21st Oct2020

ກົມໃຫ່ຍການເມືອງ ປກສ ເຜີຍແຜ່ຜົນສຳເລັດກອງປະຊຸມໃຫ່ຍຜູ້ແທນຄັ້ງທີ 5 ຂອງອົງຄະນະພັກກະຊວງ ປກສ

by somchan

ກົມໃຫ່ຍການເມືອງປ້ອງກັນຄວາມສະຫງົບ ຈັດຕັ້ງເຊື່ອມຊຶມຜົນສຳເລັດກອງປະຊຸມໃຫ່ຍຜູ້ແທນຄັ້ງທີ 5 ຂອງອົງຄະນະພັກກະຊວງປ້ອງກັນຄວາມສະຫງົບ ໃນວັນທີ 10 ຕຸລາ ນີ້ ທີ່ສະໂມສອນກະຊວງປ້ອງກັນຄວາມສະຫງົບ ພາຍໃຕ້ການເປັນປະທານຂອງ ພົຈວ ປອ ສຸວັນນີ ສີສຸພາບມີໄຊ ຄະນະພັກກະຊວງ, ຮອງເລຂາຄະນະພັກກົມໃຫ່ຍ ຮອງຫົວໜ້າກົມໃຫ່ຍການເມືອງປ້ອງກັນຄວາມສະຫງົບ, ມີຄະນະພັກຄະນະນຳກົມໃຫ່ຍການເມືອງ ພ້ອມດ້ວຍພະນັກງານຫຼັກແຫຼ່ງອ້ອມຂ້າງ ກົມໃຫ່ຍການເມືອງປ້ອງກັນຄວາມສະຫງົບເຂົ້າຮ່ວມ.

ເອກະສານທີ່ນຳມາເຜີຍແຜ່ເຊື່ອມຊຶມໃນຄັ້ງນີ້ ມີບົດໂອ້ລົມຂອງສະຫາຍ ບຸນຍັງ ວໍລະຈິດ ເລຂາທິການໃຫ່ຍ ຄະນະບໍລິຫານງານສູນກາງພັກ ປະຊາຊົນປະຕິວັດລາວ ປະທານປະເທດ, ມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການຮັບຮອງເອົາຄະນະບໍລິຫານງານພັກກະຊວງປ້ອງກັນຄວາມສະຫງົບ, ເອກະສານຜົນສຳເລັດກອງປະຊຸມໃຫ່ຍຜູ້ແທນຄັ້ງທີ 5 ຂອງອົງຄະນະພັກກະຊວງປ້ອງກັນຄວາມສະຫງົບ, ມະຕິກອງປະຊຸມຄົບຄະນະບໍລິຫານງານພັກ ກະຊວງປ້ອງກັນຄວາມສະຫງົບຄັ້ງທີ 1 ສະໄໝທີ 5, ຂໍ້ກຳນົດວ່າດ້ວຍທີ່ຕັ້ງ, ພາລະບົດບາດ, ໜ້າທີ່, ຂອບເຂດສິດ ແລະ ແບບແຜນວິທີເຮັດວຽກຂອງຄະນະບໍລະຫານງານພັກ ກະຊວງປ້ອງກັນຄວາມສະຫງົບ, ທັງນີ້ກໍ່ເພື່ອເຮັດໃຫ້ຄະນະພັກ, ຄະນະບັນຊາ, ສະມາຊິກພັກ, ນາຍ ແລະ ພົນຕຳຫຼວດໄດ້ຮັບຮູ້, ເຂົ້າໃຈ ແລະ ນຳໄປຈັດຕັ້ງປະຕິບັດຜັນຂະຫຍາຍເນື້ອໃນມະຕິກອງປະຊຸມໃຫ່ຍຜູ້ແທນຄັ້ງທີ 5 ຂອງອົງຄະນະພັກກະຊວງປ້ອງກັນຄວາມສະຫງົບຢ່າງຖືກຕ້ອງ ແລະ ນຳໄປຈັດຕັ້ງເຂົ້າໃນວຽກງານ ຂອງແຕ່ລະກົມກອງໃນຂອບເຂດທົ່ວປະເທດໃຫ້ໄດ້ຮັບໜາກຜົນສູງສຸດໃນສະເພາະໜ້າ ແລະ ຍາວນານ.

ພ້ອມດຽວກັນນີ້ຍັງໄດ້ປະກາດເລື່ອນຊັ້ນໃຫ້ນາຍ ແລະ ພົນຕຳຫຼວດຜູ້ມີຜົນງານ ແລະ ຄົບມາດຖານເງື່ອນໄຂໃນການເລື່ອນຊັ້ນຈຳນວນ 9 ຄົນ ໃນນີ້ເລື່ອນຊັ້ນຂັ້ນນາຍຮ້ອຍ 5 ຄົນ ແລະ ຂັ້ນນາຍສິບ 4 ຄົນ ໃຫ້ກຽດປະດັບຊັ້ນໂດຍ ພົຈວ ປອ ສຸວັນນີ ສີສຸພາບມີໄຊ ຄະນະພັກກະຊວງ, ຮອງເລຂາຄະນະພັກກົມໃຫ່ຍ, ຮອງຫົວໜ້າກົມໃຫ່ຍການເມືອງປ້ອງກັນຄວາມສະຫງົບ.

Off

Comments are closed.