍາດໂຄວິດ-19 ໃນທົ່ວໂລກ ມີກໍລະນີທັງໝົດ 204 ປະເທດ ເພີ່ມຂຶ້ນ 1 ປະເທດ ມີຜູ້ຕິດເຊື້ອ 1 ລ້ານກວ່າຄົນ, ເສຍຊີວິດ 5 ໝື່ນກວ່າຄົນ, ແລະ ປິ່ນປົວຫາຍດີ 2 ແສນກວ່າຄົນ.

ສຳລັບ ສປປ ລາວ ແມ່ນໄດ້ເອົາໃຈໃສ່ຢ່າງເຂັ້ມງວດ ໃນການເຝົ້າລະວັງ ແລະໃນວັນທີ 2 ເມສາ ໄດ້ກວດວິເຄາະກໍລະນີສົງໄສທັງໝົດ 22 ຄົນ, ນະຄອນຫຼວງວຽງຈັນ 11 ຄົນ, ຫຼວງນ້ຳທາ, ອຸດົມໄຊ ແຂວງລະ 3 ຄົນ, ໄຊຍະບູລີ 2 ຄົນ, ຫຼວງພະບາງ, ຫົວພັນແລະ ແຂວງວຽງຈັນ ແຂວງລະ 1 ຄົນ, ຜ່ານການກວດວິເຄາະບໍ່ມີຜູ້ຕິດເຊື້ອ, ເຊິ່ງຖືວ່າມາຮອດໃນວັນທີ 3 ເມສາ 2020 ປະເທດລາວມີຜູ້ຕິດເຊື້ອພຽງແຕ່ 10 ຄົນເທົ່ານັ້ນ.

ສຳລັບຜູ້ຕິດເຊື້ອທັງ 10 ຄົນ ແມ່ນຢູ່ໃນອາການທີ່ດີ ໄດ້ຮັບການເບິ່ງແຍງປິ່ນປົວຈາກຄະນະແພດໝໍຢ່າງໃກ້ຊິດ ໂດຍປິ່ນປົວຢູ່ໂຮງໝໍມິດຕະພາບ 7 ຄົນ ແລະໂຮງໝໍຫຼວງບາງພະບາງ 3 ຄົນ.

ທ່ານຍັງໃຫ້ຮູ້ຕື່ມອີກວ່າ ໄດ້ມີກຸ່ມຄົນບໍ່ດີຈຳນວນໜຶ່ງ ໄດ້ລົງຂ່າວຜ່ານສື່ສັງຄົມອອນລາຍ ວ່າລາວມີຜູ້ຕິດເຊື້ອແລ້ວ 20 ຄົນ ແມ່ນບໍ່ມີມູນຄວາມຈິງ, ຈຶ່ງຮຽກຮ້ອງໃຫ້ປະຊາຊົນລະວັງສື່ສັງຄົມອອນລາຍທີ່ສ້າງຄວາມປັ່ນປ່ວນໃຫ້ກັບປະເທດລາວ, ຖ້າຫາກພົບຜູ້ຕິດເຊື້ອເພີ່ມເຕີມ ຄະນະສະເພາະກິດຈະເປັນຜູ້ຖະແຫຼ່ງຂ່າວຜ່ານທາງສື່ມວນຊົນທີ່ເປັນທາງການເທົ່ນນັ້ນ.

03rd Apr2020

ລາຍງານປະຈຳວັນທີ 3 ເມສາ ບໍ່ພົບຜູ້ຕິດເຊື້ອເພີ່ມ ຕົວເລກຍັງຢູ່ທີ່ 10 ຄົນ

by somchan

ຄະນະສະເພາະກິດເພື່ອປ້ອງກັນຄວບຄຸມແລະແກ້ໄຂ ພະຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ COVID-19 ປະຈໍາວັນທີ 3 ເມສາ ປີ2020

ທ່ານ ຮສ ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດ

I. ສະພາບການ COVID-19 ໃນທົ່ວໂລກມາຮອດເວລາ 11:00 ໂມງເຊົ້າ ຂອງວັນທີ 3 ເມສາ 2020, ທົ່ວໂລກມີລາຍງານກໍລະນີທັງໝົດ 204 ປະເທ, ເພີ້ມຂື້ນອີກ 1 ປະເທດ ຄື ປະເທດມາລາວີກໍລະນີຢັ້ງຢືນຜູ້ຕິດເຊື້ອພະຍາດ COVID-19 ແລ້ວ1,014,943 ກໍລະນີ(ເພີ່ມຂື້ນ 79,747 ກໍລະນີ, ເສຍຊິວິດ 53,166 (ເພີ່ມຂື້ນ 5,947 ກໍລະນີ) ແລະ ປີ່ນປົວຫາຍດີ 212,018 (ເພີ່ມຂື້ນ 18,029).

