05th Oct2020

ກອງປະຊຸມໃຫຍ່ຄັ້ງທີ VIII ຂອງຜູ້ແທນອົງຄະນະພັກແຂວງຫຼວງພະບາງ

by somchan

ກອງປະຊຸມໃຫຍ່ຄັ້ງທີ VIII ຂອງຜູ້ແທນອົງຄະນະພັກແຂວງຫຼວງພະບາງໄດ້ໄຂຂຶ້ນວັນທີ 2 ຕຸລາ ນີ້, ທີ່ສະໂມສອນໃຫຍ່ຫ້ອງວ່າການແຂວງ ໂດຍການເຂົ້າຮ່ວມຂອງສະຫາຍ ທອງລຸນ ສີສຸລິດ ກໍາມະການ ກົມການເມືອງສູນກາງພັກ ນາຍົກລັດຖະມົນຕີ ພ້ອມດ້ວຍຜູ້ແທນສົມບູນ ແລະ ແຂກຮັບເຊີນເຂົ້າ ຮ່ວມ.

ສະຫາຍ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາຄະນະບໍລິຫານງານພັກ ແຂວງ ເຈົ້າແຂວງຫຼວງພະບາງ ປະທານກອງປະຊຸມ ໄດ້ກ່າວເປີດກອງປະຊຸມ ພ້ອມທັງຜ່ານ ຮ່າງລາຍ ງານການເມືອງ ວ່າ: ກອງປະຊຸມໃຫຍ່ຄັ້ງນີ້, ດໍາເນີນພາຍໃຕ້ຄໍາຂວັນ: “ຍົກສູງຄວາມສາມາດນໍາພາ ແລະ ຄວາມເປັນແບບຢ່າງນໍາຫນ້າຕໍ່ສູ້ ຂອງອົງຄະນະພັກ, ຂຸດຄົ້ນ ແລະ ເສີມຂະຫຍາຍຄວາມອາດ ສາມາດບົ່ມຊ້ອນ ແລະ ກໍາລັງແຮງສັງລວມ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາ ຕາມແນວທາງປ່ຽນແປງໃຫມ່ຂອງພັກ, ເຮັດໃຫ້ແຂວງຫຼວງພະບາງ ນັບມື້ນັບຫນັກແຫນ້ນ, ພັດທະນາຕໍ່ ເນື່ອງ, ມີຄວາມຍືນຍົງ, ກ້າວສູ່ທັນສະໄຫມ ແລະ ຍຸຕິທໍາ”. ຕະຫຼອດໄລຍະ 5 ປີ ແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ, ມະຕິກອງ ປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ, ພາຍໃຕ້ການນໍາພາ-ຊີ້ນໍາ ຂອງຄະນະບໍລິຫານງານ ພັກແຂວງ ແລະ ຄະນະພັກທຸກຂັ້ນ, ເຮັດໃຫ້ທົ່ວແຂວງ ຫຼວງພະບາງ ມີສະຖຽນລະພາບທາງດ້ານການເມືອງອັນຫນັກແຫນ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ປະກົດການຫຍໍ້ທໍ້ໃນສັງຄົມຫຼຸດລົງເປັນກ້າວໆ, ຄະນະພັກ ໄດ້ຢຶດຫມັ້ນ ແລະ ໄດ້ເອົາໃຈໃສ່ສຶກສາ ອົບຮົມປະຊາຊົນບັນດາເຜົ່າ ໃຫ້ເຊື່ອມຊຶມ ແລະ ເປັນເຈົ້າການເຂົ້າຮ່ວມປະຕິບັດແນວທາງ ປ້ອງກັນຊາດປ້ອງກັນຄວາມສະຫງົບ ທົ່ວປວງຊົນຮອບດ້ານ ແລະ ສອດຫ້ອຍເຂົ້າທຸກຂົງເຂດວຽກງານຕິດພັນກັບການກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ, ສ້າງພື້ນຖານໃຫ້ ເສດຖະກິດຂອງແຂວງ ສືບຕໍ່ຂະຫຍາຍຕົວຢ່າງຕໍ່ເນື່ອງ ຕາມທິດທີ່ກໍານົດໄວ້, ຊີວິດການເປັນຢູ່ຂອງການປູກຝັງ-ລ້ຽງສັດຕາມທ່າແຮງ ແລະ ມູນເຊື້ອ ຂອງແຕ່ລະຄອບຄົວ, ດ້ວຍການນໍາໃຊ້ເຕັກນິກວິຊາການໃຫມ່, ເປັນຕົ້ນ ການລ້ຽງສັດແບບເປັນລັອກ, ເປັນຟາມ, ຕິດພັນກັບການປູກ ຫຍ້າລ້ຽງສັດ, ການປູກຜັກປອດສານພິດ, ການປູກພືດ, ຕົ້ນໄມ້ອຸດສາຫະກໍາ ແລະ ຕົ້ນໄມ້ໃຫ້ຫມາກ ປະເພດຕ່າງໆ, ເຮັດໃຫ້ຜະລິດຕະພັນສິນຄ້າກະສິກໍາເພີ່ມຂຶ້ນ ສາມາດຕອບສະໜອງໃຫ້ກັບການບໍລິໂພກພາຍໃນ ແລະ ສົ່ງອອກຫຼາຍຂຶ້ນ, ພື້ນຖານໂຄງລ່າງ ແຕ່ລະດ້ານ ໄດ້ຮັບການປັບປຸງ ແລະ ສ້າງຂຶ້ນໃຫມ່ຈໍານວນຫນຶ່ງ,ວຽກງານແຕ່ລະຂົງເຂດມີຜົນສຳເລັດ ເຮັດໃຫ້ລວມຍອດພະລິດຕະພັນພາຍໃນ (GDP) ບັນລຸໄດ້ 35.042 ຕື້ກີບ, ສະເລ່ຍ 7.008 ຕື້ກີບຕໍ່ປີ ອັດຕາການຂະຫຍາຍຕົວຂອງ ເສດຖະກິດ ເພີ່ມຂຶ້ນສະເລ່ຍ 7,3% ຕໍ່ປີ, ສະເລ່ຍລາຍຮັບເພີ່ມຂຶ້ນ ຈາກ 13.900.000 ກີບ ຫຼື 1.746 ໂດລາ ຕໍ່ຄົນຕໍ່ປີ ໃນປີ 2010 ມາເປັນ 16.800.000 ສ່ອງກີບ ຫຼື 2.110 ໂດລາ ຕໍ່ຄົນຕໍ່ປີ ໃນປີ 2020, ທຽບໃສ່ແຜນການປະຕິບັດໄດ້ 90,87%. ຄະນະພັກແຕ່ລະຂັ້ນ ໄດ້ເປັນເຈົ້າການສຶກສາ ອົບຮົມ ການເມືອງ-ແນວຄິດ ດ້ວຍຫຼາຍຮູບການທີ່ສອດຄ່ອງ ຢ່າງເປັນປົກກະຕິ ອັນໄດ້ເຮັດໃຫ້ສະຕິ ການເມືອງ ຂອງສະມາຊິກພັກ, ພະນັກງານ ແລະ ປະຊາຊົນ ສູງຂຶ້ນ; ມີຈໍານວນຫນ່ວຍພັກເພີ່ມຂຶ້ນ 92 ຫນ່ວຍ, ສະມາຊິກພັກເພີ່ມຂຶ້ນ 3,592 ສະຫາຍ, ຕີລາຄາປະເພດສະມາຊິກພັກ ໄດ້ປະເພດແຂງ ກວມ 76,90%, ຫນ່ວຍພັກປອດໃສ, ເຂັ້ມແຂງ, ຫນັກແຫນ້ນກວມ 82,70%. ຈາກນັ້ນ, ຜູ້ເຂົ້າຮ່ວມກອງ ປະຊຸມໄດ້ຮັບຟັງການຜ່ານຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ແຕ່ປີ 2021-2025 ຂອງແຂວງຫຼວງພະບາງ, ຮັບຟັງການປະກອບຄໍາເຫັນ ຂອງຂະແຫນງການ-ກົມກອງ ແລະ ບັນດາຕົວແບບແຕ່ລະດ້ານ, ພ້ອມທັງດໍາເນີນການປ່ອນບັດເລືອກຕັ້ງ ເອົາຄະນະບໍລິຫານງານພັກແຂວງຊຸດໃຫມ່ ແລະ  ໃນຕອນທ້າຍກອງປະຊຸມໄດ້ຮັບຟັງການຊີ້ນໍາຈາກ ສະຫາຍ ທອງລຸນ ສີສຸລິດ ກໍາມະການກົມການເມືອງສູນກາງພັກ ນາຍົກລັດຖະ ມົນຕີ ຕື່ມອີກ

 

Off

Comments are closed.