30th Nov2020

ຮອງນາຍົກລັດຖະມົນຕີ ສສ ຫວຽດນາມ ຢ້ຽມຢາມ ສປປ ລາວ ເພື່ອຮັດແໜ້ນການຮ່ວມມື

by somchan

ໂດຍປະຕິບັດຕາມການຕົກລົງການຮ່ວມມື ລະຫວ່າງ ກະຊວງການຕ່າງປະເທດລາວ ແລະ ຫວຽດນາມ, ໂດຍຕອບສະໜອງຕາມການເຊື້ອເຊີນ ຈາກ ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ທ່ານ ຟ້າມ ບິ່ງ ມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ ພ້ອມດ້ວຍ ຄະນະຜູ້ແທນ ກະຊວງການຕ່າງປະເທດຫວຽດນາມ ຢ້ຽມຢາມ ສປປ ລາວ ແລະ ເປັນປະທານຮ່ວມ ກອງປະຊຸມປຶກສາຫາລື ດ້ານການເມືອງຂັ້ນລັດຖະມົນຕີ ຄັ້ງທີ 7 ຂອງສອງກະຊວງຄື: ກະຊວງການຕ່າງປະເທດລາວ ແລະ ຫວຽດນາມ ໃນລະຫວ່າງວັນທີ 29-30 ພະຈິກ 2020 ທີ່ນະຄອນຫລວງວຽງຈັນ ໂດຍມີບັນດາກົມກ່ຽວຂ້ອງ ຂອງສອງປະເທດ ຢ່າງພ້ອມພຽງ.

ກອງປະຊຸມຄັ້ງນີ້, ໄດ້ທົບທວນຕີລາຄາຄືນ ການຮ່ວມມືສອງຝ່າຍ ໃນໄລຍະຜ່ານມາຂອງສອງກະຊວງ ແລະ ວາງແຜນການຮ່ວມມືໃນຕໍ່ໜ້າ. ນອກຈາກນີ້, ທີ່ສອງຝ່າຍມີຄວາມສົນໃຈ. ສອງຝ່າຍ ຍັງໄດ້ສະແດງຄວາມ ປິຕິຍິນດີ ທີ່ເຫັນວ່າສາຍພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຫວຽດນາມ ໄດ້ຮັບການເພີ່ມພູນຄູນສ້າງ ຂະຫຍາຍຕົວເປັນຢ່າງດີ ໃນໄລຍະຜ່ານມາກໍ່ຄືປະຈຸບັນ ແລະ ອານາຄົດ.

ໃນໂອກາດນີ້, ຝ່າຍລາວໄດ້ສະແດງຄວາມຊົມເຊີຍ ສສ ຫວຽດນາມ ທີ່ສໍາເລັດການເປັນປະທານອາຊຽນ ດ້ວຍຜົນສໍາເລັດຢ່າງຈົບງາມ. ພ້ອມທັງ, ໄດ້ສະແດງຄວາມ ຂອບໃຈ ທີ່ໄດ້ໃຫ້ສະໜັບສະໜູນຊ່ວຍເຫລືອ ສປປ ລາວ ຕະຫລອດມາ ບໍ່ວ່າຈະເປັນໄລຍະທີ່ມີ ການລະບາດຂອງ ພະຍາດໂຄວິດ-19 ຢູ່ລາວ ກໍຄືໃນໄລຍະເວລາ ສປປ ລາວ ປະສົບກັບເຫດໄພພິບັດ ທາງທໍາມະຊາດ ໂດຍສະເພາະ ໄດ້ຂອບໃຈຕໍ່ການມອບເຂົ້າສານ ຈໍານວນ 1.000 ໂຕນ ເພື່ອຊ່ວຍເຫລືອປະຊາຊົນ ແຂວງສະຫວັນນະເຂດ ທີ່ປະສົບກັບອຸທົກກະໄພຮ້າຍແຮງ ໃນກາງເດືອນພະຈິກຜ່ານມາ, ເຖິງວ່າ ຫວຽດນາມເອງ ກໍປະເຊີນໜ້າກັບໄພທຳມະຊາດ ຮ້າຍແຮງເຊັ່ນກັນ ແຕ່ກໍໄດ້ບິແບ່ງການຊ່ວຍເຫລືອໃຫ້ແກ່ ສປປ ລາວ.

ໃນຕອນທ້າຍ ຂອງກອງປະຊຸມ, ສອງລັດຖະມົນຕີ ກະຊວງການຕ່າງປະເທດ ໄດ້ຮ່ວມກັນລົງນາມ ຂໍ້ຕົກລົງວ່າດ້ວຍການຮ່ວມມື ໄລຍະ 2021-2025 ແທນສະບັບເກົ່າ ທີ່ໄດ້ໝົດອາຍຸລົງໃນປີ 2020 ນີ້ ເພື່ອເສີມຂະຫຍາຍການຮ່ວມມື ລະຫວ່າງສອງກະຊວງ ໃຫ້ຂະຫຍາຍຕົວ ແລະ ສອດຄ່ອງກັບສະພາບ ການໃນໄລຍະໃໝ່.

Off

Comments are closed.