II. ການເຝົ້າລະວັງ COVID-19 ປະຈຳດ່ານ ໃນ ສປປ ລາວຮອດ 5 ໂມງແລງ ຂອງວັນທີ 2 ເມສາ 2020 ຕາມດ່ານຊາຍແດນ ແລະ ສະໜາມບິນສາກົນ.

1. ວຽກງານຈຸດຜ່ານດ່ານ
ຈໍານວນຜູ້ເດີນທາງເຂົ້າມາທັງໝົດ:  4,230 ຄົນ
ຈໍານວນຜູ້ເດີນທາງຜ່ານສະໜາມບິນບໍ່ມີ (0 ຄົນ)
ຈໍານວນຜູ້ເດີນມທາງຜ່ານທາງດ່ານລາວ-ໄທທັງໝົດ 3,896ຄົນ, ໃນຈຳນວນດັ່ງກ່າວມີຄົນເປັນໄຂ້ 06 ຄົນ ທີ່ຜ່ານດ່ານຊ່ອງເມັກ ແຂວງຈໍາປາສັກ.

2. ການເຝົ້າລະວັງ ແລະ ວິເຄາະ

ມາຮອດວັນທີ 2 ເມສາ 2020, ໄດ້ມີກໍລະນີສົງໃສເກັບຕົວຢ່າງມາກວດ 22 ຄົນ ໄດ້ແກ່
o ນະຄອນຫຼວງວຽງຈັນ 11 ຄົນ
o ແຂວງຫຼວງນ້ຳທາ, ອຸດົມໄຊ ແຂວງລະ 3 ຄົນ
o ແຂວງ ໄຊຍະບູລີ 2 ຄົນ
o ແຂວງ ຫຼວງພະບາງ, ຫົວພັນ, ວຽງຈັນ ແຂວງລະ 1ຄົນ

ທັງໝົດໄດ້ເກັບຕົວຢ່າງ ແລະ ຜົນກວດເປັນລົບ ຖືວ່າມື້ນີ້ບໍ່ມີກໍລະນີໃໝ່ມາຮອດວັນທີ 2 ເມສາ 2020ໄດ້ເກັບຕົວຢ່າງມາກວດທັງໝົດ 520 ຄົນ, ກວດພົບເຊື້ອ 10 ຄົນ.

ປະຈຸບັນຈຳນວນກໍລະນີໃກ້ຊິດສຳພັດກັບຄົນເຈັບ ທີ່ກຳລັງຕິດຕາມມີ 216 ຄົນຢູ່ໃນແຂວງອຸດົມໄຊ, ຫຼວງພະບາງ ແລະນະຄອນຫຼວງ.

ຂໍ້ແນະນຳ

ປະຈຸບັນທິມງານແພດຂອງລາວເຮົາກໍໄດ້ເຮັດວຽກຮ່ວມກັບຊ່ຽວຊານມາແຕ່ຈີນຢ່າງເຄັ່ງຮ້ອນ ໂດຍສະເພາະ ໃນຂົງເຂດຄວບຄຸມການລະບາດ ແລະ ການຄຸ້ມຄອງກໍລະນີປິ່ນປົວຜູ້ຕິດເຊື້ອເປັນຕົ້ນ ມາດຕະການຈຳກັດບໍລິເວນ ແລະ ການປິ່ນປົວຄົນເຈັບຜູ້ຕິດເຊື້ອ.

ເລີ່ມແຕ່ວັນທີ່ 1 ເມສາເປັນຕົ້ມາຄຳສັ່ງນາຍົກ ເລກທີ 06 ມີຜົນສັກສດໃຫ້ຈັດຕັ້ງປະຕິບັດ ຈຶ່ງຢາກຂໍແນະນຳຕໍພະນັກງານລັດຖະກອນ ຜູ້ທີ່ພັກວຽກ, ພັກການ ແລະ ປະຊາຊົນທົ່ວໄປ ທີ່ຈະຈຳກັດໂຕເອງຢູ່ເຮືອນ ດ້ວຍວິທີການທີ່ເໝາະສົມດັ່ງນີ້:

