12th Oct2020

ກອງປະຊຸມສະຫຼຸບວຽກງານກວດກາ ປະຈໍາປີ 2020 ຂອງສະຫະພັນແມ່ຍິງ ກົມໃຫຍ່ການເມືອງ ກະຊວງ ປກສ

by somchan

ກອງປະຊຸມສະຫຼຸບວຽກງານກວດກາ ປະຈໍາປີ 2020 ຂອງສະຫະພັນແມ່ຍິງ ກົມໃຫຍ່ ການເມືອງ ກະຊວງ ປກສ ໄດ້ຈັດຂື້ນໃນວັນທີ 8 ຕຸລາ 2020 ໂດຍການເປັນປະທານຂອງ ພ້ອ ນາງ ຈັນເດືອນ ເທພະວົງ ປະທານສະຫະພັນແມ່ຍິງ ກົມໃຫຍ່ການເມືອງ ປກສ ເຂົ້າຮ່ວມຂອງ ພັທ ນ ຈັນທະຫນອມ ວົງຊົມພູ ຮອງປະທານກວດກາ, ຮອງປະບານສະຫະພັນແມ່ຍິງກະຊວງ ປກສ ມີບັນດາປະທານຫນ່ວຍແມ່ຍິງອ້ອມຂ້າງກົມໃຫຍ່ການເມືອງເຂົ້າຮ່ວມ.

ກອງປະຊຸມໄດ້ຮັບຟັງສະຫຼຸບລາຍງານການເຄື່ອນໄຫວວຽກງານ ໃນໄລຍະ 1 ປີຜ່ານມາ ຄະນະສະຫະພັນແມ່ຍິງກົມໃຫຍ່ການເມືອງ ໄດ້ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ, ມະຕິຄໍາສັ່ງ, ລະບຽບ, ກົດຫມາຍ, ມະຕິກອງປະຊຸມໃຫຍ່ຄັ້ງທີ 7 ຂອງສະຫະພັນແມ່ຍິງກະຊວງ ແລະ ຄັ້ງທີ 8 ຂອງສະຫະພັນແມ່ຍິງກົມໃຫຍ່ການເມືອງ ປກສ, ນໍາພາຈັດຕັ້ງປະຕິບັດຂໍ້ແຂ່ງຂັນ 3 ດີ ຕິດພັນກັບການສ້າງຫນ່ວຍພັກປອດໃສ ເຂັ້ມແຂງ ຫນັກແຫນ້ນ ສາມາດຈັດຕັ້ງປະຕິບັດໄດ້ເປັນ ຢ່າງດີ ສະແດງອອກໃນການຄັດເລືອກແບ່ງປະເພດ 3 ດີ ປະຈໍາປີ 2020 ທາງດ້ານພົນລະເມືອງດີ ໄດ້ 486 ສະຫາຍ, ພັດທະນາດີ 477 ສະຫາຍ, ສ້າງຄອບຄົວດີ 475 ສະຫາຍ, ແມ່ຍິງ 3 ດີ ປະເພດ 1-460 ສະຫາຍ, ປະເພດ 2 ມີ 28 ສະຫາຍ, ຫນ່ວຍ 3 ດີປະເພດ 1 ມີ 15 ຫນ່ວຍ ເທົ່າ ກັບຮ້ອຍສ່ວນຮ້ອຍ, ບູກຄົນຕົວແບບດ້ານຕ່າງໆ 5 ສະຫາຍ, ຕໍ່ກັບຫມາກຜົນດັ່ງກ່າວ ກໍ່ຍ້ອນ ຄະນະນໍາແຕ່ລະຂັ້ນໄດ້ເອົາໃຈໃສ່ ໃນການລົງໃກ້ຊິດຕິດແທດໂດຍກົງ, ອໍານວຍຄວາມສະດວກທຸກ ດ້ານໃນການລົງເຄື່ອນໄຫວວຽກງານ ແລະ ໃຫ້ການສະຫນັບສະຫນູນຈາກພາກສ່ວນທີ່ກ່ຽວຂ້ອງໄດ້ ເປັນຢ່າງດີ. ຈາກນັ້ນ, ບັນດາຫນ່ວຍແມ່ຍິງອ້ອມຂ້າງກົມໃຫຍ່ ກໍ່ໄດ້ຜັດປ່ຽນກັນຂື້ນ ປະກອບຄໍາຄິດ-ຄໍາເຫັນ ພ້ອມທັງສະເຫນີບາງຂໍ້ຄົງຄ້າງທີ່ຈະຕ້ອງໄດ້ສືບຕໍ່ແກ້ໄຂໃນຕໍ່ຫນ້າ ເພື່ອໃຫ້ການຈັດຕັ້ງປະຕິບັດວຽກງານມີຜົນສຳເລັດ.

 

Off

Comments are closed.