23rd Jun2017

ເຈົ້າໜ້າທີ່ ໜ່ວຍສະເພາະກິດ ປະຈຳດ່ານ ນ້ຳເກິ່ງ ເມືອງ ຫ້ວຍຊາຍ ແຂວງ ບໍ່ແກ້ວ ກວດຄົ້ນລົດ ໂດຍສານ ປະຈຳທາງ ພົບເຫັນ ຢາບ້າ 23 ມັດ

by somchan

​ໃນ​ເວລາ ​ປະມານ 10​:00 ​ໂມງ​ເຊົ້າ ຂອງ​ວັນ​ທີ 20 ມິຖຸນາ 2017 ນີ້ ເຈົ້າ​ໜ້າ​ທີ່ ໜ່ວຍ​ສະ​ເພາະ​ກິດ ​ປະຈຳ​ດ່ານ​ ນ້ຳ​ເກິ່ງ ​ເມືອງ​ຫ້ວຍຊາຍ ​ແຂວງ​ບໍ່​ແກ້ວ ​ໄດ້​ກວດ​ຄົ້ນ​ລົດ ​ໂດຍສານ ປະຈຳ​ທາງ ​ເມືອງຕົ້ນ​ເຜິ້ງ – ຫ້ວຍ​ຊາຍ ​​ໄດ້ພົບ​ເຫັນ​ຢາ​ບ້າ ຈຳນວນ 23 ມັດ ຊຸກ​ເຊື່ອງ ​ຢູ່​ໃນ​ກະ​ເປົ່າ​ເດີນທາງ​ ຂອງ​ທ້າວ ຊໍ​ລີ ຢູ່​ເຂດ​ ບ້ານ​ດອຍ​ແດງ  ​ເມືອງ​ຕົ້ນ​ເຜິ້ງ ​ແຂວງ​ບໍ່​ແກ້ວ.

ດັ່ງ​ນັ້ນ, ​ເຈົ້າ​ໜ້າ​ທີ່​ຕ້ານ ​ແລະ ສະກັດ​ກັ້ນ​ຢາ​ເສບ​ຕິດ ປກສ ​ແຂວງ​ບໍ່​ແກ້ວ ຈຶ່ງ​ໄດ້​ກັກ​ຕົວ​ຜູ້ກ່ຽວ​ມາ​ທຳ​ການ​ສືບ​ສວນ-​ສອບ​ສວນ ຜ່ານ​ການ​ສືບສວນ-​ສອບ​ສວນ​ໃນ​ເບື້ອງ​ຕົ້ນ ຜູ້ກ່ຽວ​ໄດ້​ຮັບ​ສາລະພາບ​ວ່າ ຢາ​ບ້າ​ຈຳນວນ​ດັ່ງກ່າວ​ແມ່ນ​ຂອງ​ຜູ້ກ່ຽວ​ແທ້ ພ້ອມ​ກັບ​ອ້າຍ​ຊື່ ທ້າວ​ລີ ຢູ່​ເມືອງ​ຊຳ​ເໜືອ ​ແຂວງ​ຫົວພັນ ​ເຊິ່ງ​ໄດ້​ຊື້​ມາ​ແຕ່​ບ້ານ ພຽງ​ງາມ ​ເມືອງ​ຕົ້ນ​ເຜິ້ງ ​ແຂວງ​ບໍ່​ແກ້ວ ຈຳນວນ 23 ມັດ ​ເທົ່າ​ກັບ 46.000 ​ເມັດ ​ໃນ​ລາຄາ ມັດ​ລະ 28.000 ບາດ ​ເພື່ອ​ຈະ​ນຳ​ໄປ​ສົ່ງ​ໃຫ້​ລູກ​ຄ້າ​ທີ່​ລໍຖ້າ​ຢູ່​ເຂດ​ເມືອງ​ຫ້ວຍ​ຊາຍ ​ແຂວງ​ບໍ່​ແກ້ວ ​ໃນ​ລາຄາ​ມັດ​ລະ 30.000 ບາດ ​ແຕ່​ຖືກ​ເຈົ້າ​ໜ້າ​ທີ່​ຕຳຫຼວດ​ກັກ​ຕົວ​ໄດ້​ກ່ອນ ສ່ວນ​ທ້າວ​ ລີ ​ແມ່ນ​ໄດ້​ເອົາ​ຕົວ​ຫຼົບ​ໜີ.