1. ໝັ່ນລ້າງມືໃຫ້ສະອາດທຸກຄັ້ງເມື່ອມີການສຳພັດກັບວັດຖຸສິ່ງຂອງຢູ່ພາຍໃນເຮືອນ, ລ້າງມືໃຫຖືກວິທີ 7 ຂັ້ນຕອນ.
2. ເຮັດໃຫ້ອາກາດໃນເຮືອນລ່ວງດີ ເປີດປະຕູປ່ອງຢ້ຽມອອກເພື່ອລະບາຍອາກາດ.
3. ໝັ່ນອະນາໄມ ຂ້າເຊື້ອ ໂດຍການທຳຄວາມສະອາດໂຕະຕັ່ງສິ່ງຂອງໃນເຮືອນ ໃຫ້ປະຈຳທຸກໆມື້.
4. ປະຕິບັດມາລະຍາດໃນການໄປຈາມ, ໄອໃສ່ກົກແຂນ ຫຼື ໃຊ້ເຈັ້ຍອະນາໄມ ແລະ ຖີ້ມໃສ່ຖັງທີ່ມີຝາປິດ.
5. ພັກຜ່ອນໃຫ້ພຽງພໍ, ອອກກຳລັງກາຍຢູ່ໃນເຮືອນໃຫ້ສະມ່ຳສະເໝີ ກິນອາຫານສະອາດສຸກດີ ແລະ ຢູ່ໃນຄວາມຮ້ອນ, ນອນໃຫ້ຫຼັບສະບາຍ.
6. ປະຕິບັດການຕິດຕາມວັດແທກອຸນຫະພູມຂອງຕົນ ແລະ ຄົນພາຍໃນຄອບຄົວໃຫ້ເປັນ ປະຈຳໃນແຕ່ລະວັນ ເຊົ້າ-ແລງ ຖ້າມີໄຂ້ຕ້ອງໄປພົບແພດໝໍ ແລະ ໂທປຶກສາ 165, 166.
7. ປະຕິບັດການປ້ອງກັນຄົນໃນຄອບຄົວໃຫ້ດີ
o ອອກໄປຂ້ອງນອກຕ້ອງໃສ່ຜ້າອັດປາກ, ດັງ
o ປະຕິບັດຫຼັກການອະນາໄມ ການໄອຈາມ ບໍ່ຖົ່ມນ້ຳລາຍຂີ້ກະເທີ່ຊະຊາຍ
o ຖ້າຄົນໃນຄອບຄົວເປັນພະນັກງານແພດ ຈະຕ້ອງເຕືອນໃຫ້ລາວມີສະຕິໃນການ ປ້ອງກັນຕົນເອງຢ່າງເຄັ່ງຄັດຕໍ່ການອອກຈາກເຮືອນຄວນປະຕິບັດແນວໃດ

ຂໍໃຫ້ຈຳກັດຄົນໃນຄອບຄົວທີ່ຈະອອກໄປນອກ ໄປສະເພາະແຕ່ສິ່ງທີ່ຈຳເປັນ ເປັນຕົ້ນຊື້ເຄື່ອງ ອຸປະໂພກ ບໍລິໂພກ 1 ຫາ 2 ຕໍ່ອາທິດ ຫຼືການເຈັບເປັນ ແລະ ສິ່ງອື່ນໆທີ່ມີຄວາມຈຳເປັນແທ້, ເວລອອກໄປກໍ່ຕ້ອງປະຕິບັດມາດຕະການປ້ອງກັນການຕິດເຊື້ອຢ່າງເຂັ້ມງວດເຊັ່ນ ໃສ່ຜ້າອັດປາກດັງ ຢູ່ຫ່າງກັນ 2 ແມັດ, ໝັ່ນລ້າງມື ແລະ ຂ້າເຊື້ອດ້ວຍນ້ຳຢາ ຫຼື ເຫຼົ້າ 70 ອົງສາຂື້ນໄປ.

02nd Apr2020

ຂໍ້ຕົກລົງ ຂອງນາຍົກລັດຖະມົນຕີ ວ່າດ້ວຍການກໍານົດນະໂຍບາຍ ແລະ ມາດຕະການ ເພື່ອຫຼຸດຜ່ອນຜົນກະທົບຈາກການລະບາດຂອງພະຍາດCOVID-19 ຕໍ່ເສດຖະກິດຂອງລາວ 

by somchan

ນາຍົກລັດຖະມົນອອກຂໍ້ຕົກລົງ ດັ່ງນີ້:

ມາດຕາ 01: ເຫັນດີປະຕິບັດນະໂຍບາຍ ແລະ ມາດຕະການ ເພື່ອຫຼຸດຜ່ອນຜົນກະທົບຈາກການລະບາດຂອງພະຍາດ COVID-19 ຕໍ່ເສດຖະກິດ ຂອງລາວ ດັ່ງນີ້:

1.1.ດ້ານນະໂຍບາຍ: 1) ໃຫ້ປະຕິບັດນະໂຍບາຍຍົກເວັ້ນການເກັບອາກອນລາຍໄດ້ຈາກເງິນເດືອນ ຂອງຜູ້ອອກແຮງງານທັງຫມົດທັງພາກລັດ ແລະ ເອກະຊົນ ທີ່ມີລາຍຮັບ 5 ລ້ານກີບ ລົງມາ ໃນໄລຍະເວລາ 3 ເດືອນ (ເດືອນເມສາ, ພຶດສະພາ ແລະ ມິຖຸນາ 2020).

