31st Aug2020

ກະຊວງ ປກສ ສ້າງຂະບວນການກິລາຍິງປືນ ຂ່ໍານັບຮັບຕ້ອນກອງປະຊຸມໃຫຍ່ ຄັ້ງທີ V ອົງຄະນະພັກກະຊວງ ປກສ

by somchan

ການຈັດການແຂ່ງຂັນກິລາຍິງປືນ ເພື່ອຂ່ຳນັບຮັບຕ້ອນກອງປະຊຸມໃຫຍ່ ຄັ້ງທີ V ຂອງ ອົງຄະນະພັກກະຊວງ ປກສ ໄດ້ຈັດຂຶ້ນໃນວັນທີ 29 ສິງຫາ 2020 ໂດຍມີ ພົທ ວິໄລ ຫຼ້າຄໍາຟອງ ເລຂາທິການສູນ ກາງພັກ ລັດຖະມົນຕີກະຊວງ ປກສ, ມີຄະນະລັດຖະມົນຕີ, ຫົວຫນ້າກົມໃຫຍ່, ຫ້ອງວ່າການ, ກອງບັນຊາ ການ, ວິທະຍາຄານ, ລັດວິສາຫະກິດ, ແຂກຮັບເຊີນ ແລະ ນັກກິລາເຂົ້າຮ່ວມ.

ພົຕ ປອ ທອງເຫຼັກ ມັງຫນໍ່ເມກ ຮອງລັດຖະມົນຕີກະຊວງ ປກສ, ທັງເປັນຫົວຫນ້າອະນຸກໍາມະການ ຂະບວນການ ກ່າວວ່າ: ໂດຍປະຕິບັດຕາມທິດຊີ້ນໍາຂອງການນໍາກະຊວງ ປກສ ໃນການສ້າງຂະບວນການ ແລະ ສ້າງຜົນງານເພື່ອຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ປກສ ແລະ ວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 60 ( 5 ເມສາ 1961-5 ເມສາ 2021 ), ກະຊວງ ປກສ ໄດ້ສ້າງຂະບວນການແຂ່ງຂັນດ້ານຕ່າງໆຢ່າງເປັນຂະບວນຟົດຟື້ນ ເຊັ່ນ: ຂະບວນການຊຸກກຍູ້ວຽກງານວິຊາສະເພາະແກ້ໄຂປະກົດການຫຍໍ້ທໍ້ໃນສັງຄົມ, ຂະບວນການປັບປຸງກໍາລັງ ແລະ ການປະຕິບັດລະບຽບວິໄນຂອງກໍາລັງໃຫ້ເຂັ້ມແຂງ, ຂະບວນການສ້າງຫນ່ວຍພັກປອດໃສ ເຂັ້ມແຂງ ຫນັກແໜ້ນ, ຂະບວນການອານະໄມ ປະດັບປະດາ, ຂະບວນການກິລາ ແລະ ສິລະປະ; ສຳລັບຂະບວນການແຂ່ງຂັນກິລາຍິງປືນໃນຄັ້ງນີ້ ຈຸດປະສົງເພື່ອຝຶກທັກສະ ກໍຄືຄວາມສໍານານໃນການໃຊ້ອາວຸດໃຫ້ແກ່ພະນັກງານ-ນັກຮົບໃນກໍາລັງປ້ອງກັນຄວາມສະຫງົບໃຫ້ສູງຂຶ້ນ, ເພື່ອຝຶກຊ້ອມກໍາລັງກາຍ ແລະ ກໍາລັງໃຈໃຫ້ຫນຽວເເຫນ້ນກຽມພ້ອມສູ້ຮົບໃນທຸກສະຖານະການ ເພື່ອປົກປັກຮັກສາປະເທດຊາດ ແລະ ຫມາກຜົນຂອງການປະຕິວັດ, ທັງເປັນການຮັດແຫນ້ນຄວາມສາມັກຄີລະຫວ່າງຄະນະພັກ-ຄະນະນໍາກະຊວງ ປກສ ກັບກົມກອງອ້ອມຂ້າງ ຮ່ວມກັບການນໍາພັກ-ລັດ, ບັນດາການນໍາກະຊວງ, ຂະແຫນງການ ໃຫ້ແຫນ້ນແຟ້ນຂຶ້ນກວ່າເກົ່າ.

ຜົນການແຂ່ງຂັນ: ຮຸ່ນທີມການນໍາ VIP 1 ຊະນະເລີດແມ່ນ ພົທ ວິໄລ ຫຼ້າຄໍາຟອງ ລັດຖະມົນຕີກະຊວງ ປກສ, ຮອງຊະນະເລີດອັນດັບທີ 1 ແມ່ນ ຜົຕ ປອ ສົມຫວັງທໍາມະສິດ ຮອງ ລັດຖະມົນຕີກະຊວງ ປກສ, ຮອງຊະນະເລີດອັນດັບທີ 2 ແມ່ນ ພົຕ ກົງທອງ ວົງວິຈິດ ຮອງລັດຖະມົນຕີ ກະຊວງ ປກສ; ຮຸ້ນການນໍາ VIP 2 ຊະນະເລີດແມ່ນ ພົຕ ວັນທອງ ກອງມະນີ ຫົວຫນ້າກົມໃຫຍ່ການເມືອງ ປກສ, ຮອງຊະນະເລີດອັນດັບທີ 1 ແມ່ນ ພົຈວ ຄໍາສາຍ ຈັນທະວົງ ຮອງຫົວຫນ້າກົມໃຫຍ່ການເມືອງ ປກສ, ຮອງຊະນະເລີດອັນດັບທີ 2 ແມ່ນ ພົຈວ ຄໍາມ້າວ ຫຼ້າຈັນເພັດ ຫົວຫນ້າກົມ 504; ຮຸນການນໍາ VIP 3 ຊະນະເລີດແມ່ນ ພັອ ປອ ມາລາ ວິລະຈິດ ຫົວຫນ້າກົມຄົ້ນຄວ້າວິທະຍາສາດ ແລະ ປະຫວັດສາດ, ຮອງຊະນະ ເລີດອັນດັບທີ 1 ແມ່ນ ພັອ ດາວັນ ວິຄໍາຊາວ ຫົວຫນ້າກົມເຊື້ອໄຟ ກົມໃຫຍ່ພະລາທິການ ປກສ, ຮອງຊະນະ ເລີດອັນດັບທີ 2 ແມ່ນ ພັທ ສົມໄຊ ແສງຄໍາຢອງ ຈາກກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ.

Off

Comments are closed.