ປັດຈຸບັນ​ເຈົ້າ​ໜ້າ​ທີ່​ໄດ້​ກັກ​ຕົວ​ຜູ້ກ່ຽວ ພ້ອມ​ດ້ວຍ​ຂອງ​ກາງ ​ເພື່ອ​ທຳ​ຫານ​ສືບສວນ-ສອບ​ສວນ ຂະຫຍາຍ​ຜົນ​ຫາ​ກຸ່ມ​ແກ້ງ​ຄ້າຂາຍ​ຢາ​ເສບ​ຕິດ​ລາຍ​ນີ້ ມາ​ດຳ​ເນີນ​ຄະດີ​ຕາມ​ລະບຽບ​ກົດ​ໝາຍ​ຕໍ່​ໄປ.

Off
21st Jun2017

ຕຳຫຼວດ ປກສ ເມືອງ ສີສັດຕະນາກ ຈັບກຸມ ຜູ້ຄ້າຂາຍ ຢາເສບຕິດ ຂອງກາງໄດ້ 9,200 ເມັດ

by somchan

ໃນວັນທີ 8 ມິຖຸນາ 2017 ເຈົ້າໜ້າທີ່ ປກສ ກອງບັນຊາການ ເມືອງສີສັດຕະນາກ ນະຄອນຫຼວງວຽງຈັນ ໄດ້ລົງ ແກ້ໄຂ ເປົ້າໝາຍ ຄ້າຂາຍ ຢາເສບຕິດ ຢູ່ບ້ານ ຈັນສະຫວ່າງ ເມືອງສີໂຄດຕະບອງ ນະຄອນຫຼວງວຽງຈັນ ສາມາດຈັບຜູ້ຕ້ອງຫາໄດ້ 1 ຄົນ ຄ ທ້າວ ສຸດໃຈ ອາຍຸ 28 ປີ ຢູ່ບ້ານຈັນສະຫວ່າງ ເມືອງສີໂຄດຕະບອງ ຜ່ານການສອບສວນຂອງເຈົ້າໜ້າທີ່ ທ້າວ ສຸດໃຈ ໄດ້ໃຫ້ການ ຊັກທອດຫາຜູ້ຮ່ວມຂະບວນການ 3 ຄົນ.

ດັ່ງນັ້ນເຈົ້າໜ້າທີ່ຕຳຫຼວດ ຈຶ່ງໄດ້ນຳກຳລັງລົງຈັບຕົວພວກກ່ຽວມາດຳເນີນຄະດີ ຕາມລະບຽບກົດໝາຍ ເຊິ່ງທີ່ຮ່ວມຂະບວນການທັງ 3 ຄົນ ມີ ທ້າວ ອາໂນສັກ ອາຍຸ 45 ປີ ຢູ່ບ້ານໜອງດ້ວງໃຕ້ ເມືອງສີໂຄດຕະບອງ ພ້ອມຂອງກາງຢາບ້າ 7 ຖົງ ມີ 1.400 ເມັດ, ທ້າວ ຄຳສຸກ ອາຍຸ 22 ປີ ແລະ ທ້າວ ສຸບັນດິດ ອາຍຸ 33 ປີ ທັງສອງຢູ່ບ້ານທ່າພະລານໄຊ ເມືອງສີສັດຕະນາກ ພ້ອມຂອງກາງຢາບ້າ 7.800 ເມັດ ລວມທັງໝົດ 9.200 ເມັດ.
ຜ່ານການສືບສວນ-ສອບສວນ ຜູ້ຕ້ອງຫາທັງ 4 ຄົນ ໄດ້ຮັບສາລະພາບວ່າ ຂອງກາງຢາບ້າ 9.200 ເມັດ ແມ່ນຂອງຜູ້ກ່ຽວແທ້ ເຊິ່ງໄດ້ມີການພົວພັນຄ້າຂາຍຢາເສບຕິດນຳກັນມາ ແຕ່ຕົ້ນເດືອນມິຖຸນາ 2017 ແຕ່ສຸດທ້າຍມາຮອດວັນທີ 8 ມິຖຸນາ 2017 ຖືກເຈົ້າໜ້າທີ່ຈັບໄດ້.