2) ໃຫ້ປະຕິບັດນະໂຍບາຍຍົກເວັ້ນການເກັບອາກອນລາຍໄດ້ ຂອງຈຸນລະວິສາຫະກິດ ຕາມທີ່ກໍານົດໄວ້ໃນມາດຕາ 29 ຂໍ້ທີ 2 ຂອງກົດຫມາຍວ່າດ້ວຍອາກອນລາຍໄດ້ ສະບັບເລກທີ 67/ສພຊ, ລົງວັນທີ 18 ມິຖຸນາ 2019 ເປັນໄລຍະເວລາ 3 ເດືອນ (ເດືອນເມສາ, ພຶດສະພາ ແລະ ມິຖຸນາ 2020);

3່) ໃຫ້ຍົກເວັ້ນພາສີ-ອາກອນ ແລະ ຄ່າທໍານຽມຕ່າງໆ ໃນການນໍາເຂົ້າທຸກປະເພດສິນຄ້າ ທີ່ນໍາໃຊ້ເຂົ້າໃນວຽກ ງານສະກັດກັ້ນ, ກັນການລະບາດ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ COVID-19 ເຊັ່ນ: ຜ້າປິດປາກ-ດັງ, ນ້ໍາຢາລ້າງມື, ເຄື່ອງອຸປະກອນການແພດ ແລະ ອື່ນໆ ທີ່ຈໍາເປັນ. ມອບໃຫ້ກະຊວງ ອຸດສາຫະກໍາ ແລະ ການຄ້າ ສົມທົບກັບກະຊວງ ສາທາລະນະສຸກ ເຮັດບັນຊີລາຍການສິນຄ້າ ທີ່ຕ້ອງການ ນໍາເຂົ້າໂດຍຍົກເວັ້ນພາສີ-ອາກອນ ແລະ ຄ່າທໍານຽມຕ່າງໆ ໃຫ້ລະອຽດ, ແລ້ວສົ່ງໃຫ້ກະຊວງການເງິນ ເພື່ອເປັນບ່ອນອີງໃນການຈັດຕັ້ງປະຕິບັດ.

4) ໃຫ້ເລື່ອນການຊໍາລະພັນທະອາກອນ ຂອງຜູ້ປະກອບການທຸລະກິດບໍລິການທ່ອງທ່ຽວ ເປັນໄລຍະເວລາ 3 ເດືອນ ເລີ່ມແຕ່ເດືອນເມສາ 2020 ເປັນຕົ້ນໄປ. ມອບໃຫ້ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເປັນໃຈກາງສົມທົບກັບພາກສ່ວນກ່ຽວຂ້ອງ ກໍານົດບັນຊີປະເພດທຸລະກິດ ທີ່ຈະໄດ້ຮັບການເລື່ອນຊໍາລະດັ່ງກ່າວໃຫ້ລະອຽດຕື່ມ.

5) ໃຫ້ຕໍ່ເວລາການສົ່ງເອກະສານລາຍງານການເງິນ ແລະ ຜົນການເຄື່ອນໄຫວວຽກງານປະຈໍາປີ 2019 ຂອງວິສາຫະກິດ ຈາກ 31 ມີນາ 2020 ໄປເປັນ 30 ເມສາ 2020.

6) ໃຫ້ຕໍ່ເວລາການຊໍາລະຄ່າທໍານຽມທາງ ຈາກວັນທີ 31 ມີນາ 2020 ມາເປັນ ວັນທີ 30 ມິຖຸນາ 2020.

7) ໃຫ້ຄົ້ນຄວ້າຜ່ອນຜັນລາຄາ ແລະ ຕໍ່ເວລາ ໃນການຊໍາລະຄ່າໄຟຟ້າ ແລະ ນ້ໍາປະປາ ຂອງຜູ້ຊົມໃຊ້ຄົວເຮືອນ ແລະ ພາກທຸລະກິດ.

8) ເຫັນດີໃຫ້ທະນາຄານແຫ່ງ ສປປ ລາວ ປະຕິບັດການປັບຫຼຸດອັດຕາດອກເບ້ຍພື້ນຖານຂອງທະນາຄານແຫ່ງ ສປປ ລາວ ແລະ ຫຼຸດອັດຕາສ່ວນເງິນແຮຝາກບັງຄັບຂອງທະນາຄານທຸລະກິດລົງ ຕາມຄວາມເຫມາະສົມໃນແຕ່ລະໄລຍະ.

