27th Jun2013

ເນື່ອງໃນໂອກາດວັນສາກົນຕ້ານຢາເສບຕິດຄົບຮອບ 26 ປີ (26/06/1987-26/06/2013)

by somchan

ຄະນະກໍາມະການແຫ່ງຊາດເພື່ອກວດກາແລະຄວບຄຸມ ຢາເສບຕິດໄດ້ຈັດພິທີຈູດທຳລາຍຢາເສບຕິດຂື້ນໃນຕອນເຊົ້າ ຂອງວັນທີ 26/06/2013 ຢູ່ທີ່ເດີ່ນພະທາດຫຼວງພາຍໃຕ້ ການເປັນປະທານຂອງພະນະ ທ່ານ ທອງສິງ ທຳມະວົງ,ນາຍົກລັດຖະມົນຕີແຫ່ງ ສປປ ລາວທັງເປັນປະທານ ຄະນະຊີ້ນຳຂະບວນການຕໍ່ຕ້ານ  ຢາເສບຕິດຂັ້ນສູນກາງ, ມີການນຳຂັ້ນສູງ ແລະ ບັນດາທູດຕານຸທູດ, ອົງການຈັດ ຕັ້ງສາກົນປະຈຳລາວ, ພະນັກງານທີ່ກ່ຽວຂ້ອງເຂົ້າຮ່ວມ.

ການນຳເຂົ້າຮ່ວມພິທີຈູດຢາເສບຕິດ

ໃນພິທີອັນມີຄວາມໝາຍສຳຄັນ ທ່ານ ກຸ ຈັນສີນາ ຮັກສາການປະທານ ຄະນະກຳມະການແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ ໄດ້ຂື້ນກ່າວລາຍງານສະພາບການປະຕິບັດວຽກງານ ກວດກາ ແລະ ຄວບຄຸມຢາເສບຕິດ ຢູ່ ສປປ ລາວ ໃນໄລຍະ 1 ປີຜ່ານມາ ໂດຍສະເພາະແມ່ນສະພາບການລັກລອບປູກຝີ່ນຄືນໃໝ່, ການລັກລອບຄ້າຂາຍຢາເສບຕິດ, ບັນດາສານອອກລິດຕໍ່ຈິດ ແລະ ປະສາດ , ສານເຄມີຕົ້ນທີ່ແອບແຝງມາໃນຮູບແບບຂອງຢາແກ້ຫວັດ ແລະ ຢາເສບຕິດປະເພດອື່ນໆ. ໃນໄລຍະຜ່ານມາທາງຄະນະກຳມະການແຫ່ງຊາດເພື່ອກວດກາ ແລະ ຄວບຄຸມຢາເສບຕິດ ສົບທົບກັບພາກສ່ວນກ່ຽວຂ້ອງໄດ້ເອົາໃຈໃສ່ໃນການກວດກາ ແລະ ຄວບຄຸມການຊົມໃຊ້ຢາເສບຕິດທີ່ຜິດກົດໝາຍ, ການປີ່ນປົວ-ບຳບັດ ແລະ ຟື້ນຟູສຸຂະພາບໃຫ້ແກ່ຜູ້ຕິດຢາເສບຕິດ, ການໂຄສະນາເຜີຍແຜ່, ສ້າງຈິດສຳນຶກໃຫ້ແກ່ມວນຊົນໃຫ້ເຫັນໄດ້ເຖິງຜົນຮ້າຍຂອງຢາເສບຕິດ ໂດຍເນັ້ນໃສ່ການສ້າງຊຸມຊົນປອດຢາເສບຕິດ, ການສ້າງບ້ານປອດຢາເສບຕິດ ເພື່ອປະກອບສ່ວນແກ້ໄຂປະກົດການຫຍໍ້ທໍ້ທາງສັງຄົມ. ບັນຫາສຳຄັນອີກອັນໜື່ງກໍ່ແມ່ນການປະຕິບັດມາດຕະການກົດໝາຍ, ການຮ່ວມມືກັບບັນດາປະເທດໃກ້ຄຽງ ແລະ ການປະຕິບັດສົນທິສັນຍາສາກົນເພື່ອຮ່ວມມືກັນໃນການຕ້ານ ແລະ ສະກັດກັ້ນ ໂດຍນຳໃຊ້ມາດຕະການອັນເຄັ່ງຄັດຕໍ່ຜູ້ດື້ດ້ານກະທຳຜິດທີ່ລັກລອບຂົນສົ່ງ ຄ້າຂາຍ ຢາເສບຕິດ. ບັນຫາສຳຄັນຕົ້ນຕໍໃນການສະກັດກັ້ນ ແລະ ຕ້ານຢາເສບຕິດ ກໍ່ແມ່ນການມີສ່ວນຮ່ວມຂອງທຸກຄົນໃນທົ່ວສັງຄົມ ເຊີ່ງຈະເປັນກຳລັງແຮງອັນມະຫາສານໃນການປ້ອງກັນບໍ່ໃຫ້ລູກຫຼານຫຼົງຜິດ ແລະ ຕົກເປັນທາດຂອງຢາເສບຕິດ. ພ້ອມນັ້ນ ທ່ານໄດ້ເນັ້ນໃສ່ທິດທາງສະເພາະໜ້າກໍ່ຄືສືບຕໍ່ການຈັດຕັ້ງປະຕິບັດ ແລະ ຜັນຂະຫຍາຍແຜນແມ່ບົດແຫ່ງຊາດວ່າດ້ວຍການຄວບຄຸມຢາເສບຕິດແຕ່ປີ 2009-2013 ເຊີ່ງເປັນປີມ້ວນທ້າຍຂອງການຈັດຕັ້ງປະຕິບັດ ແລະ ກຳລັງກະກຽມປະເມີນຜົນການຈັດຕັ້ງປະຕິບັດແຜນແມ່ບົດດັ່ງກ່າວ. ໃນເວລາດຽວກັນ, ກໍ່ກະກຽມສ້າງແຜນຍຸດທະສາດແຫ່ງຊາດເພື່ອຄວບຄຸມຢາເສບຕິດ ( 2014-2020 ) ສະບັບໃໝ່ ເພື່ອເປັນທິດທາງໃນການສະກັດກັ້ນ ແລະ ຕ້ານບັນຫາຢາເສບຕິດ ໃນສະເພາະໜ້າ ແລະ ຍາວນານ. ສີ່ງດັ່ງກ່າວທັງໝົດນັ້ນຈະປະກອບສ່ວນໃນການທີ່ຈະເຮັດໃຫ້ອາຊຽນ ເປັນເຂດປອດຢາເສບຕິດ ຕາມເຈດຕະນາລົມ ທີ່ບັນ ດາຜູ້ນຳອາຊຽນໄດ້ມີຮ່ວມກັນ.