Off
19th Jun2017

ເຈົ້າໜ້າທີ່ ປກສ ແຂວງ ອຸດົມໄຊ ມ້າງລາຍ ຄະດີ ຄ້າຂາຍຢາ ເສບຕິດ ພ້ອມດ້ວຍ ຂອງກາງ ຢາບ້າ 78 ມັດ ແລະ ເຮໂລອິນ 30 ແທ່ງ

by somchan

ໃນວັນທີ 1 ມິຖຸນາ 2017 ນີ້ ເຈົ້າໜ້າທີ່ ພະແນກຕຳຫຼວດ ສະກັດກັ້ນ ແລະ ຕ້ານຢາເສບຕິດ ປກສ ແຂວງອຸດົມໄຊ ໄດ້ມ້າງກຸ່ມແກ້ງ ຄ້າຂາຍ ຢາເສບຕິດ ຢູ່ຫ້ອງເຊົ່າ ແຫ່ງໜື່ງ ຢູ່ບ້ານ ໜອງແມງດາ ເມືອງໄຊ ແຂວງອຸດົມໄຊ ຢຶດຢາເສບຕິດ ປະເພດ ເຮໂລອິນ ຈຳນວນ 30 ແທ່ງ ນ້ຳໜັກ 11,5 ກິໂລກະລາມ ຢາບ້າຈຳນວນ 78 ມັດ ແລະ 48 ເມັດ ນ້ຳໜັກ 19 ກິໂລກະລາມ ລົດກະບະ ອີຊຸຊຸກິ ດີແມັກ 1 ຄັນ ແລະ ເງີນກີບ 35,000,000 ກີບ ແລະ ໂທລະສັບມືຖື 2 ໜ່ວຍ.ສາມາດຈັບຜູ້ຕ້ອງຫາໄດ້ 2 ຄົນ ຄື ທ້າວ ຫວາເມັງ ອາຍຸ 33 ປີ ຢູ່ບ້ານ ສວນຢາ ເມືອງ ແລະ ແຂວງຫຼວງນ້ຳທາ ແລະ ທ້າວ ຮືຈີຢາງ ອາຍຸ 29 ປີ ຢູ່ບ້ານໄຊອຸດົມ ແຂວງບໍ່ແກ້ວ.
ຜ່ານການສອບສວນຂອງເຈົ້າໜ້າທີ່ຕຳຫຼວດ ທັງສອງຮັບສາລະພາບວ່າ ເຮໂລອິນ ແລະ ຢາບ້າ ແມ່ນຂອງພວກກ່ຽວແທ້ ເຊິ່ງຢາຈຳນວນດັ່ງກ່າວແມ່ນ ໄດ້ຮັບຈາກເຄືອຄ່າຍກຽມສົ່ງໄປຂາຍຕໍ່ ແຕ່ສຸດທ້າຍຖືກເຈົ້າໜ້າທີ່ຈັບໄດ້ກ່ອນ.
ຕໍ່ລາຍຄະດີດັ່ງກ່າວ ເຈົ້າໜ້າທີ່ແມ່ນພວມເລັງສືບສວນ-ສອບສວນ ຂະຫຍາຍຜົນຫາຂະບວນການ ຄ້າຂາຍຢາເສບຕິດຕໍ່ໄປ

Off
26th May2017

ປກສ ແຂວງ ສະຫວັນນະເຂດ ກັກຕົວ ຜູ້ຖືກຫາ ພ້ອມຢາບ້າ 8000 ເມັດ

by somchan

ວັນ​ທີ 19 ພຶດສະພາ 2017 ນີ້ ​ເຈົ້າ​ໜ້າທີ່ຕຳຫຼວດ ພະ​ແນ​ກສະກັດ​ກັ້ນ ​ແລະ ຕ້ານ​ຢາ​ເສບ​ຕິດ ປກສ ​ແຂວງ​ສະຫວັນ​ນະ​ເຂດ ​ໄດ້​ມ້າງ​ຄະດີ​ຄ້າຂາຍ​ຢາ​ເສບ​ຕິດ ຢູ່​ເຂດ ບ້ານ ນາ​ຄຳ​ນົນ ​ເມືອງ​ສອງ​ຄອນ ​ແຂວງ​ສະຫວັນ​ນະ​ເຂດ ສາມາດ​ຍຶດຢາ​ບ້າ​ໄດ້ 4 ມັດ​ ​ເທົ່າ​ກັບ 8000 ​ເມັດ ພ້ອມ​ທັງ​ກັກ​ຕົວພວກ​ຄ້າຂາຍ ຢາ​ເສບ​ຕິດ ​ໄດ້ 3 ຄົນ ຄື: ທ້າວ ສອງ​ປານ​ທອງ ອາຍຸ 35 ປີ ຢູ່​ບ້ານ​ນາ​ຄູນ, ທ້າວ ສົມ​ຄິດ ສຸກ​ກະ​ເສີມ (ຄິດ) ອາຍຸ 47 ປີ ຢູ່​ບ້ານ ​ແກງ​ຫີນ​ແກ້ວ ​ແລະ ທ້າວ ຈັນ​ທະວີ​ໄຊ (ອອດ) ອາຍຸ 40 ປີ ຢູ່​ບ້ານ ຈອມ​ເພັດ ທັງ​ສາມ​ຄົນ​ຢູ່ ​ເມືອງ ສອງ​ຄອນ ​ແຂ​ວງສະຫວັນ​ນະ​ເຂດ.

