08th Sep2020

ການສະແດງສິລະປະວັນນະຄະດີເພື່ອຕ້ອນຮັບກອງປະຊຸມໃຫ່ຍຄັ້ງທີ 5 ຂອງອົງຄະນະພັກກະຊວງ ປກສ

by somchan

ການສະແດງສິລິປະວັນນະຄະດີເພື່ອຂ່ຳນັບຮັບຕ້ອນກອງປະຊຸມໃຫ່ຍຄັ້ງທີ 5 ຂອງອົງຄະນະພັກກະຊວງປ້ອງກັນຄວາມສະຫງົບ ແລະ ວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 60 ປີ ໄດ້ຈັດຂື້ນໃນຄ່ຳຄືນວັນທີ 7 ກັນຍາ 2020 ນີ້ ທີ່ສະໂມສອນກະຊວງປ້ອງກັນຄວາມສະຫງົບ, ນະຄອນຫຼວງວຽງຈັນ ໂດຍການເຂົ້າຮ່ວມເປັນກຽດຮັບຊົມມີ ພົນໂທ ວິໄລ ຫຼ້າຄຳຟອງ ເລຂາທິການສູນກາງພັກ, ເລຂາອົງຄະນະພັກກະຊວງ ລັດຖະມົນຕີກະຊວງປ້ອງກັນຄວາມສະຫງົບ, ມີຮອງລັດຖະມົນຕີ, ຜູ້ຊ່ວຍລັດຖະມົນຕີ, ບັນດາຫົວໜ້າກົມໃຫ່ຍ, ຫ້ອງວ່າການ, ກອງບັນຊາການ, ວິທະຍາຄານ, ລັດວິສາຫະກິດບໍລິການຄວາມປອດໄພ, ນາຍ ແລະ ພົນຕຳຫຼວດກົມກອງອ້ອມຂ້າງກະຊວງ ເຂົ້າຮ່ວມຮັບຊົມຈຳນວນຫຼວງຫຼາຍ.

ພັນເອກ ສອນພະຈັນ ທຳມະວົງ ຫົວໜ້າກົມໂຄສະນາອົບຮົມປ້ອງກັນຄວາມສະຫງົບ ໄດ້ຕາງໜ້າໃຫ້ອານຸກຳມະການຂະບວນການ ໄດ້ກ່າວວ່າ: ການສະແດງສິລະປະວັນນະຄະດີໃນຄັ້ງນີ້ມີທັງໝົດ 10 ລາຍການຄື: ບົດຟ້ອນຕຳຫຼວດລາວ, ບົດເພງພັກໄດ້ນຳພາ ແລະ ພູມໃຈໃນໜ້າທີ່, ບົດຟ້ອນທຳມະຊາດບ້ານນາ, ບົດເພງໄຕ້ຮົ່ມທຸງໄຊສີແດງ ແລະ 60 ປີ ມີໄຊສະຫງ່າ, ບົດຟ້ອນຈະລາຈອນເພື່ອປະຊາຊົນ, ກ້ຽວແຄນລຳສີພັນດອນ, ລະຄອນສັ້ນເພື່ອຄວາມສະຫງົບ, ຂັບຍວນລຳເພີນ, ບົດຟ້ອນພູມໃຈໃນໜ້າທີ່, ບົດຟ້ອນປະສານຮ້ອງຊົມເຊີຍກອງປະຊຸມໃຫ່ຍ. ເຊິ່ງລາຍການສະແດງແຕ່ລະລາຍການລ້ວນແຕ່ມີເນື້ອໃນຄວາມໝາຍສຳຄັນ ແລະ ເຕີບໃຫ່ຍຂະຫຍາຍຕົວຂອງແຕ່ລະເຫຼົ່າຮົບວິຊາສະເພາະຂອງກຳລັງປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ, ກໍ່ຄືການປົກປັກຮັກສາ ແລະ ສ້າງສາພັດທະນາປະເທດຊາດ, ພາຍໃຕ້ການຊີ້ນຳນຳພາອັນສະຫຼາດສ່ອງໃສຂອງພັກ 60 ປີແຫ່ງການເຕີບໃຫ່ຍຂະຫຍາຍຕົວຮອບດ້ານຂອງກຳລັງປ້ອງກັນຄວາມສະຫງົບ.

Off

Comments are closed.