ໃນໂອກາດນີ້, ພະນະທ່ານ ທອງສິງ ທຳມະວົງ, ນາຍົກລັດຖະມົນຕີ, ປະທານຄະນະຊີ້ນຳຂະບວນການຕ້ານຢາເສບຕິດຂັ້ນສູນກາງ ນຳພາບັນດາການນຳພັກ-ລັດ, ຄະນະທູດຕານຸທູດ, ຜູ້ຕາງໜ້າອົງການຈັດຕັ້ງສາກົນປະຈຳລາວ ພ້ອມດ້ວຍພະນັກງານຂັ້ນສູງອ້ອມຂ້າງສູນກາງ ແລະ ມວນຊົນຊາວນະຄອນຫຼວງ ຈູດທຳລາຍຢາເສບຕິດ ໃນໂອກາດວັນສາກົນຕ້ານການຊົມໃຊ້ ແລະ ການລັກລອບຄ້າຂາຍຢາເສບຕິດປີ 2013.

ໃນການຈູດທຳລາຍຢາເສບຕິດໃນຄັ້ງນີ້ ມີຂອງກາງຄະດີຢາເສບຕິດເຊີ່ງເຈົ້າໜ້າທີ່ຕຳຫຼວດຍຶດໄດ້ຈາກພວກລັກລອບຄ້າຂາຍຢາເສບຕິດ ທີ່ສານນະຄອນ ຫຼວງວຽງຈັນ ແລະ ແຂວງໃກ້ຄຽງໄດ້ຕັດສິນແລ້ວ ແລະ ສັ່ງໃຫ້ຈູດທຳລາຍຖີ້ມປະກອບມີ: ຢາບ້າ 5.224.505 ເມັດ ຫຼື ປະມານ 522 ກິໂລກຣາມ, ກັນຊາແຫ້ງ 2.209.5 ກິໂລກຣາມ ( ສອງພັນສອງຮ້ອຍເກົ້າກິໂລ ກັບ ຫ້າກຣາມ ), ຢາໄອສ໌ 307.7 ກຣາມ ( ສາມຮ້ອຍເຈັດຈຸດເຈັດກຣາມ ), ເຮໂລອິນ 49 ແທ່ງ ນ້ຳໜັກ 18 ກິໂລກຣາມ ( ສິບແປດກິໂລກຣາມ ), ເຮໂລອິນປອມ 9 ແທ່ງ ເທົ່າກັບ 3 ກິໂລກຣາມ ( ສາມກິໂລກຣາມ ). ສ່ວນຢາເສບຕິດທີ່ຖືກຈັບໄດ້ຢູ່ແຂວງທີ່ຖືກສານຕັດສິນ ແລະ ສັ່ງໃຫ້ທຳລາຍຖີ້ມນັ້ນ,ຄະນະກຳມະການຄວບຄຸມຢາເສບຕິດໄດ້ແນະນໍາໃຫ້ຄະນະກຳມະການຄວບຄຸມຢາເສບຕິດແຂວງ ທຳລາຍຖີ້ມໃນໂອກາດດັ່ງກ່າວຢູ່ພາຍໃນແຂວງ.

ຮູບຈູດຢາບ້າ

Off

Comments are closed.