ປະຈຸ​ບັນ ລາຍ​ຄະດີ​ດັ່ງກ່າວ ພວມ​ຢູ່​ໃນ​ຂັ້ນ​ຕອນ​ການ​ສືບສວນ-​ສອບ​ສວນ ຂອງ​ເຈົ້າ​ໜ້າ​ທີ່ ​ເພື່ອ​ຫາ​ທີ່​ມາ​ຂອງ​ຢາ​ເສບ​ຕິດ ​ແລະ ຫາ​ກຸ່ມ​ແກ້ງ​ຮ່ວມ​ຂະ​ບວນການ.

Off
22nd May2017

ຈັບຢາບ້າ 12 ມັດ ພ້ອມກັກຕົວ ຜູ້ຖືກຫາ 03 ຄົນ

by somchan

ຕົ້ນ​ເດືອນ ພຶດສະພາ 2017 ນີ້ ​ເຈົ້າ​ໜ້າ​ທີ່​ກອງ​ບັນຊາ​ການ ປກສ ​ເມືອງ​ຕົ້ນ​ເຜິ້ງ ​ໄດ້​ປະສານ​ສົມທົບ​ກັບ​ພະ​ແນ​ກຕ້ານ ​ແລະ ສະກັດ​ກັ້ນ​ຢາ​ເສບ​ຕິດ ປກສ ​ແຂວງ​ບໍ່​ແກ້ວ ມ້າງ​ກຸ້ມ​ແກ້ງ​ຄ້າຂາຍ​ຢາ​ເສບ​ຕິດ ຢູ່​ບ້ານ​ພັກ​ແຫ່ງ​ໜື່ງ​ໃນ​ຂອບ​ເຂດ ​ເມືອງ​ຕົ້ນ​ເຜິ້ງ ສາມາດ​ຍຶດ​ໄດ້​ຂອງ​ກາງ​ຢາ​ເສບ​ຕິດ ປະ​ເພດ​ຢາ​ບ້າ​ຈຳນວນ 12 ມັດ ​ເທົ່າ​ກັບ 24,000 ​ເມັດ, ລົດ​ວີ​ໂກ້​ສີ​ປອນ​ເງີ​ນ 1 ຄັນ ໝາຍ​ເລກ​ທະບຽນ ກກ 3008 ບໍ່​ແກ້ວ, ລົດຈັກ​ເວ​ບ 110 ສີຂາວ​ບໍ່​ມີ​ທະບຽນ 1 ຄັນ ​ແລະ ຈັບ​ຜູ້​ຖືກ​ຫາ​ໄດ້ 3 ຄົນ​ຄື: ທ້າວ ຈາຈ່າ ອາຍຸ 23 ປີ ຢູ່​ບ້ານ ຫ້ວຍ​ສາກ , ທ້າວ ຈາ​ໂຈ​ຄ່າ ອາຍຸ 30 ປີ ຢູ່​ບ້ານ ປຸງ​ເລາະ ທັງ​ສອງ​ຢູ່​ເມືອງ​ເມິງ ​ແລະ ທ້າວ ຈາ​ຕີ່ ອາຍຸ 26 ປີ ຢູ່​ບ້ານ​ຫ້ວຍ​ລົມ ​ເມືອງ​ຕົ້ນ​ເຜິ້ງ ​ແຂວງ​ບໍ່​ແກ້ວ. ຜ່ານ​ການ​ສືບສວນ-​ສອບ​ສວນ ​ໃນ​ເບື້ອງ​ຕົ້ນຂອງ​ເຈົ້າ​ໜ້າ​ທີ່ ພວກ​ກ່ຽວ​ທັງ​ສາມ​ຮັບ​ສາລະພາບ​ວ່າ: ຢາ​ບ້າ​ຈຳນວນ​ດັ່ງກ່າວ ​ແມ່ນ​ຢູ່​ໃນ​ການ​ຄອບ​ຄອງ​ຂອງ​ພວກ​ກ່ຽວ​ແທ້, ​ເຊິ່ງ​ໄດ້​ຮັບ​ມາ​ຈາກ ນາງ ນິຕິ ຢູ່​ປະ​ເທດ​ເພື່ອນ​ບ້ານ  ​ແລະ ຈະ​ນຳ​ຢາ​ບ້າ​ຈຳນວນ​ດັ່ງກ່າວ ​ໄປສົ່ງ​ໃຫ້​ຄົນ​ລາວ​ສູງ​ບໍ່​ຮູ້​ຊື່ ຕາມ​ການ​ແນະນຳ​ຂອງ ນາງ ນິຕິ ​ແລະ ຈະ​ໄດ້​ຄ່າ​ຈ້າງ​ເປັນ​ເງີ​ນ 30,000 ບາດ, ​ແຕ່​ຖືກ​ເຈົ້າ​ໜ້າ​ທີ່​ຈັບ​ໄດ້​ກ່ອນ. ດັ່ງ​ນັ້ນ​ເຈົ້າ​ໜ້າ​ທີ່​ຈຶ່ງ​ໄດ້​ກັກ​ຕົວ​ພວກ​ກ່ຽວ​ທັງ​ສາມ​ຄົນ​ໄວ້ ​ເພື່ອ​ທຳ​ການ​ສືບສວນ-​ສອບ​ສວນ ຫາ​ກຸ່ມ​ແກ້ງ​ຄ້າຂາຍ​ຢາ​ເສບ​ຕິດ​ລາຍ​ນີ້ ມາ​ດຳ​ເນີນ​ຄະດີ​ຕາມ​ລະບຽບ​ກົດໝາຍ​ຕໍ່​ໄປ.