9) ເຫັນດີໃຫ້ທະນາຄານແຫ່ງ ສປປ ລາວ ກໍານົດໃຫ້ບັນດາທະນາຄານທຸລະກິດ ປະຕິບັດນະໂຍບາຍສິນເຊື່ອ ເພື່ອແກ້ໄຂຜົນກະທົບຈາກການລະບາດຂອງພະຍາດ COVID-19 ເປັນຕົ້ນ: ນະໂຍບາຍເລື່ອນເວລາຊໍາ ລະຫນີ້ຕົ້ນທຶນ ແລະ ດອກເບ້ຍ, ປັບຫຼຸດອັດຕາດອກເບ້ຍ, ສະຫນອງເງິນກູ້ບ້ວງໃຫມ່ໃຫ້ບັນດາຫົວຫນ່ວຍ ທຸລະກິດ, ການປັບໂຄງສ້າງຫນີ້, ການຈັດຊັ້ນຫນີ້ ແລະ ອື່ນໆ ຕາມທີ່ໄດ້ກໍານົດໃນຂໍ້ຕົກລົງ ສະບັບເລກທີ 238/ທຫລ, ລົງວັນທີ 26 ມີນາ 2020;

10) ໃຫ້ເລື່ອນເວລາການຊໍາລະພັນທະການປະກອບສ່ວນປະກັນສັງຄົມແບບບັງຄັບ ຂອງຫົວຫນ່ວຍທຸລະກິດທີ່ໄດ້ຮັບຜົນກະທົບ ເປັນໄລຍະເວລາ 3 ເດືອນ (ເດືອນເມສາ, ພຶດສະພາ ແລະ ມິຖຸນາ 2020).

1.2 ດ້ານມາດຕະການ

1) ໃຫ້ກະຊວງແຜນການ ແລະ ການລົງທຶນ ເປັນໃຈກາງສົມທົບກັບພາກສ່ວນທີ່ກ່ຽວຂ້ອງ ສືບຕໍ່ຄົ້ນຄວ້າ ການດັດປັບຕົວເລກການຂະຫຍາຍຕົວ GDP ແລະ ຕົວເລກຄາດຫມາຍເສດຖະກິດມະຫາພາກທີ່ສໍາຄັນ ໃນປີ 2020 ໃຫ້ສອດຄ່ອງຕາມຕົວຈິງ ແລະ ສືບຕໍ່ຄົ້ນຄວ້າ ແລະ ຕີລາຄາຜົນກະທົບຕື່ມ ແຕ່ນີ້ຮອດກອງປະຊຸມສະໄຫມສາມັນ ເທື່ອທີ 9 ຂອງສະພາແຫ່ງຊາດຊຸດທີ VIII.

2) ໃຫ້ກະຊວງແຜນການ ແລະ ການລົງທຶນ, ກະຊວງການເງິນ, ກະຊວງອຸດສາຫະກໍາ ແລະ ການຄ້າ, ທະ

ນາຄານແຫ່ງ ສປປ ລາວ ແລະ ພາກສ່ວນກ່ຽວຂ້ອງ ເພີ່ມທະວີໃນການຄຸ້ມຄອງສະຖຽນລະພາບ ເສດຖະກິດມະຫາພາກໃຫ້ຮັດກຸມ ເປັນຕົ້ນແມ່ນ ການຄຸ້ມຄອງລາຄາສິນຄ້າ, ຄຸ້ມຄອງອັດຕາແລກປ່ຽນ, ການເກັບລາຍຮັບ ແລະ ການແກ້ໄຂຫນີ້ສິນ, ຊຸກຍູ້ບັນດາໂຄງການລົງທຶນຂະຫນາດໃຫຍ່ໃຫ້ດໍາເນີນການໄປ ຕາມແຜນທີ່ວາງໄວ້ ທັງອໍານວຍຄວາມສະດວກ ເພື່ອດຶງດູດການລົງທຶນ ຂອງພາກເອກະຊົນ ໃຫ້ນັບມື້ ເພີ່ມຂຶ້ນ; 3) ໃຫ້ກະຊວງການເງິນ, ບັນດາກະຊວງທີ່ມີຫົວຫນ່ວຍລາຍຮັບ ແລະ ອົງການປົກຄອງທ້ອງຖິ່ນ ເອົາໃຈໃສ່ການເກັບລາຍຮັບ ໃຫ້ໄດ້ຫຼາຍເທົ່າທີ່ມີແຫຼ່ງຈະເກັບໄດ້ ໂດຍເລັ່ງຈັດເກັບໃນທຸລະກິດທີ່ມີທ່າແຮງ ແລະ ບໍ່ ຖືກຜົນກະທົບໂດຍກົງຈາກ COVID-19.

