05th Nov2020

ເຈົ້າເມືອງໄຊທານີ ນຳພາພະນັກງານລົງກໍ່ສ້າງຮາກຖານເຮັດວຽກງານຮັກສາອະນາໄມ ແລະ ກຳຈັດຂີ້ເຫຍື້ອ

by somchan

ວັນທີ 5 ພະຈິກ 2020ນີ້ ທ່ານ ຄຳປະດິດ ເຂັມມານິດ ເຈົ້າເມືອງໄຊທານີ ພ້ອມດ້ວຍຄະນະໄດ້ລົງຊຸກຍູ້ຊີ້ນຳ-ນຳພາ ພະນັກງານລົງກໍ່ສ້າງຮາກຖານເຮັດວຽກງານຮັກສາອະນາໄມ ແລະ ກຳຈັດຂີ້ເຫຍື້ອ ຢູ່ບ້ານທ່າສະຫວ່າງ ເມືອງໄຊທານີ ນະຄອນຫຼວງວຽງຈັນ ຊຶ່ງນອນຢູ່ໃນ 60 ບ້ານເປົ້າໝາຍຂອງເມືອງໄຊທານີ ໂດຍມີອຳນາດການປົກຄອງບ້ານ ປກສ ບ້ານ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ໂອກາດນີ້ທ່ານ ນາງ ວາດສະໜາ ອິນສີຊຽງໃໝ່ ຮອງຫົວໜ້າຂະແໜງຄຸ້ມຄອງຮ່ອງລະບາຍນ້ຳ, ຄຸ້ມຄອງບໍລິຫານຕົວເມືອງວຽຈັນ ໄດ້ຜ່ານຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ  ວ່າດ້ວຍການຮັບຮອງ 300 ບ້ານ ເຂົ້າເປັນເປົ້າໝາຍບ້ານອະນາໄມ ແລະ ກຳຈັດຂີ້ເຫຍື້ອ ຂອງນະຄອນຫຼວງວຽງຈັນ  ແລະ ຂໍ້ຕົກລົງຂອງເຈົ້າເມືອງໄຊທານີ ວ່າດ້ວຍການແຕ່ງຕັ້ງຄະນະຊີ້ນຳ-ນຳພາພະນັກງານລົງກໍ່ສ້າງຮາກຖານໃນຈຳນວນ 60 ບ້ານເປົ້າໝາຍ ບ້ານອະນາໄມ ແລະ ກຳຈັດຂີ້ເຫຍື້ອ ຢູ່ເມືອງໄຊທານີ  ໂດຍຈັດຕັ້ງປະຕິບັດຕາມກຳນົດບ້ານອະນາໄມ ແລະ ກຳຈັດຂີ້ເຫຍື້ອຂອງນະຄອນຫຼວງວຽງຈັນ ປະກອບມີ ຕົວຊີ້ວັດຂອງຄວາມສະອາດຄືເສັ້ນທາງເຄຫາສະຖານສະອາດ, ພາຫະນະຂົນສົ່ງສະອາດ, ສາທາລະນະປະໂຫຍດສະອາດ, ໂຮງຈັກໂຮງງານ, ການບໍລິໂພກສະອາດ, ທ້ອງຟ້າສະອາດ ແລະ ແຜນວຽກ, ມາດຕະການຈັດຕັ້ງປະຕິບັດໂຄງການວຽງຈັນສະອາດຕາມທີ່ໄດ້ກຳນົດໄວ້ໃນມະຕິຕົກລົງຂອງອົງການປົກຄອງນະຄອນຫຼວງວຽງັຈນ ສະບັບເລກທີ 03 ລົງວັນທີ 25 ກັນຍາ 2015.

ພ້ອມນີ້ທ່ານເຈົ້າເມືອງໄຊທານີ ຍັງໄດ້ຮຽກຮ້ອງໃຫ້ພະນັກງານລົງກໍ່ສ້າງຮາກຖານ, ອຳນາດການປົກຄອງບ້ານ ແລະ ປະຊາຊົນ ພາຍບ້ານທ່າສະຫວ່າງ ຈົ່ງພ້ອມກັນສຸມສະຕິປັນຍາເຫື່ອແຮງ ຄວາມຮູ້ຄວາມສາມາດຂອງຕົນເຂົ້າໃນການຈັດຕັ້ງປະຕິບັດໜ້າທີ່ອັນມີກຽດທີ່ພັກ-ລັດ ແລະ ການຈັດຕັ້ງຂັ້ນເທີງມອບໝາຍໃຫ້ໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄືນະຄອນຫຼວງວຽງຈັນ, ເມືອງ,ບ້ານໃຫ້ມີຄວາມສວຍງາມ ແລະ ຮຸ່ງເຮືອງສີວິໄລ.

Off

Comments are closed.