Off
19th May2017

ຈັບຢາບ້າ 3 ເປົາ ເຈົ້າກຳເອົາຕົວລົບໜີ

by somchan

​ໃນ​ວັນ​ທີ 7 ພຶດສະພາ 2017 ນີ້ ​ເຈົ້າ​ໜ້າ​ທີ່​ຕຳຫຼວດ​ ກວດ​ຄົນ​ເຂົ້າ-​ອອກ​ເມືອງ ​ໄດ້​ສົມທົບ​ກັບ​ພາກສ່ວນ​ທີ່​ກ່ຽວຂ້ອງ ທີ່​ປະຈຳການ​ຢູ່​ດ່ານ​ປາກ​ທາ ​ເມືອງ​ປາກ​ທາ  ​ແຂວງ​ບໍ່​ແກ້ວ ​ໄດ້​ຢຶດຢາ​​ເສບ​ຕິດ  ປະ​ເພດ​ຢາ​ບ້າ ຈຳນວນ 3 ​ເປົາ ມີ 453 ມັດ ​ເຊິ່ງ​ເທົ່າ​ກັບ 90,600 ​ເມັດ ພ້ອມ​ດ້ວຍ​ເຮືອ 1 ລຳ ຕໍ່​ກັບ​ຄະດີ​ ລາຍ​ດັ່ງກ່າວ​ນີ້ ​ເຈົ້າ​ໜ້າ​ທີ່​ໄດ້​ແຈ້ງ​ໃຫ້​ຮູ້​ວ່າ: ​ໃນ​ວັນ​ທີ 7 ພຶດສະພາ ​ເຈົ້າ​ໜ້າ​ທີ່​ຕຳຫຼວດ-​ກວດ​ຄົນ​ເຂົ້າ​ອອກ​ເມືອງ ປະຈຳ​ຢູ່​ດ່ານ ປາກ​ທາ ​ເມືອງ​ປາກ​ທາ ​ໄດ້​ສັງ​ເກດ​ເຫັນ​ເຮືອ​ກາບ​ລຳ​ໜື່ງ ທີ່​ມີ​ຜູ້​ໂດຍສານ 02 ຄົ​ນ ທີ່​ກຳລັງ​ລ່ອງ​ເຮືອ​ລົງ​ມາ​ຕາມ​ແມ່​ນ້ຳຂອງ ມີ​ທ່າ​ທາງ​ຜິດ​ສັງ​ເກດ ​ເມື່ອ​ທາງ​ເຈົ້າ​ໜ້າ​ທີ່​ຂອງ​ພວກ​ເຮົາ​ເຫັນ​ແນວ​ນັ້ນ ຈຶ່ງ​ໄດ້​ຂີ່​ເຮື​ອ​ເພື່ອ​ໄປ​ຫາ​ເຮືອ​ລຳ​ດັ່ງກ່າວ ​ເພື່ອ​ຈະ​ຂໍ​ກວດ​ຄົ້ນ ​ແຕາ​ທາງ​ເຈົ້າ​ຂອງ​ເຮືອ​ໄດ້​ນຳ​ເອົາ​ເຮືອ​ເຂົ້າ​ທຽບ​ຝັ່ງ ​ແລ້ວ​ເອົາ​ຕົວ​ລົບ​ໜີ​ກ່ອນ ​ເມື່ອ​ເຈົ້າໜ້າ​ທີ່ ​ໄປ​ຮອດ​ເຮືອ​ລຳ​ດັ່ງກ່າວ ຈຶ່ງ​ໄດ້​ທຳ​ການ​ກວດ​ຄົ້ນ ​ແລະ ພົບ​ເຫັນ​ຢາ​ເສບ​ຕິດ ປະ​ເພດ​ຢາ​ບ້າ ຈຳນວນ​ດັ່ງກ່າວ ຈິ່ງ​ມອບ​ໃຫ້​ພາກສ່ວນ​ທີ່​ກ່ຽວຂ້ອງ ​ເພື່ອ​ທຳ​ການ​ຂະຫຍາຍ​ຜົນ​ຫາ​ຜູ້​ກະທຳ​ຜິດ​ມາ​ດຳ​ເນີນ​ຄະດີ ຕາມ​ລະບຽບ​ກົດໝາຍ.