4) ໃຫ້ກະຊວງການເງິນ, ບັນດາກະຊວງທີ່ມີຫົວຫນ່ວຍລາຍຮັບ ແລະ ອົງການປົກຄອງທ້ອງຖິ່ນ ຄຸ້ມຄອງດ້ານລາຍຈ່າຍງົບປະມານ ຢ່າງຮັດກຸມ ແລະ ບົນຈິດໃຈປະຢັດ ໂດຍໃຫ້ຫຼຸດຜ່ອນລາຍຈ່າຍບໍລິຫານປົກກະຕິ ແລະ ດັດສົມສົ່ງເສີມ ຂອງບັນດາກະຊວງ, ອົງການຂັ້ນສູນກາງ ແລະ ອົງການປົກຄອງທ້ອງຖິ່ນ ທີ່ມີ ເງື່ອນໄຂ ຢ່າງຫນ້ອຍ 10% ຂອງແຜນປີ. ພ້ອມກັນນັ້ນ ກໍໃຫ້ເລືອກເຟັ້ນຫຼຸດຜ່ອນບາງລາຍຈ່າຍຕື່ມອີກ ເປັນຕົ້ນ: ລາຍຈ່າຍການຈັດກອງປະຊຸມສໍາມະນາ, ລາຍຈ່າຍຮັບແຂກຕ່າງປະເທດ, ລາຍຈ່າຍກອງທຶນ ຄົ້ນຄວ້າວິທະຍາສາດ, ລາຍຈ່າຍການປຸກສ້າງ, ລາຍຈ່າຍສະເຫຼີມສະຫຼອງວັນສໍາຄັນຕ່າງໆຂອງພັກ-ຂອງ ຊາດ, ລາຍຈ່າຍຊື້ຊັບສົມບັດຄົງທີ່ ແລະ ລາຍຈ່າຍອື່ນໆ. ເງິນທີ່ໄດ້ຈາກການປະຢັດນັ້ນ, ໃຫ້ເອົາມາເພີ່ມ ເຂົ້າບ້ວງເງິນແຮລັດຖະບານ ເພື່ອຮອງຮັບການສະກັດກັ້ນ COVID-19. ສໍາລັບບັນດາໂຄງການລົງທຶນ ໃຫມ່ຂອງລັດ ໃນປີ 2020 ທີ່ສະພາຮອງຮັບແລ້ວ (ສະເພາະໂຄງການກໍ່ສ້າງພື້ນຖານໂຄງລ່າງ) ແມ່ນໃຫ້ ເລື່ອນໄປຈ່າຍ ໃນປີ 2021. ສືບຕໍ່ກວດກາໂຄງການລົງທຶນລັດທີ່ມີມູນຄ່າສູງເກີນຄວາມເປັນຈິງ ແລະ ບໍ່ມີປະສິດທິຜົນເພື່ອສະເຫນີໂຈະ ຫຼື ຫຼຸດມູນຄ່າລົງ.

5) ໃຫ້ຮີບຮ້ອນຄົ້ນຄວ້າມາດຕະການຊຸກຍູ້ສົ່ງເສີມການຜະລິດເປັນສິນຄ້າ ໂດຍສະເພາະແມ່ນເລັ່ງການປະຕິ ບັດກອງທຶນສົ່ງເສີມວິສາຫະກິດຂະຫນາດນ້ອຍ-ກາງ (SME) ໃຫ້ເປັນຮູບປະທໍາໂດຍໄວ.

6) ໃຫ້ຄົ້ນຄວ້າອອກບົດແນະນໍາໃນການປັບປຸງ ແລະ ສ້າງພື້ນຖານການທ່ອງທ່ຽວ ເພື່ອຮອງຮັບການທ່ອງທ່ຽວ ພາຍຫຼັງການລະບາດ COVID-19 ສາມາດຄວບຄຸມໄດ້ແລ້ວ, ໃຫ້ເລັ່ງສົ່ງເສີມການທ່ອງທ່ຽວພາຍ ໃນຫຼາຍຂຶ້ນ ແລະ ກຽມພ້ອມສ້າງຄວາມດຶງດູດນັກທ່ອງທ່ຽວຕ່າງປະເທດໃນລະດູການທ່ອງທ່ຽວ 3 ເດືອນທ້າຍປີ 2020. ພ້ອມກັນນັ້ນ, ກໍ່ໃຫ້ເພີ່ມທະວີການໂຄສະນາເຜີຍແຜ່ ໃຫ້ທຸກພາກສ່ວນທົ່ວສັງຄົມເຂົ້າໃຈຕໍ່ສະພາບຜົນກະທົບ ແລະ ຮ່ວມໃຈກັນແກ້ໄຂບັນຫາ.

