13th Aug2020

ພົບຂອງກາງຢາບ້າ 18,000 ກ່ວາເມັດ ຊຸກເຊື່ອງໄວ້ໃນລົດຕູ້

by somchan

ຕາມການລາຍງານຂອງເຈົ້າໜ້າທີ່ ພະແນກຕຳຫຼວດ ປກສ ເມືອງພຽງ ແຂວງ ໄຊຍະບູລີ ໃຫ້ຮູ້ວ່າໃນວັນທີ 7 ສິງຫາ ນີ້ ໄດ້ຮັບແລ່ງຂ່າວຈາກພົນລະເມືອງດີວ່າ ມີກຸ່ມຄົນບໍ່ດີເຄື່ອນໄຫວຂົນສົ່ງ ຢາເສບຕິດປະເພດຢາບ້າ ຢູ່ໃນເທດສະບານເມືອງພຽງ ຫາ ເມືອງໄຊຍະບູລີ ດັ່ງນັ້ນຈື່ງໄດ້ນຳກຳລັງວິຊາສະເພາະອອກກວດກາ ຕິດຕາມ ສາມາດກັກຜູ້ຖືກຫາໄດ້ 2 ຄົນຄື: ທ້າວ ເກົ່າລີ ອາຍຸ 28 ປີ ຢູ່ບ້ານໂພນສະຫວ່າງ ແລະ ທ້ານ ເຊິນ ອາຍຸ 53 ປີ ຢູ່ບ້ານໂພນຊຽງ ທັງສອງຢູ່ເມືອງນ້ຳບາກ ແຂວງ ຫຼວງພະບາງ ຜ່ານການກວດຄົ້ນພາຫານະ ລົດໃຫ່ຍ ຍີ່ຫໍ້ ສະຕາແລັກ ໝາຍເລກທະບຽນ ກພ 0920 ຫຼວງພະບາງ ພົບເຫັນຢາບ້າຈຳນວນ 9 ມັດ ເທົ່າກັບ 18,000 ເມັດ ໂທລະສັບມືຖື 4 ເຄືອງ ແລະ ໂມງໃສ່ແຂນ 1 ໜ່ວຍ.

ຈາກນັ້ນ ຈື່ງໄດ້ມອບຜູ້ກ່ຽວທັງສອງ ໃຫ້ເຈົ້າໜ້າທີ ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ຫ້ອງຕຳຫຼວດ ປກສ ແຂວງ ໄຊຍະບູລີ ດຳເນີນການສືບສວນ-ສອບສວນ ເພື່ອຂະຫຍາຍຜົນຕາມຂັ້ນຕອນຂອງກົດໝາຍ.

Off

Comments are closed.