10th Sep2020

ພັດທະນາກຳລັງ ປກສ ດ້ວຍການຂຸດຄົ້ນແຫຼ່ງລາຍຮັບເຂົ້າກົມກອງ

by somchan

ໃນສະພາບການໃໝ່ ການຂຸດຄົ້ນຊອກແຫຼ່ງລາຍຮັບ ເຂົ້າກົມກອງແມ່ນຄວາມຈຳເປັນອັນຮີບດ່ວນທີ່ຈະຕ້ອງສຸມໃສ່ປັບປຸງແກ້ໄຂ ເປັນຕົ້ນແມ່ນ ການຄຸ້ມຄອງຈັດເກັບລາຍຮັບ ຄ່າທໍານຽມ, ຄ່າບໍລິການ, ຄ່າປັບໃໝ່ ແລະ ລາຍຮັບອື່ນໆ ທີ່ເກີດຂຶ້ນ ໃນກຳລັງປ້ອງກັນຄວາມສະຫງົບ ໃຫ້ລວມສູນຜ່ານປະຕູດຽວ ຢູ່ພະລາທິການແຕ່ລະຂັ້ນພ້ອມທັງມີການຂຸດຄົ້ນທ່າແຮງບົ່ມຊ້ອນຂອງກໍາລັງປ້ອງກັນຄວາມສະຫງົບດຳເນີນການຜະລິດ-ທຸລະກິດ, ຕິດພັນກັບວຽກງານວິຊາສະເພາະໃຫ້ເປັນຂະບວນການກວ້າງຂວາງ, ແຂງແຮງ ແລະ ສ້າງຖານລາຍຮັບໃໝ່ ໃຫ້ເພີ່ມຂຶ້ນ ແຕ່ລະໄລຍະ ເພື່ອຮັບໃຊ້ໃນການພັດທະນາ ກຳລັງປ້ອງກັນຄວາມສະຫງົບໃນໄລຍະໃໝ່.

ພົຈວ ໜູດີ ມີໄຊຍະລາດ ເລຂາອົງຄະນະພັກ ຫົວໜ້າກົມໃຫຍ່ພະລາທິການ ກະຊວງ ປກສ ປະກອບຄໍາເຫັນໃນກອງປະຊຸມໃຫຍ່ ຜູ້ແທນ ຄັ້ງທີ V ຂອງອົງຄະນະພັກກະຊວງປ້ອງກັນຄວາມສະຫງົບທີ່ຈັດຂຶ້ນໃນວັນທີ 9-10 ກັນຍາ 2020 ນີ້ວ່າ: ຜ່ານການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງປ້ອງກັນຄວາມສະຫງົບ ທີ່ໄດ້ຮັບການຊີ້ນຳຈາກຂັ້ນເທິງ ເພື່ອຂຸດຄົ້ນຊອກແຫຼ່ງລາຍຮັບຈາກການຈັດເກັບລາຍຮັບ ຄ່າທຳນຽມ, ຄ່າບໍລິການ, ຄ່າປັບໃໝ່ ແລະ ລາຍຮັບອື່ນໆ ທີ່ເກີດຂຶ້ນໃນກໍາລັງປ້ອງກັນຄວາມສະຫງົບ; ໃນ 5 ປີ ຜ່ານມາ ຄ່າທໍານຽມ ໄດ້ຮັບອະນຸມັດ 44,26 ຕື້ກີບ, ປະຕິບັດໄດ້ 28,39 ຕື້ກີບ, ຖ້າທຽບໃສ່ 5 ປີກ່ອນ ເພີ່ມຂຶ້ນ 63,84 ຕື້ກີບ, ຄ່າບໍລິການໄດ້ຮັບອະນຸມັດ 132,55 ຕື້ກີບ, ປະຕິບັດໄດ້138,68 ຕື້ກີບ, ຖ້າທຽບໃສ່ 5 ປີກ່ອນ ເພີ່ມຂຶ້ນ 87,32 ຕື້ກີບ; ລາຍຮັບຈາກຫົວໜ່ວຍທຸລະກິດ ໃນ 5 ປີຜ່ານມາ ສາມາດສ້າງລາຍຮັບໄດ້ທັງໝົດ 202,9 ຕື້ ກີບ, ໃນນີ້ ມອບພັນທະໃຫ້ລັດຖະບານ 16,3 ຕື້ກີບ ແລະ ມອບພັນທະໃຫ້ກະຊວງ ປ້ອງກັນຄວາມສະຫງົບ 48 ຕື້ກີບ; ັດຈຸບັນ ມີຫົວໜ່ວຍທຸລະກິດທັງໝົດ 26 ຫົວໜ່ວຍ, ໃນ 5 ປີຜ່ານມາ ມີຫົວໜ່ວຍທຸລະກິດເພີ່ມຂຶ້ນ 16 ຫົວໜ່ວຍ; ລາຍຮັບຈາກການຜະລິດປູກຝັງ-ລ້ຽງສັດ ຂອງກົມກອງລວມໝູ່ໃນ 5 ປີຜ່ານມາ ບັນດາກົມກອງ ທ້ອງຖິ່ນ ໄດ້ເຮັດນາ ໃນເນື້ອທີ່ 26 ເຮັກຕາ, ຜົນຜະລິດ 41,36 ໂຕນ, ປູກໄມ້ອຸດສາຫະກຳ 154.968 ຕົ້ນ, ລ້ຽງສັດໃຫຍ່ 3.579 ໂຕ, ສັດປີກ 17.665 ໂຕ, ສັດນ້ຳ 1.000.000 ໂຕ ສ້າງລາຍຮັບທັງໝົດ 17 ຕື້ ກວ່າກີບ.