Off
19th May2017

ເຈົ້າໜ້າທີ່ ຕຳຫຼວດ ເມືອງ ສີສັດຕະນາກ ຈັບຜູ້ຄ້າຂາຍ ຢາເສບຕິດ ພ້ອມຢາບ້າ 8493 ເມັດ

by somchan

​ໃນ​ວັນ​ທີ 2 ພຶດສະພາ 2017 ນີ້ ປກສ ​ເມືອງ​ສີ​ສັດຕະ​ນາກ ນະຄອນຫຼວງວຽງຈັນ ​ໄດ້​ມ້າງ​ກຸ່ມ​ແກ້ງ​ຄ້າຂາຍ​ຢາ​ເສບ​ຕິ​ດ ຢູ່​ເຂດ​ບ້ານ​ດອນນົກ​ຂຸ້ນ ຢຶດຂອງ​ກາງ​ຢາ​ບ້າ ​ໄດ້ 8493 ​ເມັດ ​ແລະ ກັກ​ຕົວ​ຜູ້​ຕ້ອງ​ຫາ​ໄດ້ 7 ຄົນ​ຄື: ທ້າວ ສົມ​ຊາຍ (ດ່ອງ) ອາຍຸ 22 ປີ ຢູ່​ບ້ານ​ສີ​ໄຄ​ທົ່ງ ​ເມືອງ ສີ​ໂຄດ​ຕະບອງ; ທ້າວ ພຸດທະ​ສອນ (​ເລ້) ອາຍຸ 25 ປີ ຢູ່​ບ້ານ​ດອນ​ກອຍ; ທ້າວ ພັນ ອາຍຸ 20 ປີ ບ້ານ​ດອນ​ນົກ​ຂຸ້ມ, ທ້າວ ​ແຂກ ອາຍຸ 27 ປີ ຢູ່​ບ້ານ ດົງ​ສະຫວາດ ທັງ 3 ຢູ່ ເມືອງ​ສີ​ສັດຕະ​ນາກ, ທ້າວ ຖາວອນ (ອ້າຍ) ອາຍຸ 22 ປີ ຢູ່​ບ້ານ​ທົ່ງ​ປົ່ງ ​ເມືອງ​ສີ​ໂຄດ​ຕະບອງ, ທ້າວ ກ໋ອດຊິ​ລາ ອາຍຸ 17 ປີ ຢູ່​ບ້ານ​ທ່າ​ສະຫວ່າງ ​ແລະ ທ້າວ ບຸນ​ຕ໋ອງ (ຕ໋ອງ) ອາຍຸ 18 ປີ ຢູ່​ບ້ານ​ທ່າ​ງ່ອນ ທັງ​ 2 ຢູ່​ເມືອງ​ໄຊ​ທານີ ປະຈຸ​ບັນ ພວກ​ກ່ຽວ​ແມ່ນ​ຍັງ​ຢູ່​ໃນ​ຂັ້ນ​ຕອນ​ສືບສວນ​-ສອບ​ສວນ ຂອງ​ເຈົ້າ​ໜ້າ​ທີ່.

