19th Nov2020

ກອງປະຊຸມໃຫຍ່ຜູ້ແທນຄັ້ງທີ V ຂອງອົງຄະນະພັກກະຊວງປ້ອງກັນປະເທດ ອັດລົງດ້ວຍຜົນສໍາເລັດອັນຈົບງາມ

by somchan

ກອງປະຊຸມໃຫຍ່ຜູ້ແທນຄັ້ງທີ V ຂອງອົງຄະນະພັກກະຊວງປ້ອງກັນປະເທດ ພາຍໃຕ້ຄໍາຂວັນ: ຮັບປະກັນໃຫ້ປະເທດຊາດ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ປອດ ໄພ. ຕັ້ງຫນ້າປັບປຸງ, ກໍ່ສ້າງກອງທັບປະຊາຊົນລາວ ທັງ 3 ປະ ເພດກໍາລັງ ໃຫ້ມີຄວາມຫນັກແຫນ້ນ ເຂັ້ມແຂງ, ຈົ່ງຮັກພັກດີຕໍ່ພັກ, ຕໍ່ລະບອບໃຫມ່, ຕໍ່ປະເທດຊາດ ແລະ ປະຊາຊົນ

 

ໄດ້ອັດລົງດ້ວຍຜົນສໍາເລັດຢ່າງສະຫງ່າງາມ ໃນວັນທີ 19 ພະຈິກ 2020 ນີ້, ພາຍຫຼັງທີ່ໄດ້ດໍາເນີນມາເປັນເວລາ 2 ວັນ ໂດຍພາຍໃຕ້ການເປັນປະທານຂອງສະຫາຍ ພົນເອກ ຈັນສະຫມອນ ຈັນຍາລາດ ກໍາມະການກົມການເມືອງສູນກາງພັກເລຂາຄະນະພັກກະຊວງ, ລັດຖະມົນຕີກະຊວງປ້ອງກັນປະເທດ, ໂດຍໃຫ້ກຽດເຂົ້າຮ່ວມ ຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ. ມີບັນດາສະຫາຍຄະນະເລຂາທິການສູນກາງພັກ, ກໍາມະການ, ຄະນະຈັດຕັ້ງ  ແລະ ຄະນະກວດກາສູນກາງພັກ, ບັນດາສະຫາຍຄະນະພັກກະຊວງ, ຄະນະພັກນະຄອນຫຼວງ, ກະຊວງປ້ອງກັນຄວາມສະຫງົບ, ສະຫະພັນນັກຮົບເກົ່າ, ພະນັກງານປະຕິວັດອາວຸໂສ, ວີລະຊົນແຫ່ງຊາດ, ນັກຮົບ ແຂ່ງຂັນ, ພ້ອມດ້ວຍຜູ້ແທນກອງປະຊຸມເຂົ້າຮ່ວມທັງຫມົດ 253 ສະຫາຍ, ຍິງ 2 ສະຫາຍ.

 

 

ຕະຫຼອດໄລຍະດໍາເນີນກອງປະຊຸມ, ບັນດາສະຫາຍຜູ້ແທນໄດ້ຍົກສູງຄວາມຮັບຜິດຊອບການເມືອງ ຂອງຕົນເຂົ້າໃນການຄົ້ນຄວ້າປະກອບຄໍາເຫັນຕໍ່ບົດລາຍງານການເມືອງຂອງຄະນະພັກກະຊວງປ້ອງກັນປະເທດ ໂດຍສະເພາະ ແມ່ນສະຫຼຸບຕີລາຄາການນໍາພາຈັດຕັ້ງປະຕິບັດຫນ້າທີ່ປ້ອງກັນຊາດກໍຄືການປັບປຸງ ກໍ່ສ້າງກໍາລັງກອງທັບໃນຊຸມປີຜ່ານມາ ພ້ອມທັງຮັບຮອງເອົາທິດທາງແຜນການວຽກງານຈຸດສຸມໃນ 5 ປີຕໍ່ ຫນ້າ (2021-2025), ທັງນີ້ກໍເພື່ອເຮັດໃຫ້ການຈັດຕັ້ງປະຕິບັດຫນ້າທີ່ປ້ອງກັນຊາດ ແລະ ການປັບປຸງກໍ່ສ້າງພັກ-ກໍ່ສ້າງກໍາລັງປະກອບອາວຸດປ້ອງກັນຊາດໃຫ້ມີຄວາມຫນັກແຫນ້ນ ເຂັ້ມແຂງ ຕາມແນວທາງ  ປ່ຽນແປງໃຫມ່ທີ່ມີຫຼັກການຂອງພັກ ຮັບປະກັນໃຫ້ແກ່ກໍາລັງປະກອບອາວຸດຍາມໃດກໍມີຄວາມຈົງຮັກພັກດີຕໍ່ ພັກ, ຕໍ່ປະເທດຊາດ ແລະ ຕໍ່ປະຊາຊົນ.

ກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະບໍລິຫານງານພັກ  ກະຊວງປ້ອງກັນປະເທດຈໍານວນ 33 ສະຫາຍ ແລະ ປ່ອນບັດເລືອກເອົາຜູ້ແທນສົມບູນ 51 ສະຫາຍ, ສໍາຮອງ 4 ສະຫາຍ ໄປຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ.