ທິດທາງແຜນການໃນຕໍ່ໜ້າ ແມ່ນຈະຕັ້ງໜ້າຜັນຂະຫຍາຍແນວທາງຂອງພັກຕາມທິດເພີ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ ສ້າງເປັນຄວາມຮັບຜິດຊອບໃນໜ້າທີ່ການເມືອງ ຂອງຄະນະພັກ-ຄະນະບັນຊາ ແຕ່ລະຂັ້ນ ຕໍ່ກັບການຂຸດຄົ້ນຊອກແຫຼ່ງລາຍຮັບ ບົນພື້ນຖານໃຫ້ສອດຄ່ອງກັບລະບຽບກົດໝາຍ ເພື່ອຮັບໃຊ້ການພັດທະນາກຳລັງປ້ອງກັນຄວາມສະຫງົບ ໃນສະພາບການໃໝ່; ສຸມໃສ່ຈັດຕັ້ງປະຕິບັດຄໍາສັ່ງ ສະບັບເລກທີ 418/ປກສ, ລົງວັນທີ 6 ກຸມພາ 2020 ວ່າດ້ວຍການຄຸ້ມຄອງ ແລະ ຈັດເກັບລາຍຮັບວິຊາການ ຜ່ານປະຕູດຽວຂອງກຳລັງປ້ອງກັນຄວາມສະຫງົບ ແລະ ຂຸດຄົ້ນຊອກແຫຼ່ງລາຍຮັບໃໝ່ຈາກການເກັບລາຍຮັບບໍລິຫານວິຊາການ ໃຫ້ລວມສູນຜ່ານປະຕູດຽວ ຢູ່ພະລາທິການແຕ່ລະຂັ້ນ; ສຸມໃສ່ຂຸດຄົ້ນແຫຼ່ງລາຍຮັບຈາກການຜະລິດ-ທຸລະກິດ ໂດຍນຳໃຊ້ເງື່ອນໄຂທ່າແຮງບົ່ມຊ້ອນດ້ານຕ່າງໆ ຕົວຈິງ ຂອງບັນດາກົມກອງລວມໝູ່ ອ້ອມຂ້າງກະຊວງກອງບັນຊາການ ປກສ ແຂວງ, ນະຄອນຫຼວງ ແລະ ປກສ ແຂວງ ເມືອງໃນຂອບເຂດທົ່ວປະເທດເພື່ອສ້າງເສດຖະກິດ, ປູກຝັງ, ລ້ຽງສັດ ຜະລິດເປັນສິນຄ້າ ຕາມຄວາມສາມາດ ທ່າແຮງບົ່ມຊ້ອນຂອງຕົນ, ຕາມເງື່ອນໄຂທີ່ເໝາະສົມ ແນ່ໃສ່ສ້າງລາຍຮັບໃຫ້ຫຼາຍ ເພື່ອພັດທະນາກໍາລັງປ້ອງກັນຄວາມສະຫງົບ ຂອງຕົນ; ປັບປຸງ ແລະ ສ້າງຕັ້ງກຸ່ມບໍລິສັດ ຫຼື ວິສາຫະກິດຂອງ ປກສ, ສ້າງຕັ້ງກອງທຶນຊຸກຍູ້ການຜະລິດ-ທຸລະກິດ ຂອງກໍາລັງປ້ອງກັນຄວາມສະຫງົບ ພ້ອມທັງສ້າງນິຕິກຳ ຄຸ້ມຄອງຊຸກຍູ້-ສົ່ງເສີມການຜະລິດ-ທຸລະກິດ ໃຫ້ເປັນລະບົບ-ຄົບຊຸດ ແລະ ຮັດກຸມ.

Off

Comments are closed.