Off
16th May2017

ເຈົ້າໜ້າທີ່ ຕຳຫຼວດ ແຂວງ ຈຳປາສັກ ຈັບຜູ້ຄ້າຂາຍ ຢາເສບຕິດ ພ້ອມຢາບ້າ 4,000 ກວ່າເມັດ

by somchan

ໃນ​ວັນ​ທີ 1 ພຶດສະພາ 2017 ນີ້ ​ເຈົ້າ​ໜ້າ​ທີ່​ຕຳຫຼວດ​ສະກັດ​ກັ້ນ ​ແລະ ຕ້ານ​ຢາ​ເສບ​ຕິດ ປກສ ​ແຂວງ​ຈຳປາ​ສັກ ​ໄດ້​ຈັບ​ເປົ້າ​ໝາຍ​ຄ້າຂາຍ​ຢາ​ບ້າ ​ໄດ້ 4 ຄົນພ້ອມ​ດ້ວຍ​ຂອງ​ກາງ​ຢາ​ບ້າ 4,324 ​ເມັດ, ​ໂທລະສັບ 4 ໜ່ວຍ, ລົດຈັກ 2 ຄັນ​ຢູ່​ເຮືອນ​ພັກ​ແຫ່ງ​ໜື່ງ ​ເຂດ​ບ້ານ​ຫົວ​ແຊ ​ເມືອງ​ບາ​ຈຽງ​ຈະ​ເລີ​ນສຸກ ​ແຂວງ​ຈຳປາ​ສັກ ຜູ້​ຕ້ອງ​ຫາ​ທັງ 4 ຄົນ ຄື: ທ້າວ ​ລຸ້ງ ອາຍຸ 16 ປີ ຢູ່​ບ້ານ ດົງ​ດອກ​ໄມ້ ​ເມືອງ​ໄຊ​ພູທອນ ​ແຂວງ​ສະຫວັນ​ນະ​ເຂດ; ທ້າວ ຈິ​ມມີ້ ອາຍຸ 18 ປີ ຢູ່​ບ້ານ ງົວ​ແດງ , ທ້າວ​ ນິຍົມ ​ໄຊ​ຍະ​ລາດ ອາຍຸ 41 ປີ ຢູ່​ບ້ານ​ປາກ​ຊອນ ທັງ​ສອງ​ຢູ່​ເມືອງ ຊະນະ​ສົມບູນ ​ແຂວງ​ຈຳປາ​ສັກ ​ແລະ ທ້າວ ​ໄຊ​ຍະ​ສິດ (​ໂລ້) ອາຍຸ 18 ປີ ຢູ່​ບ້ານ ​ໂພນ​ງາມ ​ເມືອງ​ປາກ​ເຊ ​ແຂວງ​ຈຳປາ​ສັກ ມາ​ສອບ​ສວນ​ຂະຫຍາຍ​ຜົນ​ຫາ​ຜູ້​ຮ່ວມ​ຂະ​ບວນການ.

ຜ່ານ​ການ​ສືບສວນ-​ສອບ​ສວນ ຂອງ​ເຈົ້າ​ໜ້າ​ທີ່ ພວກ​ກ່ຽວ​ຮັບ​ສາລະພາບ​ວ່າ ຢາ​ບ້າ​ຈຳນວນ​ດັ່ງກ່າວ ​ແມ່ນ​ຂອງ​ພວກ​ກ່ຽວ​ແທ້ ​ໂດຍ​ຮ່ວມ​ກັນ​ເຄື່ອນ​ໄຫວ​ຄ້າຂາຍ​ຢາ​ເສບ​ຕິດ​ມາ​ແຕ່​ຕົ້ນ​ປີ 2017.