7) ໃຫ້ກະກຽມການຜະລິດ ແລະ ເຈລະຈາກັບບໍລິສັດທີ່ສັ່ງຊື້ແຮ່ທາດຈາກ ສປ ຈີນ ແລະ ປະເທດອື່ນໆ ເພື່ອກຽມພ້ອມສະຫນອງແຮ່ທາດ ໃນເວລາທີ່ປະເທດຄູ່ຄ້າ ປະກາດເລັ່ງການຜະລິດອຸດສາຫະກໍາຄືນ. ພ້ອມນັ້ນ ກໍລະດົມໃຫ້ບໍລິສັດ ສືບຕໍ່ມອບພັນທະຕ່າງໆ ຕໍ່ລັດຖະບານ.

8) ໃຫ້ເອົາໃຈໃສ່ຕິດຕາມ, ກວດກາສຸຂະພາບ ແລະ ຄຸ້ມຄອງແຮງງານລາວ ທີ່ມາຈາກຕ່າງປະເທດ ເພື່ອໃຫ້ ເຂົາເຈົ້າໄດ້ເຂົ້າສູ່ລະບົບການກັກກັນຕົວເອງໃນໄລຍະ 14 ວັນ ແລະ ອອກໃບຢັ້ງຢືນໃຫ້ແຮງງານທີ່ຜ່ານ ການຕິດຕາມ ແລະ ກວດສຸຂະພາບແລ້ວ ໃຫ້ສາມາດກັບມາປະຕິບັດຫນ້າທີ່ໄດ້; 9) ໃຫ້ສຸມໃສ່ຄົ້ນຄວ້າ ແລະ ປັບປຸງການດໍາເນີນທຸລະກິດ ຂອງລັດວິສາຫະກິດການບິນລາວ ເພື່ອກຽມຄວາມ ພ້ອມໃຫ້ແກ່ການດໍາເນີນທຸລະກິດ ພາຍຫຼັງການລະບາດຂອງພະຍາດຜ່ອນຄາຍລົງ.

ມາດຕາ 02: ການຈັດຕັ້ງປະຕິບັດ

2.1 ໃຫ້ກະຊວງແຜນການ ແລະ ການລົງທຶນ, ກະຊວງການເງິນ, ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ກະຊວງກະສິກໍາ ແລະ ປ່າໄມ້, ກະຊວງອຸດສາຫະກໍາ ແລະ ການຄ້າ, ກະຊວງພະລັງງານ ແລະ ບໍ່ແຮ່, ກະຊວງໂຍທາທິການ ແລະ ຂົນສົ່ງ, ກະຊວງແຮງງານ ແລະ ສະຫວັດດີການສັງຄົມ, ກະຊວງການ ຕ່າງປະເທດ, ກະຊວງສາທາລະນະສຸກ ແລະ ພາກສ່ວນກ່ຽວຂ້ອງ ອອກນິຕິກໍາແນະນໍາ ໃນການຈັດຕັ້ງປະຕິ ບັດຕົວຈິງໃຫ້ລະອຽດຕື່ມ ຕາມບົດບາດ, ຫນ້າທີ່ ແລະ ສິດ ຂອງຂະແຫນງການຕົນ; 2.2 ມອບໃຫ້ກະຊວງແຜນການ ແລະ ການລົງທຶນ ເປັນໃຈກາງສົມທົບກັບກະຊວງການເງິນ, ກະຊວງອຸດສາ ຫະກໍາ ແລະ ການຄ້າ, ທະນາຄານແຫ່ງ ສປປ ລາວ ແລະ ພາກສ່ວນກ່ຽວຂ້ອງ ຊຸກຍູ້, ຕິດຕາມ ແລະ ກວດກາການຈັດຕັ້ງປະຕິບັດບັນດານະໂຍບາຍ ແລະ ມາດຕະການ ທີ່ກໍານົດໃນຂໍ້ຕົກລົງສະບັບນີ້ ໃຫ້ເປັນ ຮູບປະທໍາ, ໂປ່ງໃສ ແລະ ສາມາດກວດສອບໄດ້ ແລ້ວສະຫຼຸບລາຍງານຄວາມຄືບຫນ້າໃນການຈັດຕັ້ງປະຕິບັດ ໃຫ້ທ່ານ ນາຍົກລັດຖະມົນຕີ ຊາບເປັນປົກກະຕິ; 2.3 ໃນການຈັດຕັ້ງປະຕິບັດຕົວຈິງ, ຖ້າຫາກວ່ານະໂຍບາຍ ແລະ ມາດຕະການໃດ ບໍ່ສອດຄ່ອງກັບສະພາບຕົວຈິງ ແມ່ນໃຫ້ກະຊວງແຜນການ ແລະ ການລົງທຶນ ສົມທົບກັບພາກສ່ວນກ່ຽວຂ້ອງຄົ້ນຄວ້າປັບປຸງເປັນແຕ່ລະໄລຍະ.