ກອງປະຊຸມ ຄັ້ງນີ້ປະຖົມມະລືກ ໄດ້ເປັນ ເອກະພາບເລືອກຕັ້ງເອົາ ຄະນະປະຈໍາຄະນະພັກກະຊວງປ້ອງກັນປະເທດ ຈໍານວນ 11 ສະຫາຍ ແລະ ໄດ້ເປັນເອກະສັນປະຊາມະຕິເລືອກເອົາ ສະຫາຍ ພົນເອກ ຈັນສະຫມອນ ຈັນຍາລາດ ເປັນເລຂາຄະນະພັກ, ສະຫາຍ ພົນໂທ ທອງລອຍ ສີລິວົງ ສະຫາຍ ແລະ ພົນໂທ ສຸວອນ ເລືອງບຸນມີ ເປັນຮອງເລຂາ ຄະນະພັກ, ສະຫາຍ ພົນຕີ ສອນທອງ ພົມລາວົງ ເປັນປະທານກວດກາພັກ, ສະຫາຍ ພັນເອກ ຈັນດີ ສີລິວົງສັກ ແລະ ສະຫາຍ ພັນເອກ ທອງດໍາ ພົງສະຫວັດ ເປັນຮອງປະທານກວດກາພັກ

.

 

ໃນພິທີອັນມີຄວາມຫມາຍສໍາຄັນນີ້, ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານ ງານສູນກາງພັກ ປະທານປະເທດ ແຫ່ງ ສປປ ລາວ ປະທານຄະນະກໍາມະການ ປກຊ-ປກສ ສູນກາງ ໄດ້ໃຫ້ກຽດມີຄໍາເຫັນ ໂອ້ລົມຕໍ່ກອງປະຊຸມໃຫຍ່ເຊີ່ງສະຫາຍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຄວາມເອົາໃຈໃສ່ຊີ້ນໍາ-ນໍາພາຂອງຄະນະພັກກະຊວງປ້ອງກັນປະເທດ ກໍຄືຄະນະພັກຂັ້ນຕ່າງໆຕໍ່ການຈັດ ຕັ້ງປະຕິບັດ ມະຕິວ່າດ້ວຍ 4 ແຜນງານໃຫຍ່ 26 ໂຄງການ, ສ້າງໄດ້ຜົນງານ ແລະ ມີຜົນສໍາເລັດຫຼາຍ ດ້ານ, ກໍາລັງປ້ອງກັນຊາດໄດ້ປະກອບສ່ວນຢ່າງຕັ້ງຫນ້າ ແລະ ສົມກຽດໃນການປະຕິບັດຫນ້າທີ່ຍຸດທະສາດ, ເສີມຂະຫຼາຍທາດແທ້ ແລະ ມູນເຊື້ອອັນສະຫງ່າງາມ, ເຊີດຊູສະຕິລະວັງຕົວກຽມພ້ອມສູ້ຮົບ, ເປັນກໍາລັງຫຼັກແຫຼ່ງເຮັດຫນ້າທີ່ປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ, ປົກປັກຮັກສາ ເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດໄວ້ໄດ້ຢ່າງຫມັ້ນຄົງ, ຮັບປະກັນໄດ້ສະຖຽນລະພາບທາງດ້ານການເມືອງຢ່າງຫນັກແຫນ້ນ, ສັງຄົມມີຄວາມສະຫງົບປອດໄພ ແລະ ສີວິໄລ.

 

ສະຫາຍໄດ້ເນັ້ນຫນັກໃຫ້ສືບຕໍ່ເສີມຂະຫຍາຍມູນເຊື້ອສ້າງກອງທັບປະຊາຊົນລາວ ໃຫ້ກາຍເປັນກໍາລັງ ແລະ ພາຫະນະອັນແຫຼມຄົມ ແລະ ເປັນກໍາລັງທີ່ເດັດດ່ຽວ ຍຶດຫນັ້ນບົດບາດການນໍາພາເດັດຂາດ ໂດຍກົງ ແລະ ຮອບດ້ານຂອງພັກ, ປັບປຸງອົງຄະນະພັກກະຊວງປ້ອງກັນປະເທດ ໃຫ້ປອດໃສ, ເຂັ້ມແຂງ, ຫນັກແຫນ້ນ ທາງດ້ານການເມືອງ, ແນວຄິດ, ການຈັດຕັ້ງ, ຍົກສູງຄວາມສາມາດນໍາພາຢ່າງຮອບດ້ານ ແລະ ຄວາມສາມາດສູ້ຮົບຂອງຄະນະນະພັກທຸກຂັ້ນ, ທຸກພາວະ ແລະ ທຸກກໍລະນີ, ປັບປຸງກໍ່ສ້າງກໍາລັງ ປະກອບອາວຸດ ທຸກປະເພດກໍາລັງ ຕາມທິດຫັນເປັນທັນສະໄຫມ ໂດຍສຸມໃສ່ປັບປຸງກໍ່ສ້າງກໍາລັງດ້ານວິຊາສະເພາະ ໄປຄຽງຄູ່ກັບດ້ານການເມືອງ ແນວຄິດ, ແບບແຜນຊີ້ນໍາບັນຊາ ແລະ ດ້ານການຈັດຕັ້ງ, ສືບຕໍ່ຫັນກໍາລັງລົງສູ່ຮາກຖານ, ປັບປຸງຮາກຖານການເມືອງພັດທະນາ ເຂດຫ່າງໄກສອກຫຼີກ, ເຂດພູດອຍ, ເຂດຊາຍແດນ ແລະ ເຂດຍຸດທະສາດສໍາຄັນ, ເສີມຂະຫຍາຍມູນເຊື້ອ ເພີ່ມພູນຜະລິດຜົນ ແລະ ປະຢັດມັດທະຍັດຕາມທິດ “ເພິ່ງຕົນເອງ, ກຸ້ມຕົນເອງ ແລະ ສ້າງຄວາມ ເຂັ້ມແຂງດ້ວຍຕົນເອງ”.

 

Off

Comments are closed.