Off
12th May2017

ຄາດຕະກຳເມຍ ຍ້ອນຄວາມຫຶງຫວງ

by somchan

ເຈົ້າ​ໜ້າ​ທີ່​ຕຳຫຼວດ ພະ​ແນ​ກສືບສວນ-​ສອບ​ສວນ ກອງ​ບັນຊາ​ການ ​ເມືອງ​ປາກ​ລາຍ ​ແຂວງ​​ໄຊ​ຍະ​ບູລີ ​ໃຫ້​ຮູ້​ວ່າ ​​ໃນວັນ​ທີ 27 ​ເມສາ 2017 ໄດ້​ມີ​ເຫດ​ຄາດ​ຕະກຳ ຢູ່​ບ້ານ​ນາ​ໂພ ​ເມືອງ​ປາກ​ລາຍ ​ແຂວງ​ໄຊ​ຍະ​ບູລີ ຜູ້​ຕາຍ​ແມ່ນ​ ນາງ​ ນັດ ອາຍຸ 22 ປີ (more…)

Off
02nd May2017

ເຈົ້າໜ້າທີ່ຕຳຫຼວດ ແຂວງອຸດົມໄຊ ກັກຕົວ ເປົ້າໝາຍ 3 ຄົນ ພ້ອມຢາຝິ່ນ 8 ກິໂລກຣາມ

by somchan

ໃນ​ວັນ​ທີ 27 ​ເມສາ 2017 ນີ້ ​ເຈົ້າ​ໜ້າ​ທີ່​ຕຳຫຼວດ ພະ​ແນ​ກຕຳຫຼວດ ສະກັດ​ກັ້ນ ​ແລະ ຕ້ານ​ຢາ​ເສບ​ຕິດ ກອງ​ບັນ​ຊາ​ການ ປກສ ​ແຂວງ​ອຸດົມ​ໄຊ ​ໄດ້​ກວດ​ຄົ້ນ ​ເປົ້າ​ໝາຍ​ເຄື່ອນ​ໄຫວ​ຄ້າຂາຍ​ຢາ​ເສບ​ຕິດ ຢູ່​ເສັ້ນ​ທາງ​ຫຼັກ​ກິ​ໂລ​ແມັດ ທີ່ 37 ລະຫວ່າງ ​ແຂວງ​ອຸດົມ​ໄຊ ຫາ ​ແຂວງ​ຜົ້ງ​ສາລີ ສາມາດ​ຍຶດຢາ​ຝິ່ນ​ໄດ້ 8 ກິ​ໂລກຣາມ ພ້ອມ​ທັງ​ກັກ​ຕົວ​ເປົ້າ​ໝາຍ 3 ຄົນ ຄື ທ້າວ ​ໄມ​ທຳ ອາຍຸ 58 ປີ ປະຊາ​ຊົນ ຢູ່​ບ້ານ​ຍໍ້ ​ເມືອງ​ບຸນ​ເໜືອ, ທ້າວ ສົມ ອາຍຸ 41 ປີ, ປະຊາຊົນ ຢູ່​ບ້ານ​ຫາດ​ງາ ​ແລະ ທ້າວ ຕຸ້ຍ ອາຍຸ 31 ປີ ປະຊາຊົນ ຢູ່​ບ້ານ ຫາດ​ງາ​ໃຕ້ ​ເມືອງ​ສຳພັນ ​ແຂວງ​ຜົ້ງ​ສາລີ.

​ເຈົ້າ​ໜ້າ​ທີ່​ຕຳຫຼວດ ​ໄດ້​ໃຫ້​ຮູ້​ວ່າ ຜູ້​ກະທຳ​ຜິດ ທັງ 3 ຄົນ ​ໄດ້​ນຳ​​ເອົາ​ຢາຝິ່ນ​ ນ້ຳໜັກ 8 ກິ​ໂລກຣາມ ຊຸກ​ເຊື່ອງ​ໃສ່​ໄວ້​ໃນ​ໝໍ້ ​ແລ້ວ​ຂັບ​ຂີ່​ລົດຈັກ ຈາກ​ແຂວງ​ຜົ້ງ​ສາລີ ​ເດີນທາງ​ມາ ​ແຂວງ​ອຸດົມ​ໄຊ ​ເພື່ອ​ນຳ​ເອົາ​ຢາຝິ່ນ​ຈຳນວນ​ດັ່ງກ່າວ ມາ​ຂາຍ​ໃຫ້ລູກ​ຄ້າ ​​ແຕ່​ເຈົ້າ​ໜ້າ​ທີ່​ຕຳຫຼວດ ກວດ​ກາພົບ​​ເຫັນ ​ແລະ ​ໄດ້​ຍຶດຢາຝິ່ນ​ຈຳນວນ​ດັ່ງກ່າວ ພ້ອມ​ທັງ​ກັກ​ຕົວ​ພວກ​ກ່ຽວ​ໄວ້ ​ເພື່ອ​ດຳ​ເນີນ​ຄະດີ​ຕາມ​ກົດໝາຍ.

Off
Pages:«12345678...14»