ມາດຕາ 03: ບັນດາກະຊວງ, ອົງການຂັ້ນສູນກາງ, ອົງການປົກຄອງທ້ອງຖິ່ນ ແລະ ທຸກພາກສ່ວນທີ່ກ່ຽວຂ້ອງ ຈົ່ງຮັບຮູ້ ແລະ ໃຫ້ຄວາມຮ່ວມມື ເພື່ອຈັດຕັ້ງປະຕິບັດ ຕາມຂໍ້ຕົກລົງສະບັບນີ້ ໃຫ້ໄດ້ຮັບຜົນດີ.

ມາດຕາ 04: ຂໍ້ຕົກລົງ ສະບັບນີ້ມີຜົນສັກສິດ ນັບແຕ່ມື້ລົງລາຍເຊັນ ເປັນຕົ້ນໄປ.

 

02nd Apr2020

ຈັບໄດ້ແລ້ວ ຜູ້ທີ່ທຳຮ້າຍຮ່າງກາຍຈົນເສຍຊີວິດ ຢູ່ສວນປະຕູໄຊ

by somchan

ໃນວັນທີ 1 ເມສາ 2020 ນີ້ ພັທ ສຸລິວັນ ລາດສຸວົງ ຫົວໜ້າຫ້ອງ ຕຳຫຼວດກອງບັນຊາການ ປກສ ນະຄອນຫຼວງວຽງຈັນ ໄດ້ຖະແຫ່ງຂ່າວວ່າ: ສາມາດຈັບຕົວຜູ້ທີ່ທຳຮ້າຍຮ່າງກາຍ ທ້າວ ສີສະຫວາດ ອາຍຸ 55 ປີ ພັກເຊົາຢູ່ບ້ານໂພນທັນເໜືອ ເມືອງໄຊເສດຖາ ນະຄອນຫຼວງວຽງຈັນ ຈົນເສຍຊີວິດຢູ່ສວນປະຕູໄຊ ໃນວັນທີ 30 ມີນາ. (more…)

02nd Apr2020

ລັດຖະບານປະຕິບັດນະໂຍບາຍໃຫ້ກັບຜູ້ທີ່ໄດ້ຮັບຜົນກະທົບ ຈາກບັນຫາເສດຖະກິດ ໃນໄລຍະການລະບາດຂອງ ໂຄວິດ-19

by somchan

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ຖະແຫຼ່ງຂ່າວຕໍ່ສື່ມວນຊົນ ໃນວັນທີ 2 ເມສາ 2020 ນີ້ວ່າ: ຕໍ່ກັບການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫຼືໂຄວິດ-19 ໄດ້ສົ່ງຜົນກະທົບຫຼາຍດ້ານຕໍ່ສະພາບເສດຖະກິດ, ອັນໄດ້ເຮັດໃຫ້ເກີດມີບັນຫາຕ່າງໆ (more…)

02nd Apr2020

ກົມສື່ມວນຊົນ ປກສ ສີດຢາຂ້າເຊື້ອພະຍາດຕ້ານ ໂຄວິ-19

by somchan

ໃນວັນທີ 31 ມີນາ 2020 ນີ້ ກົມສື່ມວນຊົນ ປກສ ຮ່ວມກັບ ມູນນິທິຊ່ວຍເຫຼື່ອຄົນທຸກຍາກ ແຫ່ງ ສປປ ລາວ 1623 ໄດ້ສິດຢາຂ້າເຊື້ອພະຍາດ ໂຄວິດ-19 ຊື່ງນຳໂດຍທ່ານ ພັທ ພອນພິລຸນ ປັນຍາສີລິ ຮອງຫົວໜ້າກົມສື່ມວນຊົນ ປກສ ແລະ ທ່ານ ວຽງປະຈິດ ສີວິໄຊ ຕ່າງໜ້າຄະນະປະທານມູນນິທິຊ່ວຍເຫຼືອຄົນທຸກຍາກ ແຫ່ງ ສປປລາວ 1623. (more…)

Pages:1234567...28»